ସିରସା,୫।୯ : ପ୍ରାୟତଃ ଆମେ ଏପରି ଘଟଣା ସାମ୍ନାକୁ ଆସିଥାଉ, ଯେଉଁଠି ଦାରିଦ୍ର୍ୟତା କେତେକ ପ୍ରତିଭାବାନ ପିଲାମାନଙ୍କୁ ଶିକ୍ଷା କ୍ଷେତ୍ରରେ ଅଗ୍ରଗତି କରିବାକୁ ଦେଇ ନ ଥାଏ। ତେବେ ହରିୟାଣାରେ ବାବା ସରସାଇନାଥ ବୁକ ବ୍ୟାଙ୍କ ୱେଲଫେୟାର ଟ୍ରଷ୍ଟ ଏଭଳି ପିଲାମାନଙ୍କୁ ସାହାଯ୍ୟ କରୁଛି। ସେମାନଙ୍କର ଶିକ୍ଷାକୁ ସୁଗମ ରଖିବା ପାଇଁ ଅଭାବୀ ପିଲାମାନଙ୍କୁ ବହି ଯୋଗାଇବା ପାଇଁ ଏକ ବୁକ ବ୍ୟାଙ୍କ ସୃଷ୍ଟି କରାଯାଇଛି।
ସିରସାର ଶ୍ରୀ ଗୋଶାଳା ଠାରେ ପ୍ରତିଷ୍ଠିତ ବାବା ସରସାଇନାଥ ବୁକ ବ୍ୟାଙ୍କ କଲ୍ୟାଣ ଟ୍ରଷ୍ଟ ୨୫ ଜୁଲାଇ ୨୦୨୧ରେ ପ୍ରତିଷ୍ଠିତ ହୋଇଥିଲା। କେବଳ ୧୦୦ପୁସ୍ତକରୁ ଆରମ୍ଭ ହୋଇଥିବା ବୁକ ବ୍ୟାଙ୍କରେ ବର୍ତ୍ତମାନ ୯ ରୁ ଦ୍ୱାଦଶ ଏବଂ ସ୍ନାତକୋତ୍ତର ପର୍ଯ୍ୟନ୍ତ ୧୦ ହଜାରରୁ ଅଧିକ ପୁସ୍ତକ ଅଛି। ଟ୍ରଷ୍ଟର ସଦସ୍ୟମାନଙ୍କର ଉଦ୍ଦେଶ୍ୟ ହେଉଛି ଆର୍ଥିକ ଦୃଷ୍ଟିରୁ ଦୁର୍ବଳ ଛାତ୍ରୀଛାତ୍ରମାନେ ଯେଭଳି ପୁସ୍ତକ କାରଣରୁୁ ସେମାନଙ୍କର ପାଠପଢ଼ା ବନ୍ଦ ନ କରିବେ। ଏହି ବୁକ ବ୍ୟାଙ୍କରେ ୧୫ ଜଣ ସଦସ୍ୟ ଅଛନ୍ତି। ଏହି ବୁକ ବ୍ୟାଙ୍କ ଆରମ୍ଭ କରିବାର ନିଷ୍ପତ୍ତି କରୋନା ମହାମାରୀ ସମୟରେ ନିଆଯାଇଥିଲା ।
ସରକାରୀ ବିଦ୍ୟାଳୟ ସହ ଜଡିତ ଶିକ୍ଷକମାନେ ଏକ ବୁକ ବ୍ୟାଙ୍କ ଗଠନ କରିବାକୁ ନିଷ୍ପତ୍ତି ନେଇଥିଲେ। ଯାହା ମାଧ୍ୟମରେ ଅଭାବୀ ପ୍ରତିଭାବାନ ପିଲାମାନଙ୍କ ପାଇଁ ପୁସ୍ତକ ଉପଲବ୍ଧ ହୋଇପାରିବ। କେତେକ ଶିକ୍ଷକ ଏବଂ ସାମାଜିକ କର୍ମୀ ଏକାଠି ଏହି ବୁକ ବ୍ୟାଙ୍କ ଆରମ୍ଭ କରିଥିଲେ। ଅଧିକାଂଶ ଶିକ୍ଷକ ଟ୍ରଷ୍ଟରେ ଅଛନ୍ତି। ଏହା ବ୍ୟତୀତ ଅନ୍ୟ ଲୋକମାନେ ମଧ୍ୟ ଏନେଇ ସହଯୋଗ କରିଥିଲେ। ଶିବପୁରୀ ରାସ୍ତାରେ ଅବସ୍ଥିତ ଶ୍ରୀ ଗୋଶାଳାରେ ବୁକ ବ୍ୟାଙ୍କର କାର୍ଯ୍ୟାଳୟ ପ୍ରତିଷ୍ଠା କରାଯାଇଛି।
ବୁକ ବ୍ୟାଙ୍କ ସଭାପତି ଗୁରୁଦୀପ ସାଇନି କହିଛନ୍ତି ବର୍ତ୍ତମାନ ପର୍ଯ୍ୟନ୍ତ ୭୦୦ ପିଲାଙ୍କୁ ମାଗଣା ପୁସ୍ତକ ବଣ୍ଟନ କରାଯାଇଛି। ବିଭିନ୍ନ ଶ୍ରେଣୀର ଛାତ୍ରୀଛାତ୍ରମାନଙ୍କୁ ପୁସ୍ତକ ଯୋଗାଇ ଦିଆଯାଉଛି। ବହି ଦେବା ପୂର୍ବରୁ ଛାତ୍ରୀଛାତ୍ରମାନଙ୍କୁ ଏକ ଫର୍ମ ପୂରଣ କରିବାକୁ ପଡ଼ିଥାଏ। ଯେଉଁଥିରେ ବହିଗୁଡ଼ିକୁ ଭଲ ସ୍ଥିତିରେ ରଖିବା ଏବଂ ପରୀକ୍ଷା ପରେ ଫେରସ୍ତ କରିବାକୁ କୁହାଯାଇଥାଏ। ଟ୍ରଷ୍ଟ ଦ୍ୱାରା ଆରମ୍ଭ ହୋଇଥିବା ଏହି ପଦକ୍ଷେପକୁ ସମାଜର ପ୍ରତ୍ୟେକ ବର୍ଗ ପ୍ରଶଂସା କରୁଛନ୍ତି । ଟ୍ରଷ୍ଟର ଉଦ୍ଦେଶ୍ୟ ହେଉଛି କୌଣସି ଆର୍ଥିକ ଦୃଷ୍ଟିରୁ ଦୁର୍ବଳ ଛାତ୍ରୀଛାତ୍ରଙ୍କୁ ପୁସ୍ତକ ଅଭାବରୁ ଅଧ୍ୟୟନ ବନ୍ଦ କରିିବାକୁ ଦିଆଯିବ ନାହିଁ।