ଯୋଡ଼ା/ଝୁମ୍ପୁରା, ୧୩।୧(ଡି.ଏନ୍.ଏ): କେନ୍ଦୁଝର ଜିଲା ଯୋଡ଼ା ଖଣିମଣ୍ଡଳରେ ହେଉଥିବା ଖଣିଜ ଚୋରା କାରବାରକୁ ବନବିଭାଗ ଲଗାତାର ଗୋଡାଇ ଧରୁଛି। ସୋମବାର ବିଳମ୍ବିତ ରାତି ପ୍ରାୟ ୧ଟା ବେଳେ ଯୋଡା ଖଣିମଣ୍ଡଳସ୍ଥିତ ନୟାଗଡ ଜଙ୍ଗଲରୁ ଏକ ୧୨ଚକିଆ ଟ୍ରକ୍(ନଂ-ଓଡି ୧୫ ଏଲ୍ ୦୩୮୬)ରେ ବିପୁଳ ପରିମାଣର ଲୁହପଥର ବୋଝେଇ କରି ଚୋରାଚାଲାଣ ହେଉଥିବାବେଳେ ବନବିଭାଗ ଅତର୍କିତ ଚଢାଉ କରି ଟ୍ରକ୍ଟିକୁ ଜବତ କରିଛି। ଚମ୍ପୁଆ ରେଞ୍ଜର ଅଧିକାରୀ ଘାସିନାଥ ପାତ୍ରଙ୍କ ଠାରୁ ମିଳିଥିବା ସୂଚନା ଅନୁଯାୟୀ କେନ୍ଦୁଝର ଡିଏଫ୍ଓଙ୍କ ନିର୍ଦେଶ କ୍ରମେ ମଙ୍ଗଳବାର ବିଳମ୍ବିତ ରାତିରେ ବନବିଭାଗ ପକ୍ଷରୁ ବିଭିନ୍ନ ବନାଞ୍ଚଳରେ ପାଟ୍ରୋଲିଂ କରାଯାଉଥିଲା ା ଉକ୍ତ ନୟାଗଡ ଜଙ୍ଗଲରେ ଭାରିଯାନରେ ଚୋରା ଲୁହାପଥର ବୋଝେଇ ହେବା ଖବରପାଇ ଚମ୍ପୁଆ ରେଞ୍ଜର ଅଧିକାରୀ ଘାସିନାଥ ପାତ୍ର, ଯୋଡ଼ା ବନପାଳ ଅନିରୁଦ୍ଧ ପଣ୍ଡା, ବାମେବାରୀ ଫରେଷ୍ଟର ଯତୀନ୍ଦ୍ର କୁମାର ସାହୁ, ବାଲିବନ୍ଧ ଫରେଷ୍ଟର ଖଗେଶ୍ୱର ବାରିକ ପ୍ରମୁଖ ଏକ ମୋବାଇଲ ସ୍କ୍ବାଡ ସହ ମିଳିତ ହୋଇ ଚଢାଉ କରିଥିଲେ ା ଟ୍ରକ୍ ଡ୍ରାଇଭର ଅନ୍ଧାରର ସୁଯୋଗ ନେଇ ଗାଡି ଛାଡି ଫେରାର୍ ହୋଇଯାଇଥିଲା ା ବନବିଭାଗ ଉକ୍ତ ଟ୍ରକ୍କୁ ଜବତ କରି ନିଜ ହେପାଜତକୁ ନେଇଥିଲା। ପ୍ରାୟ ୩୫ ମେଟ୍ରିକ୍ ଟନ୍ ଉନ୍ନତମାନର ଲୁହାପଥର ବୋଝେଇ ହୋଇଥିବା ଯାଞ୍ଚରୁ ବନବିଭାଗ ଜାଣିବାକୁ ପାଇଥିଲା। ଯାହାର ଆନୁମାନିକ ମୂଲ୍ୟ ଲକ୍ଷାଧିକ ଟଙ୍କାରୁ ଉର୍ଦ୍ଧ୍ୱ ହେବବୋଲି ଜଣାପଡିଛି ା ଯୋଡା ଖଣିମଣ୍ଡଳରେ ଦିନକୁଦିନ ଖଣିଜ ଚୋରା କାରବାର ବୃଦ୍ଧି ପାଉଥିଲେ ହେଁ, ଏହାକୁ ନିୟନ୍ତ୍ରଣ କରାଯାଇ ପାରୁନାହିଁ। ଗତ ଦୁଇ ସପ୍ତାହ ତଳେ ବନବିଭାଗ ଏକ ସଂରକ୍ଷିତ ଜଙ୍ଗଲରୁ ଚୋରାରେ ଗଚ୍ଛିତ ଥିବା ବହୁ ମୂଲ୍ୟବାନ ମାଙ୍ଗାନିଜ ପଥରକୁ ଜବତ କରିଥିଲା।