ପୁନେ, ୯।୭- ଭାରତରେ କରୋନା ଭାଇରସଜନିତ ସ୍ଥିତି ଦିନକୁ ଦିନ ସଙ୍ଗୀନ ହେବାରେ ଲାଗିଛି। ଦେଶରେ ଦୈନିକ ଆକ୍ରାନ୍ତଙ୍କ ସଂଖ୍ୟା ମଧ୍ୟ କିଛିଦିନ ହେବ ୨୦ ହଜାରରୁ ଊର୍ଦ୍ଧ୍ୱ ରହୁଛି, ଯାହାକି ସରକାରଙ୍କ ପାଇଁ ଚିନ୍ତାର କାରଣ ପାଲଟିଛି। ତେବେ ଏଭଳି ଏକ ପରିସ୍ଥିତିରେ ପୁନେରେ ଜଣେ କରୋନା ଆକ୍ରାନ୍ତ ମହିଳା ହସ୍ପିଟାଲ ଝରକା ଡେଇଁ ଫେରାର ହୋଇଯାଇଥିବା ରିପୋର୍ଟ ପ୍ରକାଶ ପାଇଛି। ଏହି ଘଟଣା ପୁନେର ଏକ ମେଡିକାଲ କଲେଜରେ ଘଟିଛି। ଜୁଲାଇରେ ୩ରେ ଏଠାକୁ ଜଣେ ୪୫ ବର୍ଷୀୟା ମହିଳା କରୋନା ଆକ୍ରାନ୍ତ ହୋଇ ଚିକିତ୍ସିତ ହେବାକୁ ଆସିଥିଲେ। ସେ ହସ୍ପିଟାଲର ୨ୟ ମହଲାରେ ରହି ଚିକିତ୍ସିତ ହେଉଥିଲେ। କିନ୍ତୁ କୌଣସି କାରଣରୁ ମହିଳା ଜଣଙ୍କ ହସ୍ପିଟାଲରୁ ପଳାଇବାକୁ ନିଷ୍ପତ୍ତି ନେଇଥିଲେ। ଏହାପରେ ସେ ତଳ ମହଲାକୁ ଆସିଥିଲେ ମଧ୍ୟ କଡ଼ା ସିକ୍ୟୁରିଟି ଦେଖି ଫେରି ଯାଇଥିଲେ। ଏହାପରେ ପ୍ରଥମ ମହଲାକୁ ଯାଇ ଏକ ଝରକା ଡେଇଁ ଫେରାର ହୋଇଯାଇଥିଲେ। ହସ୍ପିଟାଲ କର୍ତ୍ତୃପକ୍ଷ ଏହା ଜାଣିପାରି ମହିଳାଙ୍କୁ ଖୋଜି ଥିଲେ ମଧ୍ୟ ତାଙ୍କର କୌଣସି ପତ୍ତା ମିଳି ନ ଥିଲା। ତେବେ ଆଶ୍ଚର୍ଯ୍ୟଜନକ ଭାବେ ୨ ଘଣ୍ଟା ପରେ ମହିଳାଜଣଙ୍କ ପୁଣିଥରେ ହସ୍ପିଟାଲକୁ ଫେରି ଆସିଥିବା ଜଣାପଡ଼ିଛି।
