ପାଟଣା,୮ା୧୨(ସ୍ବ.ପ୍ର.): କେନ୍ଦୁଝର ଜିଲା ପାଟଣା ବ୍ଲକ ଟାଙ୍ଗରପଡ଼ା ପଞ୍ଚାୟତ ଅଙ୍କୁରା ଗ୍ରାମରେ ଘଟିଛି ଅଭାବନୀୟ ଘଟଣା କ୍ରମରେ ବୁଧବାର ବିଳମ୍ବିତ ରାତିରେ ଘରେ ଶୋଇଥିବା ସମୟରେ ମଶାଧୂପରୁ ନିଆଁ ଲାଗି କିରୋସିନି ବୋତଲରେ ଲାଗିବା ପରେ ତଳେ ଶୋଇଥିବା ମହିଳାଙ୍କ ବିଛଣାରେ ନିଆଁ ଲାଗିବାରୁ ଗୁରୁତର ହୋଇଛନ୍ତି। ଗୁରୁତର ମହିଳା ଜଣକ ହେଉଛନ୍ତି ଉକ୍ତ ଗ୍ରାମର ଟୁକୁଲୁ ମୁଣ୍ଡାଙ୍କ ସ୍ତ୍ରୀ ସୁଲୋଚନା ମୁଣ୍ଡା।
ମିଳିଥିବା ସୂଚନାନୁଯାୟୀ, ସୁଲୋଚନା ଘରେ ତଳେ ବିଛଣା ପାରି ଶୋଇଥିବା ବେଳେ ଘର ଥାକରେ ମଶା କଏଲ ଲଗାଇଥିଲେ। ମଶାଧୂପ ନିଆଁ ସଂଯୋଗ ବଶତଃ ତଳେ ଥିବା କିରୋସିନି ବୋତଲକୁ ଧରି ସୁଲୋଚନାଙ୍କ ବିଛଣାକୁ ନିଆଁ ଲାଗିଥିଲା। ସୁଲୋଚନା ଅସହ୍ୟ ଯନ୍ତ୍ରଣାରେ ଚିତ୍କାର କରିବାରୁ ପଡ଼ୋଶୀ ଏବଂ ଘର ଲୋକ ଉଠି ପାଟଣା ଅଗ୍ନିଶମ ବାହିନୀଙ୍କୁ ଖବର ଦେଇଥିଲେ। ଘଟଣାସ୍ଥଳରେ ଅଗ୍ନିଶମ କର୍ମଚାରୀ ପହଞ୍ଚି ସୁଲୋଚନାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ଅବସ୍ଥା ଗୁରୁତର ହେବାରୁ ସୁଲୋଚନାଙ୍କୁ କେନ୍ଦୁଝର ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ସୁଲୋଚନାଙ୍କ ଶରୀରର ୮୦ ପ୍ରତିଶତ ପୋଡ଼ି ଯାଇଥିବା ପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଭାରପ୍ରାପ୍ତ ଚିକିତ୍ସାଧିକାରୀ ଡ. ଶୁଭେନ୍ଦୁ ସାଗର କୁମାର ନାଏକ ସୂଚନା ଦେଇଛନ୍ତି।