ଛତ୍ରପୁର, ୧୨।୩(ଦିଲୀପ ସାମଲ): ଗଞ୍ଜାମ ଜିଲା କବିସୂର୍ଯ୍ୟନଗର ଥାନା ଆଠଗଡ ପାଟଣା ଗ୍ରାମରେ ଛତ୍ରପୁର ଅବକାରୀ ଭାମ୍ୟମାଣ ସଂସ୍ଥାର ଏକ ଟିମ୍କୁ ଚୋରା ମଦ ବ୍ୟବସାୟୀ ମାଡ଼ ମାରିଛନ୍ତି। ଗ୍ରାମରେ ବେଆଇନ ଭାବେ ମଦ ବ୍ୟବସାୟ ଚାଲିଥିବା ଖବରପାଇ ବୁଧବାର ଏହି ଟିମ ଚଢ଼ାଉ କରିଥିଲେ। ଚଢ଼ାଉ ବେଳେ ମଦ ମାଫିଆମାନେ ଟିମ୍ ଉପରେ କୁକୁର ଛାଡ଼ିଦେବା ସହ ଗ୍ରାମର ୩୦ରୁ ଅଧିକ ବ୍ୟକ୍ତି ସେମାନଙ୍କୁ ବିରୋଧ କରି ଆକ୍ରମଣ ସହ ସରକାରୀ ଗାଡି ଭଙ୍ଗା ରୁଜା କରିଛନ୍ତି। କାଠ ଫାଳିଆ ଓ ଠେଙ୍ଗାରେ ପ୍ରଥମେ କର୍ମଚାରୀମାନଙ୍କୁ ଆକ୍ରମଣ କରିବା ପରେ ଗାଡିର ପଛ କାଚ ଭଙ୍ଗାରୁଜା କରିଛନ୍ତି। ଆକ୍ରମଣରେ ଅବକାରୀ କନଷ୍ଟେବଳ ପବିତ୍ର ସାହୁ ଓ ସ୍ବାଧୀନ ସାହୁଙ୍କ ସମେତ ୫ ଆହତ ହୋଇଥିଲେ। ଏନେଇ ଭାମ୍ୟମାଣ ସଂସ୍ଥାର ଏସ୍ଆଇ ସୂର୍ଯ୍ୟ ନାରାୟଣ ରଥ କବିସୂର୍ଯ୍ୟନଗର ଥାନାରେ ଅଭିଯୋଗ କରିଛନ୍ତି। ଏତଲାରେ ମଣ୍ଟୁ ମହାନ୍ତି ଏବଂ ଅନ୍ୟମାନଙ୍କ ନାମରେ ମାମଲା ରୁଜୁ ହୋଇଛି। ପୋଲିସ ପକ୍ଷରୁ ଏତଲାକୁ ଭିତ୍ତିକରି ତଦନ୍ତ ଆରମ୍ଭ କରାଯାଇଛି। ଘଟଣା ସ୍ଥଳରେ ପୁରୁଷୋତ୍ତମପୁର ଏସ୍ଡିପିଓ ପହଞ୍ଚି ତଦନ୍ତ ଚଳାଇଥିବା ଦେଖିବାକୁ ମିଳିଛି।
