ଭୁବନେଶ୍ୱର,୨୬।୧୨ (ଅଭୟ ଦାଶ): ପ୍ରତି ବର୍ଷ ଭଳି ଚଳିତ ବର୍ଷର ବଡ଼ଦିନ (ଖ୍ରୀଷ୍ଟମାସ)ଠାରୁ ଆରମ୍ଭ କରି ନବବର୍ଷ (୨୦୨୪ ବର୍ଷ)ର ପ୍ରଥମ ସପ୍ତାହ ପର୍ଯ୍ୟନ୍ତ ରାଜ୍ୟର ହୋଟେଲ ଶିଳ୍ପ ଉତ୍ସବ ମୁଖର ହୋଇଉଠିଛି। ଏପରିକି ଉଭୟ ବିଦେଶୀ ଓ ସ୍ବଦେଶୀ ପର୍ଯ୍ୟଟକଙ୍କ ସହ ସ୍ଥାନୀୟ ଅତିଥିଙ୍କୁ ଆକୃଷ୍ଟ କରିବା ପାଇଁ ବିଭିନ୍ନ ପ୍ରକାର ଆକର୍ଷଣୀୟ ଅଫରର ବ୍ୟବସ୍ଥା ମଧ୍ୟ କରାଯାଇଛି। ସେହିଭଳି ଗତବର୍ଷ (୨୦୨୩ ବର୍ଷ) ଅପେକ୍ଷା ଚଳିତ ବର୍ଷ (୨୦୨୪ ବର୍ଷ) ର ନବବର୍ଷର କାରବାର ୧୦୦୦ କୋଟିରୁ ଅଧିକ ହେବ ବୋଲି ଓଡ଼ିଶାର ହୋଟେଲ ଶିଳ୍ପ ସଂଘ ପକ୍ଷରୁ ଆକଳନ କରାଯାଇଛି। ବିଶେଷ ପର୍ଯ୍ୟଟକଙ୍କ ପାଇଁ ବିଶେଷ ସୁବିଧା ଓ ସ୍ବତନ୍ତ୍ର ପ୍ୟାକେଜ ମଧ୍ୟ ବିଭିନ୍ନ ହୋଟେଲଗୁଡିକ ପକ୍ଷରୁ ଯୋଗାଇ ଦିଆଯାଉଛି। ଫଳରେ ପର୍ଯ୍ୟଟକ ସୁଲଭ ମୂଲ୍ୟରେ ସୁବିଧା ଓ ସୌନ୍ଦର୍ଯ୍ୟର ମୁହୂର୍ତ୍ତକୁ ପରିବାର ଓ ପରିଜନଙ୍କ ସହ ବିତାଇବାକୁ ନିଜ ନିଜ ପସନ୍ଦର ହୋଟେଲରେ ସମୟ ଅତିବାହିତ କରିବାକୁ ଆସୁଛନ୍ତି। ଅପରପକ୍ଷରେ ୨୦୨୩ ବର୍ଷ ଶେଷ ଓ ଖ୍ରୀଷ୍ଟମାସ ସାଙ୍ଗକୁ ନବବର୍ଷ (୨୦୨୪ ବର୍ଷ)ର ବିଶେଷ ଉତ୍ସବକୁ ପାଳନ କରିବା ପାଇଁ ରାଜ୍ୟର ପ୍ରମୁଖ ସହର ତଥା ଭୁବନେଶ୍ୱର, କଟକ, ସମ୍ବଲପୁର, ପୁରୀ , କୋର୍ଣାକ, ଅନୁଗୋଳ, ବାଲେଶ୍ୱର, କେନ୍ଦୁଝର, କୋରାପୁଟ ଭଳି ୧୦୦ରୁ ଅଧିକ ଦର୍ଶନୀୟ ଓ ପର୍ଯ୍ୟଟନସ୍ଥଳୀ ନିକଟରେ ଥିବା ମେଫେୟାର ଗ୍ରୁପ୍, ସ୍ବସ୍ତି ଗ୍ରୁପ୍, ପାଲ୍ ହାଇଟ, ମାରିଅନ, ଆଇଟିସି ଭୁବନେଶ୍ୱର, ତାଜ ବିଭାନ୍ତ, ଟ୍ରାଇଡେଣ୍ଟ, ଜିଞ୍ଜର,ସାଣ୍ଡି ଟାଓ୍ବାର, ଓଟିଡିସି, ପାନ୍ଥନିବାସ ଏବଂ ରାଜ୍ୟର ୩ ତାରକା ହୋଟେଲ ଆଣ୍ଡ ରେଷ୍ଟୁରାଣ୍ଟଗୁଡିକରେ ବଡ଼ଦିନରୁ ଭିଡ଼ ଆରମ୍ଭ ହୋଇଯାଇଛି। ସେହିପରି ଓଡ଼ିଶା ହୋଟଲ ଶିଳ୍ପ ସଂଘର ସୂଚନା ଅନୁଯାୟୀ ୨୦୨୩ ଡିସେମ୍ବରରୁ ୨୦୨୪ ଜାନୁୟାରୀ ପ୍ରଥମ ସପ୍ତାହ ପର୍ଯ୍ୟନ୍ତ ସାରା ରାଜ୍ୟରେ ବଡ଼ଦିନ ଓ ନବବର୍ଷର ଉତ୍ସବ ଜାରି ରହିବ। ଏହି ପରିପ୍ରେକ୍ଷୀରେ ହୋଟେଲ ଆଣ୍ଡ ରେଷ୍ଟୁରାଣ୍ଟ ଶିଳ୍ପ ସହ ଟ୍ରାଭେଲ ଏଜେନ୍ସିଗୁଡିକ ପକ୍ଷରୁ ମଧ୍ୟ ବ୍ୟାପକ ସୁବିଧା ଓ ବ୍ୟବସ୍ଥା ଉଭୟ ଘରୋଇ ଓ ବିଦେଶୀ ପର୍ଯ୍ୟଟକଙ୍କ ପାଇଁ କରାଯାଇଛି। ଉଲ୍ଲେଖଯୋଗ୍ୟ, ୨୦୧୯ ନବବର୍ଷ ପରଠାରୁ ଓଡ଼ିଶାର ସବୁ ବର୍ଗର ହୋଟେଲ ଆଣ୍ଡ ରେଷ୍ଟୁରାଣ୍ଟ ଶିଳ୍ପ କୋଭିଡ୍ କାରଣରୁ ମାନ୍ଦାବସ୍ଥା ଦେଇ ଗତି କରୁଛନ୍ତି। ତଥାପି ଗତ ୨ ବର୍ଷ (୨୦୨୨ .ଏବଂ ୨୦୨୩ ) ହେବ ଶିଳ୍ପରେ ସୁଧାର ଆସିଛି। ୨୦୨୪ ବର୍ଷ ହୋଟଲ ଶିଳ୍ପ ପାଇଁ ନୂଆ ସମ୍ଭାବନା ଓ ଉନ୍ନତ କାରବାର ଆଶା ନେଇ ସବୁ ବର୍ଗର ହୋଟେଲ ଓ ରେଷ୍ଟୁରାଣ୍ଟଗୁଡିକ ପକ୍ଷରୁ ବଡ଼ଦିନ ଓ ନବବର୍ଷ ପାଇଁ ସ୍ବତନ୍ତ୍ର କାର୍ଯ୍ୟକ୍ରମ ସାଙ୍ଗକୁ ଡିଜେ ନାଇଟ ଓ ମ୍ୟୁଜିକ କନ୍ସର୍ଟ ସହ ମନୋରଞ୍ଜନର ସ୍ବତନ୍ତ୍ର ସନ୍ଧ୍ୟାର ମଧ୍ୟ ଆୟୋଜନ କରାଯାଇଛି।