ନୂଆଦିଲ୍ଲୀ/ଭିଏନା,୪।୧ : ଅଷ୍ଟ୍ରିଆ ଗସ୍ତରେ ଭାରତୀୟ ବହିର୍ବ୍ୟାପାର ମନ୍ତ୍ରୀ ଏସ ଜୟଶଙ୍କର ୟୁରୋପୀୟ ଦେଶମାନଙ୍କୁ ପରାମର୍ଶ ଦେଇଛନ୍ତି। ଭିଏନାରେ ଏକ ସାକ୍ଷାତକାରରେ ସେ ୟୁରୋପକୁ ନୂତନ ବିଶ୍ୱ କ୍ରମାଙ୍କ, ୟୁକ୍ରେନ ଯୁଦ୍ଧ ଏବଂ ଚାଇନା ଆହ୍ବାନ ବିଷୟରେ କହିଛନ୍ତି। ଏହା ସହିତ କହିଛନ୍ତି ଯେ କମ୍ପିତ ବିଶ୍ୱ ବ୍ୟବସ୍ଥାକୁ ବୁଝିିବା ପାଇଁ ୟୁରୋପକୁ ଜାଗ୍ରତ କରିବାର ଆବଶ୍ୟକତା ରହିଛି। ଏଥି ପାଇଁ ଏକ ଓ୍ବେକ ଅପ୍ କଲ ଜରୁରୀ।
ଅଷ୍ଟ୍ରିଆର ଖବରକାଗଜ ଡାଏ ପ୍ରେସକୁ ଦେଇଥିବା ଏକ ସାକ୍ଷାତକାରରେ ଜୟଶଙ୍କର କହିଛନ୍ତି ଯେ ୟୁରୋପୀୟମାନଙ୍କୁ ବୁଝିବାକୁ ପଡିବ ଯେ ଜୀବନର କଠୋର ଦିଗକୁ ସବୁବେଳେ ଅନ୍ୟମାନଙ୍କ ଦ୍ୱାରା ଧ୍ୟାନ ରଖାଯାଇ ନ ଥାଏ। ଯଦି ବିଶ୍ୱ ଗୋଟିଏ ଶକ୍ତି ଦ୍ୱାରା ପ୍ରାଧାନ୍ୟ ବିସ୍ତାର କରେ ତେବେ କୌଣସି ଅଞ୍ଚଳ ସ୍ଥିର ରହିବ ନାହିଁ।
ସେ କହିଛନ୍ତି ଯେ ୟୁରୋପ କେବଳ ନିଜ ଅଞ୍ଚଳରେ ବିକାଶ କରିବାକୁ ଚାହୁଁଛି ଏବଂ ଅନ୍ତର୍ଜାତୀୟ ସମସ୍ୟାରୁ ଯଥାସମ୍ଭବ ଦୂରେଇ ରହିବାକୁ ଚାହୁଁଛି। ୟୁରୋପ ବାଣିଜ୍ୟ ଉପରେ ଧ୍ୟାନ ଦେଇଥିଲା, ବହୁପକ୍ଷୀୟତା ଉପରେ ଗୁରୁତ୍ୱାରୋପ କରିଥିଲା ଏବଂ ଜଳବାୟୁ ପରିବର୍ତ୍ତନ ଏବଂ ମାନବିକ ଅଧିକାର ଭଳି ପ୍ରସଙ୍ଗରେ ବିଶ୍ୱକୁ ନିଜ ଆଭିମୁଖ୍ୟରେ ଗଠନ କରିବା ପାଇଁ ଅର୍ଥନୈତିକ ଶକ୍ତିର ବ୍ୟବହାର କରିଥିଲା। ୟୁରୋପ ଜଟିଳ ସୁରକ୍ଷା ପ୍ରସଙ୍ଗଠାରୁ ସବୁବେଳେ ଦୂରରେ ରହୁଛି ବୋଲି ସେ କହିଛନ୍ତି।
