ବିଳାସପୁର, ୧୨ା୬ : ବାଲେଶ୍ୱରର ବାହାନଗା ବଜାର ରେଳଷ୍ଟେଶନ ନିକଟରେ ମର୍ମନ୍ତୁଦ ଟ୍ରିପଲ୍ ଟ୍ରେନ୍ ଧକ୍କା ପରେ ଦୁର୍ଘଟଣା ରେଲ୍ଓ୍ବେର ପିଛା ଛାଡ଼ୁନାହିଁ। ଶନିବାର ସନ୍ଧ୍ୟାରେ ଛତିଶଗଡ଼ର ବିଳାସପୁର ଜିଲାରେ ଦୁଇଟି ଟ୍ରେନ୍ ସମ୍ଭାବ୍ୟ ଦୁର୍ଘଟଣାରୁ ଅଳ୍ପକେ ବର୍ତ୍ତିଯାଇଛନ୍ତି। ମେମୁ ଟ୍ରେନ୍ ଏବଂ ମାଲ୍ବାହୀ ଟ୍ରେନ୍ ଗୋଟିଏ ଟ୍ରାକ୍ରେ ପରସ୍ପର ମୁହାଁମୁହିଁ ସ୍ଥିତିକୁ ଆସିଯାଇଥିଲେ। ଉଭୟ ଡ୍ରାଇଭରଙ୍କ ଉପସ୍ଥିତ ବୁଦ୍ଧି ଓ ତ୍ୱରିତ୍ ପଦକ୍ଷେପ ଯୋଗୁ ଏକ ବଡ଼ ଦୁର୍ଘଟଣାକୁ ଏଡ଼ାଇ ଦିଆଯାଇପାରିଛି ଓ ଶତାଧିକ ଜୀବନ ରକ୍ଷା ହୋଇଛି। ସମ୍ଭାବ୍ୟ ଧକ୍କାର କେଇ ଫୁଟ୍ ଦୂରରେ ଦୁଇ ଟ୍ରେନ୍ ଅଟକି ଯାଇଥିଲେ। ମେମୁ ଲୋକାଲ ଟ୍ରେନ୍ଟି କୋର୍ବା ଅଭିମୁଖେ ଯାଉଥିବାବେଳେ ବିଳାସପୁର ଜିଲାର ଜୟରାମନଗର ଏବଂ କୋଟମିସୋନାର ମଧ୍ୟବର୍ତ୍ତୀ ସ୍ଥାନରେ ଉକ୍ତ ରେଳଲାଇନରେ ବିପରୀତ ଦିଗରୁ ଏକ ମାଲ୍ବାହୀ ଟ୍ରେନ୍ ଆସୁଥିଲା। ଏହା ମାନବକୃତ ଓ ବୈଷୟିକ ତ୍ରୁଟିରୁ ହୋଇଥିଲା, ଯାହାକୁ ଠିକ୍ ସମୟରେ ସଂଶୋଧନ କରାଯିବାରୁ ଦୁର୍ଘଟଣାକୁ ଏଡ଼ାଇ ଦିଆଯାଇପାରିଲା ବୋଲି କୁହାଯାଉଛି।
