ବାରିପଦା ଅଫିସ୍, ୨୨।୬: ଏନଡିଏ ପକ୍ଷରୁ ଦ୍ରୌପଦୀ ମୁର୍ମୁଙ୍କୁ ରାଷ୍ଟ୍ରପତି ପ୍ରାର୍ଥୀ ଭାବେ ଘୋଷଣା କରାଯିବା ପରେ ସମଗ୍ର ମୟୂରଭଞ୍ଜ ଜିଲାରେ ଖୁସିର ଲହରୀ ଖେଳିଯାଇଛି। ଜିଲାର ବିଭିନ୍ନ ରାଜନୈତିକ ନେତା, ବୁଦ୍ଧିଜୀବୀ, ସାଧାରଣ ଜନତା ତାଙ୍କ ପ୍ରାର୍ଥତ୍ତ୍ୱକୁ ସ୍ବାଗତ ଜଣାଇଛନ୍ତି।
ଜଣେ ଆଦିବାସୀ ମହିଳା ପରିବାରକୁ ପଛରେ ପକାଇ ରାଷ୍ଟ୍ରୀୟ କାର୍ଯ୍ୟରେ ନିଜକୁ ଉତ୍ସର୍ଗ କରିଥିବାରୁ ଏନଡିଏ ପକ୍ଷରୁ ତାଙ୍କୁ ଯଥେଷ୍ଟ ସମ୍ମାନ ଦିଆଯାଇଛି। ଉଭୟ କେନ୍ଦ୍ର ଓ ରାଜ୍ୟ ସରକାର ମହିଳାଙ୍କୁ ସମ୍ମାନ ଦେଉଥିବା ବେଳେ ଜଣେ ଆଦିବାସୀ ମହିଳା ଦେଶର ସର୍ବୋଚ୍ଚ ସ୍ଥାନରେ ଅଭିଷିକ୍ତ ହେବାକୁ ଯାଉଥିବାରୁ ଜିଲାବାସୀଙ୍କ ପକ୍ଷରୁ ଶୁଭେଚ୍ଛା ଜଣାଉଛି।
– କୃଷ୍ଣାନନ୍ଦ ମହାନ୍ତି, ବିଜେଡି ନେତା
ତଥା ବାରିପଦା ପୌରାଧ୍ୟକ୍ଷ।
ଆମେ ଖୁସି ଅନୁଭବ କରୁଛୁ। ସେ ରାଷ୍ଟ୍ରପତି ହେଲେ ମୟୂରଭଞ୍ଜ ସମେତ ସମଗ୍ର ଓଡ଼ିଶାର ଉନ୍ନତି ହେବ ବୋଲି ଆଶା କରୁଛି।
– ଲକ୍ଷ୍ମଣ ମୁର୍ମୁ, ପୂର୍ବତନ କଂଗ୍ରେସ
ବିଧାୟକ, ରାଇରଙ୍ଗପୁର
ମୟୂରଭଞ୍ଜ ଜିଲା ପାଇଁ ଗର୍ବ ଓ ଗୌରବର ବିଷୟ। ଆଗାମୀ ଦିନରେ ଜିଲାର ବିକାଶ ସମେତ ରାଜ୍ୟର ଉନ୍ନତି ହେବ ବୋଲି ଆଶା ରଖୁଛି ।
– ହେମନ୍ତ ଦାସ, ଜିଲା କଂଗ୍ରେସ ସଭାପତି
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଦିବାସୀ ମହିଳାଙ୍କୁ ସମ୍ମାନ ଜଣାଇ ଯେଉଁ ନିଷ୍ପତ୍ତି ନେଇଛନ୍ତି ତାହା ସ୍ବାଗତଯୋଗ୍ୟ। ମୟୂରଭଞ୍ଜ ଜିଲାର ଜଣେ ମହିଳା ଦେଶର ସର୍ବୋଚ୍ଚ ପଦବୀ ମଣ୍ଡନ କରିବାକୁ ଯାଉଥିବା ଭଳି ଖୁସି ଖବର ଆଉ କ’ଣ ହୋଇପାରେ।
– କାନ୍ଦ୍ରା ସୋରେନ, ଜିଲା ଭାଜପା ସଭାପତି