ଭୁବନେଶ୍ୱର, ୧୯।୨ (ବ୍ୟୁରୋ): ପୌର ନିର୍ବାଚନ ପାଇଁ ଭୋଟର ତାଲିକା ପ୍ରକାଶ ପରେ ଏହାକୁ ନେଇ ଆପତ୍ତି ଅଭିଯୋଗ ସରିଛି। ବୁଧବାର ସୁଦ୍ଧା ଭୁବନେଶ୍ୱର ମହାନଗର ନିଗମ (ବିଏମ୍ସି) ଅଞ୍ଚଳର ଅସନ୍ତୋଷ ଭୋଟରମାନେ ସେମାନଙ୍କ ଆପତ୍ତି ଅଭିଯୋଗ ଦାଖଲ କରିବା ପରେ ଶୁକ୍ରବାର ଏହାର ଶୁଣାଣି ହୋଇଛି। ଭୁବନେଶ୍ୱର ନିର୍ବାଚନ ଅଧିକାରୀ ତଥା ଏଡିଏମ୍ ପ୍ରଫୁଲ୍ଲ କୁମାର ସ୍ବାଇଁଙ୍କ ଅଧ୍ୟକ୍ଷତାରେ ଲୋକଙ୍କ ଆପତ୍ତି ଅଭିଯୋଗ ଶୁଣାଣି କରାଯାଇଛି। ସମୁଦାୟ ୨୯୮ଟି ଅଭିଯୋଗ ଆସିଥିଲା। ଏସବୁର ଶୁଣାଣି ହେବା ପରେ ଏହାର ଡ୍ରାଫ୍ଟ ପ୍ରସ୍ତୁତ କରାଯିବ। ଆସନ୍ତା ୨୪ ତାରିଖରେ ଚୂଡ଼ାନ୍ତ ଭୋଟର ତାଲିକା ପ୍ରକାଶ ପାଇବ ବୋଲି ଏଡିଏମ୍ ସ୍ବାଇଁ ସୂଚନା ଦେଇଛନ୍ତି। ଯେଉଁ ତାଲିକା ପ୍ରଦାନ କରାଯାଇଥିଲା, ସେହି ଅନୁଯାୟୀ ଭୋଟରଙ୍କ ନାମ ତାଲିକାରେ ସ୍ଥାନ ପାଇଛି। ଏଥିରେ କୌଣସି ତ୍ରୁଟି ହୋଇନାହିଁ। ତେବେ ତାଲିକାରେ ଥିବା ସତ୍ତ୍ୱେ କାହାର ନାମ କଟି ଯାଇଥିଲେ ବା ଓ୍ବାର୍ଡ ପରିବର୍ତ୍ତନ ହୋଇଥିଲେ, ତୁରନ୍ତ ଏହାର ସମାଧାନ କରାଯାଉଛି ବୋଲି ସେ କହିଛନ୍ତି। ପୌର ନିର୍ବାଚନ ପରିପ୍ରେକ୍ଷୀରେ ପ୍ରସ୍ତୁତ ନୂତନ ଭୋଟର ତାଲିକା ଅନୁଯାୟୀ, ଚଳିତବର୍ଷ ୭ଲକ୍ଷ ୨୭ ହଜାର ୪୫୬ଜଣ ଭୋଟର ଥିବା ବିଏମ୍ସି ପକ୍ଷରୁ ସୂଚନା ଦିଆଯାଇଛି।
ସୂଚନାଯୋଗ୍ୟ, ଭୋଟର ତାଲିକା ପ୍ରକାଶ ପାଇବା ପରେ ବିଭିନ୍ନ ଓ୍ବାର୍ଡରେ ଅସନ୍ତୋଷ ଦେଖାଦେଇଥିଲା। କେତେକ ଓ୍ବାର୍ଡରୁ ବହୁ ଭୋଟରଙ୍କ ନାମ ନ ଥିବା ଅଭିଯୋଗ ହୋଇଥିଲା। ଅନେକ ଭୋଟରଙ୍କର ଓ୍ବାର୍ଡ ବଦଳିଯାଇଥିବା ମଧ୍ୟ ଜଣାପଡିଥିଲା। ଅଭିଯୋଗ ଉପରେ ପଦକ୍ଷେପ ନେବା ପାଇଁ ଏଡିଏମ୍ଙ୍କ କାର୍ଯ୍ୟାଳୟରେ ୯ଟି ଟିମ୍ ଏହି କାର୍ଯ୍ୟରେ ଲାଗିଥିଲେ।