ଖଡ଼ିଆଳ,୩।୪(ଡି.ଏନ.ଏ.): ନୂଆପଡ଼ା ଜିଲା ଖଡ଼ିଆଳ ବ୍ଲକ ତୁକୁଲା ଗ୍ରାମପଞ୍ଚାୟତ ଫୁଣ୍ଡାପଦର ମୁରଲୀଧର ପ୍ରାଥମିକ ବିଦ୍ୟାଳୟର ଜଣେ ଶିକ୍ଷକରେ ଚାଲୁଥିବା ଜଣାପଡ଼ିଛି। ଜିଲାର ଅନେକ ଅନୁଦାନପ୍ରାପ୍ତ ବିଦ୍ୟାଳୟ ମଧ୍ୟରୁ ତୁକୁଲା ଫୁଣ୍ଡାପଦର ମୁରଲୀଧର ପ୍ରାଥମିକ ବିଦ୍ୟାଳୟ ଅନ୍ୟତମ। ୧୯୯୨ରେ ସ୍ଥାପିତ ଏହି ବିଦ୍ୟାଳୟ ସରକାରଙ୍କ ଅନୁଦାନପ୍ରାପ୍ତ ହେବା ପରଠୁ ଷଷ୍ଠ ଓ ସପ୍ତମ ୨ଟି ଶ୍ରେଣୀ ପାଠପଢା ଚାଲିଛି। ବିଦ୍ୟାଳୟ ଆରମ୍ଭ ହେବା ଦିନଠାରୁ କେବଳ ଜଣେ ଶିକ୍ଷକରେ ବିଦ୍ୟାଳୟ ଚାଲୁଛି। କିଛିଦିନ ପୂର୍ବେ ଜଣେ ଶିକ୍ଷକଙ୍କୁ ଡେପୁଟେସନ ଦେଇ ପୁଣି ତାଙ୍କୁ ନେଇଯାଇଥିବା ଅଭିଭାବକମାନେ ଅଭିଯୋଗ କରିଛନ୍ତି। ବର୍ତ୍ତମାନ ୨ଟି ଶ୍ରେଣୀରେ ୪୭ଜଣ ଛାତ୍ରୀଛାତ୍ର ଥିବା ବେଳେ ଜଣେ ଶିକ୍ଷକ ଅଫିସ କାମ ସହ ଅନ୍ୟ କାମ କରୁଛନ୍ତି। ଏପରି ସ୍ଥଳେ ପାଠପଢା କିଭଳି ହେଉଥିବ ତାହା ସହଜେ ଅନୁମେୟ। ଜଣେ ଶିକ୍ଷକ କିଛି ସମୟ ଷଷ୍ଠ ଶ୍ରେଣୀ ଏବଂ କିଛି ସମୟ ସପ୍ତମ ଶ୍ରେଣୀକୁ ଯାଇ ପିଲାଙ୍କୁ ପାଠ ପଢ଼ାଇଥାନ୍ତି। ଏଥିରେ ପ୍ରତେକ ବର୍ଷ ପାଠ୍ୟ ଖସଡ଼ା ଅଧାରେ ରହିବା ସ୍ବାଭାବିକ। ଏହି ବିଦ୍ୟାଳୟରେ ବିଶେଷ କରି ଗରିବ ଓ ଦଳିତ ସମ୍ପ୍ରଦାୟ ଛାତ୍ରୀଛାତ୍ର ଅଧ୍ୟୟନ କରୁଥିବାରୁ ସରକାର ଏବଂ ଜିଲା ଶିକ୍ଷା ବିଭାଗ ଧ୍ୟାନ ଦେଉନାହାନ୍ତି ବୋଲି ଅଭିଭାବକ ଏବଂ ଛାତ୍ରୀଛାତ୍ରମାନେ ଅଭିଯୋଗ କରିିଛନ୍ତି। ଏବାବଦରେ ଖଡ଼ିଆଳ ସହ ଶିକ୍ଷା ଅଧିକାରୀ ପ୍ରମୋଦ ନାଥ ପତିଙ୍କୁ ପଚାରିବାରୁ ଉକ୍ତ ବିଦ୍ୟାଳୟରେ ଯଥାଶୀଘ୍ର ଶିକ୍ଷକ ଯୋଗାଇବା ବ୍ୟବସ୍ଥା କରାଯିବ ବୋଲି କହିଛନ୍ତି। କେବଳ ଶିକ୍ଷକ ସମସ୍ୟା ନୁହଁ, ବିଦ୍ୟାଳୟ ଯିବା ରାସ୍ତା ମଧ୍ୟ ଦୟନୀୟ ହୋଇପଡିଛି। ରାସ୍ତାରେ ପାଣି ଜମି କାଦୁଅ ପଚପଚ ହୋଇଛି। ଅନୁଦାନପ୍ରାପ୍ତ ଏହି ସ୍କୁଲର ୪୭ ଜଣ ଛାତ୍ରୀଛାତ୍ରଙ୍କ ସମେତ ଆଉ ଏକ ପ୍ରାଥମିକ ବିଦ୍ୟାଳୟର ୮୪ଜଣ ଛାତ୍ରୀଛାତ୍ର ଏହି କାଦୁଅ ରାସ୍ତାରେ ଯିବା ଆସିବା କରନ୍ତି। ଅନେକ ସମୟରେ ରାସ୍ତାରେ ପଡି ଯାଆନ୍ତି ବୋଲି ସେମାନେ କହନ୍ତି। ପାଣି ନିଷ୍କାସନ ସୁବିଧା ନ ଥିବାରୁ ଏପରି ସମସ୍ୟା ସୃଷ୍ଟି ହେଉଥିବା ଜଣାପଡିଛି। ଏ ନେଇ ବିଡିଓ ବୀରସେନ ବେହେରାଙ୍କୁ ପଚାରିବାରୁ ସେ ଏ ବିଷୟରେ ଅବଗତ ଅଛନ୍ତି ଓ ମେ ମାସ ସୁଦ୍ଧା ରାସ୍ତା ନିର୍ମାଣ କରାଯିବ ବୋଲି କହିଥିଲେ।