ଲକ୍ଷ୍ନୌ,୨୬।୯: ଲକ୍ଷ୍ନୌର ଇଟାଉଞ୍ଜାଠାରେ ଏକ ଅଭାବନୀୟ ଘଟଣା ଘଟିଛି। ଦ୍ରୁତ ଗତିରେ ଆସୁଥିବା ଟ୍ରକ୍ ଏକ ଟ୍ରାକ୍ଟରକୁ ଟକ୍କର ଦେଇଛି। ଫଳରେ ଏକ ପୋଖରୀରେ ଟ୍ରାକ୍ଟର-ଟ୍ରଲି ଖସି ପଡିଛି। ଦୁର୍ଘଟଣାରେ ଏପର୍ଯ୍ୟନ୍ତ ୧୦ ଜଣଙ୍କ ମୃତ୍ୟୁ ଘଟିଛି। ସ୍ଥାନୀୟ ଲୋକଙ୍କ ସହାୟତାରେ ପୋଲିସ ୩୫ ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରିଛି।
ସୀତାପୁରର ଅଟାରିଆର ଟିକାଉଲି ଗାଁର ଚୁନ୍ନିଲାଲଙ୍କ ପୁଅ ମୁଣ୍ଡନ ସମାରୋହ କରିଥିଲେ। ନବରାତ୍ରିର ପ୍ରଥମ ଦିନ ଇଟାଉଞ୍ଜାର ଉନାଇ ଦେବୀ ମନ୍ଦିରରେ ମୁଣ୍ଡନ କରାଯିବାର ଥିଲା। ଏଥିପାଇଁ ପୂରା ପରିବାର ସମ୍ପର୍କୀୟ ଏବଂ ପରିଚିତ ବ୍ୟକ୍ତିଙ୍କ ସହ ଟ୍ରାକ୍ଟରରେ ମନ୍ଦିରକୁ ଯାଉଥିଲେ। ଏହି ସମୟରେ ଟ୍ରକ୍ ପଛପଟୁ ଧକ୍କା ଦେଇଥିଲା। ଏହି ଧକ୍କା ଏତେ ଶକ୍ତିଶାଳୀ ଥିଲା ଯେ ଟ୍ରାକ୍ଟର ସିଧାସଳଖ ରାସ୍ତା ପାର୍ଶ୍ୱରେ ଥିବା ବଡ ପୋଖରୀରେ ଖସିପଡିଥିଲା।
