ବେଜିଂ,୨୨।୧୦ : ଚାଇନାର ରାଷ୍ଟ୍ରପତି ଭାବେ ଶି ଜିନପିଙ୍ଗ କ୍ଷମତାରେ ତୃତୀୟ ପାଳି ପାଇଁ ରହିବେ। ଏନେଇ ଚାଇନା କମ୍ୟୁନିଷ୍ଟ ପାର୍ଟି ପକ୍ଷରୁ ପ୍ରସ୍ତାବ ପାରିତ ହୋଇଛି। କମ୍ୟୁନିଷ୍ଟ ପାର୍ଟି ଅଫ୍ ଚାଇନା(ସିପିସି)ର ଏକ ସପ୍ତାହ ବ୍ୟାପି ବୈଠକ ଶନିବାର ଶେଷ ହୋଇଛି। ପାର୍ଟିର କେନ୍ଦ୍ରୀୟ କମିଟି ରାଷ୍ଟ୍ରପତି ଜିନପିଙ୍ଗଙ୍କୁ ଅଧିକ କ୍ଷମତା ଦେବା ଏବଂ ନିର୍ବାଚନ ସମ୍ପର୍କିତ କେତେକ ପ୍ରସ୍ତାବକୁ ଅନୁମୋଦନ କରିଛି।
ଏନେଇ ପାର୍ଟିର ସମ୍ବିଧାନରେ ସଂଶୋଧନ କରାଯାଇଛି। ପାର୍ଟିର ଚାର୍ଟରରେ ପରିବର୍ତ୍ତନ ଉପରେ ସର୍ବସମ୍ମତି କ୍ରମେ ପାରିତ ହୋଇଥିବା ପ୍ରସ୍ତାବ ଅନୁଯାୟୀ ସମସ୍ତ ଦଳର ସଦସ୍ୟ ପାର୍ଟି କେନ୍ଦ୍ରୀୟ କମିଟିରେ ଏବଂ ସମଗ୍ର ପାର୍ଟିରେ କମ୍ରେଡ ଜିନପିଙ୍ଗଙ୍କ ମୂଳ ସ୍ଥିତିକୁ ବଜାୟ ରଖିବେ। ପାଞ୍ଚ ବର୍ଷ ମଧ୍ୟରେ ଅନୁଷ୍ଠିତ ହୋଇଥିବା କଂଗ୍ରେସରେ ୨୦୫ନିୟମିତ କେନ୍ଦ୍ରୀୟ କମିଟି ସଦସ୍ୟ ଏବଂ୧୭୧ ଜଣ ବିକଳ୍ପ ସଦସ୍ୟଙ୍କୁ ମନୋନୀତ କରାଯାଇଛି।
୬୯ ବର୍ଷିୟ ଜିନପିଙ୍ଗ କେନ୍ଦ୍ରୀୟ କମିଟିକୁ ନିର୍ବାଚିତ ହୋଇଛନ୍ତି। ରବିବାର ୨୫ ଜଣିଆ ରାଜନୈତିକ ବ୍ୟୁରୋ ଚୟନ କରିବାକୁ ବୈଠକ ହେବ। ଏହା ପରେ ଦେଶ ପରିଚାଳନା ପାଇଁ ଷ୍ଟାଣ୍ଡିଂ କମିଟିରେ ସାତ କିମ୍ବା ଅଧିକ ସଦସ୍ୟ ଚୟନ କରାଯିବ। ସ୍ଥାୟୀ କମିଟି ସାଧାରଣ ମହାସଚିବ ଚୟନ କରିବେ, ଯିଏ ଦଳର ମୁଖ୍ୟ ତଥା ଦେଶର ମୁଖ୍ୟ ହେବେ। କେନ୍ଦ୍ରୀୟ କମିଟିରେ ନିବାଚିତ ହେବା ସହିତ ଜିନପିଙ୍ଗ ପାର୍ଟିର ମହାସଚିବ ହେବାକୁ ଯାଉଛନ୍ତି।
