ମୁମ୍ବାଇ,୨୫ା୧୦: କର୍ନାଟକର ଦେବଦୁର୍ଗରୁ ପୁଣେ ଯାଉଥିବା ଜଣେ ମହିଳା ଏକ ଚଳନ୍ତା ବସ୍ରେ ସନ୍ତାନ ପ୍ରସବ କରିଛନ୍ତି। ପ୍ରସବ ପରେ ମହିଳା ଏବଂ ତାଙ୍କ ନବଜାତକ ଶିଶୁକୁ ନୀରା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ଉଭୟ ମା’ ଏବଂ ଶିଶୁର ସ୍ବାସ୍ଥ୍ୟାବସ୍ଥା ଭଲ ଅଛି। ଏହି ଘଟଣାଟି ମହାରାଷ୍ଟ୍ରର ବାରାମତୀ ଜିଲାରେ ଘଟିଛି।
ପ୍ରତ୍ୟକ୍ଷଦର୍ଶୀଙ୍କ କହିବାନୁଯାୟୀ, ୨୦ ବର୍ଷୀୟା ଜ୍ୟୋତି ସୋମନାଥ ଚୌହାନ ନାମକ ଜଣ ମହିଳା ପୁଣେରୁ ଭୋସରୀରେ ତାଙ୍କ ସ୍ବାମୀଙ୍କ ସହ ରୁହନ୍ତି। କିଛିଦିନ ପୂର୍ବରୁ ସେ କର୍ନାଟକର ମୁରାମପୁର ତାଣ୍ଡା ଗାଁରେ ନିଜ ବାପଘରକୁ ସନ୍ତାନ ପ୍ରସବ ପାଇଁ ଯାଇଥିଲେ। ସେଠାରେ ସ୍ବାସ୍ଥ୍ୟ ପରୀକ୍ଷା କରାଇବା ପରେ ଡାକ୍ତର ସିଜରିଆନ ପାଇଁ ପରାମର୍ଶ ଦେଇଥିଲେ। ଏଥିପାଇଁ ତାଙ୍କ ପିତା ପୁଣେ ନେବାକୁ ଚିନ୍ତା କରିଥିଲେ। ଶନିବାର ରାତିରେ କର୍ନାଟକ ନିଗମ ବସ୍ରେ ପିତାଙ୍କ ସହ ଜ୍ୟୋତି ପୁଣେ ଯାଉଥିଲେ। ଏହି ସମୟରେ ବାରାମତୀ ନିକଟରେ ଜ୍ୟୋତିଙ୍କ ପ୍ରସବ ବେଦନା ହୋଇଥିଲା। ଏହି ବସ୍ରେ ଯାତ୍ରା କରୁଥିବା ଅନ୍ୟ ମହିଳାମାନେ ଜ୍ୟୋତିଙ୍କର ପ୍ରସବ କରାଇଥିଲେ। ପରେ ବସ୍ ଚାଳକ ସରକାରୀ ଆମ୍ବୁଲାନ୍ସକୁ ଫୋନ୍ କରିବାରୁ ଆମ୍ବୁଲାନ୍ସ ପହଞ୍ଚି ମା-ପୁଅଙ୍କୁ ତୁରନ୍ତ ନୀରା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ। ସେଠାରେ ଡାକ୍ତର ତାଙ୍କର ସ୍ବାସ୍ଥ୍ୟ ଯାଞ୍ଚ କରିଥିଲେ। ଉଭୟ ମା-ପୁଅ ସୁସ୍ଥ ଥିବା ଡାକ୍ତର କହିଛନ୍ତି।