ରାଉରକେଲା ଅଫିସ,୨୮ା୧୨: ରାଉରକେଲାରେ ପ୍ରଥମ ଥର ହକି ବିଶ୍ୱକପ୍ ଆୟୋଜନ ହେବାକୁ ଯାଉଥିବାରୁ ଦର୍ଶକଙ୍କ ମନରେ ନାହିଁ ନ ଥିବା ଉତ୍ସାହ ପରିଲକ୍ଷିତ ହୋଇଛି। ଝାରସୁଗୁଡା ଏୟାରପୋର୍ଟରୁ ବସ୍ ଯୋଗେ ଭାରତୀୟ ହକି ଦଳ ମଙ୍ଗଳବାର ସନ୍ଧ୍ୟା ୭ଟାରେ ରାଉରକେଲାରେ ପହଞ୍ଚିଥିଲା। ବସ୍ ବେଦବ୍ୟାସ ଛକ ହୋଇ ପାନପୋଷ ହକି ଛକ ରିଙ୍ଗ୍ରୋଡ ଦେଇ ହନୁମାନ ବାଟିକା ଛକ ରିଙ୍ଗ୍ରୋଡ ହୋଇ ବିପିୟୁଟି ପରିସରରେ ଥିବା ବିର୍ସାମୁଣ୍ଡା ଷ୍ଟାଡିୟମରେ ପହଞ୍ଚିଥିଲା ା ହକି ଖେଳାଳିଙ୍କୁ ସ୍ବାଗତ କରିବା ପାଇଁ ରାଉରକେଲା ପାନପୋଷ ଛକ, ହନୁମାନ ବାଟିକା ଛକ, ଛେଣ୍ଡ ଛକରେ ବହୁ କ୍ରୀଡାପ୍ରେମୀ ଭାରତୀୟ ଜାତୀୟ ପତାକା ହାତରେ ଧରି ଉପସ୍ଥିତ ଥିଲେ। ଖେଳାଳିମାନେ ଷ୍ଟାଡିୟମରେ ପହଞ୍ଚିବା ପରେ ହକି ଇଣ୍ଡିଆର ମ୍ୟାନେଜମେଣ୍ଟ ଟିମ୍ ତାଙ୍କୁ ସ୍ବାଗତ କରିଥିଲେ। ପରେ ସମସ୍ତ ଖେଳାଳିଙ୍କୁ ବିର୍ସାମୁଣ୍ଡା ଷ୍ଟାଡିୟମରେ ନିର୍ମାଣ ହୋଇଥିବା ଅତ୍ୟାଧୁନିକ ହୋଟେଲକୁ ପାଛୋଟି ନିଆଯାଇଥିଲା। ଖେଳାଳିଙ୍କୁ ଦେଖିବା ପାଇଁ ଷ୍ଟାଡିୟମ ବାହାରେ ବହୁ ହକି ପ୍ରେମୀ ଉପସ୍ଥିତ ଥିଲେ। ବିଶେଷ କରି ଭାରତୀୟ ଦଳର ଅଧିନାୟକ ହରମନପ୍ରୀତ ସିଂ ଓ ଉପଅଧିନାୟକ ଅମିତ ରୋହିଦାସଙ୍କୁ ବସ୍ରେ ଓହ୍ଲାଇବାବେଳେ ବହୁ କ୍ରୀଡାପ୍ରେମୀ ବେଷ୍ଟ ଅଫ ଲକ୍ କହି ଉତ୍ସାହିତ ପ୍ରକାଶ କରିଥିଲେ। ଭାରତୀୟ ଦଳରେ ସୁନ୍ଦରଗଡ ମାଟିର ବାଲିଶଙ୍କରା ବ୍ଲକ ସୋନାମରା ଗ୍ରାମର ପୁଅ ଅମିତ ରୋହିଦାସ ଓ କାଦୋବାହାଲ ଗ୍ରାମର ପୁଅ ନିଲମ ସଞ୍ଜୀପ ଖେସ ସାମିଲ ହୋଇଥିବାରୁ କ୍ରୀଡାପ୍ରେମୀ ଭଲ ଖେଳ ପ୍ରଦର୍ଶନ ନେଇ ଆଶା ରଖିଛନ୍ତି। ବିର୍ସାମୁଣ୍ଡା ଷ୍ଟାଡିୟମରେ ପହଞ୍ଚିବା ପରେ ଅମିତ ରୋହିଦାସ କହିଥିଲେ ଯେ ଭାଗ୍ୟରେ ଥିଲେ ନିଜ ମାଟିରେ ଖେଳିବାର ସୁଯୋଗ ମିଳେ ା ନିଜ ମାଟିରୁ ପ୍ରଥମ ଥର ପାଇଁ ବିଶ୍ୱକପ୍ ଖେଳିବା ସୁଯୋଗ ପାଇଥିବାରୁ ଆମେ ଗର୍ବ ଅନୁଭବ କରୁଛୁ ା ଜିଲାର କ୍ରୀଡାପ୍ରେମୀଙ୍କ ସମର୍ଥନ ଆମ ଦଳକୁ ନିଶ୍ଚିତ ମିଳିବ। ବିର୍ସାମୁଣ୍ଡା ଷ୍ଟାଡିୟମର ନୂଆ ଟର୍ଫରେ ନିଜ ମାଟିରେ ଖେଳିବାର ଅନୁଭୂତି ଆମକୁ ନିଶ୍ଚିତ ପ୍ରେରଣା ଦେବ ବୋଲି ଅମିତ ପ୍ରକାଶ କରିଥିଲେ।
