ଗଞ୍ଜାମ,୧୦ା୫(ଡି.ଏନ୍.ଏ.): ଗଞ୍ଜାମ ବ୍ଲକ ରମ୍ଭା ଥାନା ଅନ୍ତର୍ଗତ ଜହମି ଗ୍ରାମର ମହିଳାଙ୍କୁ ପଥର ଛେଚି ହତ୍ୟା ଘଟଣାର ପର୍ଦ୍ଧାଫାଶ କରିଛି ରମ୍ଭା ପୋଲିସ। ହତ୍ୟାକାରୀ ମୃତ ମହିଳାଙ୍କ ନିଜ ପୁତୁରା ସେହି ଗ୍ରାମର ମୁନା ନାହାକ (୨୩) ସେ ଏବେ ଜେଲରେ। ଘଟଣାସ୍ଥଳରୁ ମିଳିଥିବା ଇୟର ଫୋନ ଖୋଲିଥିଲା ହତ୍ୟାର ରହସ୍ୟ। ଅଭିଯୁକ୍ତଙ୍କୁ ପୋଲିସ ଗୁଡ଼େଇ ତୁଡ଼େଇ ପଚରାଉଚରା ପରେ ସେ ମାନିଥିଲା ବୋଲି ରମ୍ଭା ଥାନା ଆଇଆଇସି ପି ସ୍ବରୂପ କିଷାନ କହିଛନ୍ତି। ଦୀର୍ଘ ତିନି ଘଣ୍ଟା ପଚରା ଉଚରା ପରେ ଅଭିଯୁକ୍ତ ନିଜେ ପଥର ଛେଚି ହତ୍ୟା କରିଥିବା ପୋଲିସ ଆଗରେ ସ୍ବୀକାର କରିଥିଲେ। କାହିଁକି ଓ କ’ଣ ପାଇଁ ତାଙ୍କୁ ହତ୍ୟା କଲ ବୋଲି ପୋଲିସ ପଚାରିବାରୁ ସେହି ଅଞ୍ଚଳର ଜଣେ ଝିଅକୁ ପ୍ରେମ କରୁଥିଲା। ଏହାକୁ ନେଇ ମୃତ ମହିଳା ସବୁବେଳେ ମୁନାଙ୍କୁ ଦେଖେଇ ଶିଖେଇ କହୁଥିବା ଯୋଗୁ ମୁନା ଏଥିରେ ପୂର୍ବରୁ ରାଗ ରଖିଥିଲେ। ଏଥିସହ ମୁନାଙ୍କ ବିଧବା ମା’ଙ୍କୁ ନିଜ ଘରେ କାମ କରିବାକୁ ମୃତ ମହିଳା ଚାପ ପକାଉଥିଲେ ବୋଲି ଅଭିଯୁକ୍ତ ପୋଲିସକୁ କହିଥିଲେ। ଅନ୍ୟପଟେ ଅଭିଯୁକ୍ତଙ୍କ ବୟାନକୁ ଖଣ୍ଡନ କରୁଛନ୍ତି ମୃତ ମହିଳାଙ୍କ ପରିବାର। ବିଭିନ୍ନ ଗଣମାଧ୍ୟମରେ ଖବର ପ୍ରକାଶ ପରେ ଅଭିଯୁକ୍ତ ପୋଲିସକୁ କହିଥିବା କଥା ଭିତ୍ତିହୀନ। ତାଙ୍କର ଗରିବ ହେତୁ ମା’ ସବୁବେଳେ ତାଙ୍କ ପ୍ରତି ଅନୁକମ୍ପା ଦେଖାଇ ଆସୁଥିଲେ ବୋଲି ମୃତ ମହିଳାଙ୍କ ପୁଅ ଗଣମାଧ୍ୟମକୁ ସୂଚନା ଦେଇଛନ୍ତି। କେବେହେଲେ ନିଜ ଘର କାମ କରିବାକୁ ବାଧ୍ୟ କରୁ ନ ଥିଲେ ବୋଲି ସେ କହିଛନ୍ତି।
