ଦାରିଙ୍ଗବାଡ଼ି,୧୮ା୧୧(ଅରୁଣ ସାହୁ): ରାଜ୍ୟ ଓ କେନ୍ଦ୍ର ସରକାର ପ୍ରାଣୀଧନର ବିକାଶ ପାଇଁ ବିଶେଷକରି ଗୋ’ସୁରକ୍ଷା ତଥା ସୁସ୍ଥ ରଖିବା ଓ ସୁସ୍ଥ ଛୁଆ ଜନ୍ମ କରିବା ପାଇଁ ବିଭିନ୍ନ ପଦକ୍ଷେପ ନେଉଛନ୍ତି। ହେଲେ ତାହା ଗ୍ରାମାଞ୍ଚଳରେ ଚାଷୀମାନେ ସଠିକ୍ ସୂଚନା ନ ପାଇ ନିଜ ପ୍ରାଣୀଧନର ସୁରକ୍ଷା ପାଇଁ ସରକାରଙ୍କ ସୁବିଧା ପାଇବାରୁ ବଞ୍ଚିତ ହେଉଛନ୍ତି। ଏଭଳି ଘଟଣା ଦେଖିବାକୁ ମିଳିଛି କନ୍ଧମାଳ ଜିଲା ଦାରିଙ୍ଗବାଡ଼ି ଗୋଷ୍ଠୀ ପ୍ରାଣୀଧନ ଚିକିତ୍ସା ଅଧୀନରେ ଥିବା ସିମନବାଡ଼ି ପ୍ରାଣୀଧନର ସହାୟକ କେନ୍ଦ୍ରରେ। ସୋମବାର ସକାଳେ ଗୋ-ବନ୍ଧ୍ୟା ନିରାକାରଣ ପାଇଁ ପ୍ରାଣୀ ଚିକିତ୍ସା ଶିବିର ଅନୁଷ୍ଠିତ ହୋଇଥିଲା। ଯେଉଁଥିରେ କି ହାତ ଗଣତି ଗୋ-ପାଳକ ନିଜ ଗାଈଙ୍କୁୁ ନେଇ ଶିବିରରେ ପହଞ୍ଚିଥିଲେ। ରାଜ୍ୟ ସରକାରଙ୍କ ମତ୍ସ୍ୟ ଓ ପ୍ରାଣୀସମ୍ପଦ ବିକାଶ ବିଭାଗ ପକ୍ଷରୁ ଉକ୍ତ ଅଞ୍ଚଳରେ କୁକୁଡ଼ା ପାଳନଠାରୁ ଗାଈ, ଘୁଷୁରି, ଛେଳି ଆଦି ପାଳନ ଓ ତାଙ୍କର ବିକାଶ ପାଇଁ ପଦକ୍ଷେପ ନିଆଯିବା ବ୍ୟବସ୍ଥା ରହିଥିଲେ ମଧ୍ୟ ସହାୟକ କେନ୍ଦ୍ରଗୁଡିକ ନିୟମିତ ନ ଖୋଲିବା ଏବଂ ଶିବିରଗୁଡ଼ିକରେ ନିଜ ଗାଈକୁ ନେଇ ଉପସ୍ଥିତ ହେବା ପାଇଁ ପ୍ରବର୍ତ୍ତଇବା ଆଦି ଦେଖିବାକୁ ମିଳୁନି। ଶିବିର କେବଳ ଏକ ପ୍ରହସନ ବୋଲି ଚାଷୀମାନେ କହିଛନ୍ତି। ହାତ ଗଣତି ଚାଷୀ ଶିବିରକୁ ଆସି ସେଭଳି ସନ୍ତୁଷ୍ଟ ନ ଥିବା ଓ ଚିକିତ୍ସା କରୁଥିବା ଡାକ୍ତରମାନେ ସେମାନଙ୍କୁ ଆବଶ୍ୟକ ସଚେତନ ନ କରିବା ନେଇ ଅସନ୍ତୋଷ ହୋଇଥିବା ଦେଖିବାକୁ ମିଳିଛି।
ଏହି ଶିବିରକୁ ପରିଚାଳନା କରୁଥିବା ଭିଏସ୍ ବନ୍ଦିତା ମିଶ୍ରଙ୍କୁ ପଚରାଯିବାରୁ ସେ ଉଚ୍ଚ କର୍ତ୍ତୃପକ୍ଷଙ୍କ ପକ୍ଷରୁ କୌଣସି ମତାମତ ଦେବା ପାଇଁ ନିର୍ଦ୍ଦେଶ ନାହିଁ ବୋଲି କହିବା ସହ ସିମନବାଡ଼ି ଅଞ୍ଚଳରେ କେତେ ସଂଖ୍ୟାରେ ଗାଈ, ବଳଦ ଆଦି ରହିଛନ୍ତି ତାର ସୂଚନା ତାଙ୍କ ନିକଟରେ ନ ଥିବା କହିଥିଲେ।
ଶିବିରରେ ଅନ୍ୟମାନଙ୍କ ମଧ୍ୟରେ ପ୍ରାଣୀଧନ ଚିକିତ୍ସକ ଡାକ୍ତର ଜଗନ୍ନାଥ ଘଡ଼େଇ, ସିମନବାଡ଼ି ପ୍ରାଣୀଧନ ସହାୟକ ସ୍ବୟଂପ୍ରଜ୍ଞା ଦଳାଇ, ଭ୍ରମରବାଡ଼ି ଧୀରେନ ଦଳବେହେରା, ପ୍ରାଣୀମିତ୍ର ମିତାଞ୍ଜଳି ନାୟକ, ଶର୍ମିଲା ଦିଗାଲ ପ୍ରମୁଖ ଉପସ୍ଥିତ ଥିଲେ। ଦାରିଙ୍ଗବାଡ଼ି ବ୍ଲକ ଅଞ୍ଚଳରେ ସିମନବାଡ଼ିକୁ ମିଶାଇ ୪ଟି ଶିବିର ଅନୁଷ୍ଠିତ ହୋଇସାରିଛି। ବ୍ଲକ ଅଞ୍ଚଳର ତିଲୋରି ପଞ୍ଚାୟତ ସମେତ ଭ୍ରମରବାଡ଼ି,ଦନେକବାଡି, ସାଙ୍ଗିନିବାଡ଼ିରେ ଏହି ଶିବିର ହୋଇସାରିଥିବା ଜଣାପଡ଼ିଛି।
ସୂଚନାଯୋଗ୍ୟ, ପୂର୍ବରୁ କନ୍ଧମାଳ ଗସ୍ତରେ ବିଭାଗୀୟ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ ଆସିଥିବା ବେଳେ ଜିଲାରେ କିଭଳି ପ୍ରାଣୀଧନର ବିକାଶ ପାଇଁ ଜିଲାର ସମସ୍ତ ବ୍ଲକ ପ୍ରାଣୀଧନ ଚିକିତ୍ସା ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ସେହିପରି କନ୍ଧମାଳ ଜିଲାପାଳ ଅମ୍ରିତ ଋତୁରାଜ ମଧ୍ୟ ପ୍ରାଣୀଧନର ବିକାଶ ସହ ଜିଲାରେ ଅଧିକା କୁକୁଡ଼ା, ଛେଳି ପାଳନ ସହ ଗୋ-ସମ୍ପଦର ସୁରକ୍ଷା ପାଇଁ ପଦକ୍ଷେପ ନେଉଛନ୍ତି। କିନ୍ତୁ ଗାଁ, ପଞ୍ଚାୟତସ୍ତରରେ ତାହା ସଠିକ୍ ଚାଷୀମାନେ ଫାଇଦା ନେଇପାରୁ ନ ଥିବା ଅଭିଯୋଗ ହେଉଛି।