ବାରିପଦା,୭ା୯(ନୀଳାଦ୍ରି ବିହାରୀ ଦଣ୍ଡପାଟ): ବେତନଟୀ ରେଳ ଷ୍ଟେଶନରେ ଗୁରୁବାର ଏକ ବଡ଼ ବିପଦ ଟଳି ଯାଇଛି। ଟ୍ରେନ୍ଟି ଉକ୍ତ ଷ୍ଟେଶନ ଅତିକ୍ରମ କରିବାର ମାତ୍ର ୫ ମିନିଟ୍ ପରେ ରେଳ ଧାରଣା ଉପରେ ଏକ ବିଶାଳକାୟ ଶାଳଗଛ ପଡ଼ିଥିଲା।
ସୂଚନାନୁଯାୟୀ, ରୁପ୍ସାରୁ ବାଙ୍ଗିରିପୋଷି ଅଭିମୁଖେ ମେମୁ ଟ୍ରେନ ଧାର୍ଯ୍ୟ ସମୟରେ ଯାଉଥିବା ବେଳେ ବେତନଟୀ ଷ୍ଟେଶନରେ ଅଟକି ଥିଲା। ତେବେ ବେତନଟୀ ଷ୍ଟେଶନ ଅତିକ୍ରମ କରିବାର ମାତ୍ର ୫ମିନିଟ୍ ପରେ ଏକ ବିଶାଳ ଶାଳଗଛ ରେଳଧାରଣା ଉପରେ ପଡ଼ିଥିଲା। ଫଳରେ ବିଦ୍ୟୁତ ସରବରାହ ସମ୍ପୂର୍ଣ୍ଣ ବିଚ୍ଛେଦ ହୋଇଯାଇଥିଲା। ବାଙ୍ଗିରିପୋଷି ଅଭିମୁଖେ ଯାଉଥିବା ମେମୁଟ୍ରେନ କେସିପୁର ଷ୍ଟେଶନରେ ଅଟକି ରହିଥିବା ଜଣାଯାଇଛି। ଏପଟେ କେସିପୁର ଷ୍ଟେଶନରେ ମେମୁଟ୍ରେନ ଅଟକି ରହିଥିବାରୁ ଭଞ୍ଜପୁର ଷ୍ଟେଶନରେ ମରାମତି ପାଇଁ ରହିଥିବା ସହାୟକ ଟ୍ରେନ୍ ଗନ୍ତବ୍ୟସ୍ଥଳରେ ପହଞ୍ଚି ପାରୁନାହିଁ। ଫଳରେ ବାଲେଶ୍ୱରରୁ ଏକ ଅତିରିକ୍ତ ଟ୍ରେନ୍ ମରାମତି ପାଇଁ ଘଟଣାସ୍ଥଳକୁ ଆସୁଥିବା ନେଇ ଉପସ୍ଥିତ ରେଳବିଭାଗର କର୍ମଚାରୀ ସୂଚନା ଦେଇଛନ୍ତି। ତେବେ ରେଳଧାରଣା ଉପରେ ଗଛ ପଡ଼ିବା ସମୟରେ ଗଛତଳେ ଚାପିହୋଇ ଜଣେ ମହିଳା ଗୁରୁତର ହୋଇ ଡାକ୍ତରଖାନାରେ ଭର୍ତ୍ତି ହୋଇଥିବା ଜଣାପଡ଼ିଛି।