ଖୁଣ୍ଟା,୧୧।୨(ଡି.ଏନ.ଏ.)- ଉତ୍ତରାଖଣ୍ଡରେ ଘଟିଥିବା ହିମସ୍ଖଳନ ଜନିତ ବନ୍ୟାରେ ମୟୂରଭଞ୍ଜ ଜିଲା ଖୁଣ୍ଟା ବ୍ଲକ ବାଙ୍ଗରା ପଞ୍ଚାୟତ ଅନ୍ତର୍ଗତ ସାତପଉଟିଆ ଗ୍ରାମର ଜଣେ ଯୁବକ ନିଖୋଜ ଥିବା ସୂଚନା ମିଳିଛି। ସେ ହେଲେ ରବୀନ୍ଦ୍ର ନାଥ ହାଁସଦାଙ୍କ ପୁଅ ପର୍ଶୁରାମ (୪୧)। ଗତ ୭ ତାରିଖ ହିମସ୍ଖଳନ ପରଠାରୁ ପର୍ଶୁରାମ ଘରକୁ ଫୋନ କରି ନାହାନ୍ତି କିମ୍ବା ତାଙ୍କ ସହ ଯୋଗାଯୋଗ ସମ୍ଭବ ହେଉ ନ ଥିବା ପରିବାର ଲୋକେ କହିଛନ୍ତି। ଫଳରେ ଆତ୍ମୀୟ ସ୍ବଜନ ନାନା ଆଶା ଆଶଙ୍କା ମଧ୍ୟରେ ରହିଥିବା ବେଳେ ଦୁଃଖରେ ମ୍ରିୟମାଣ ହୋଇ ପଡ଼ିଛନ୍ତି। ତେବେ ପର୍ଶୁରାମଙ୍କ ବିଷୟରେ ସୂଚନା ସଂଗ୍ରହ ପାଇଁ ତାଙ୍କ ବାପା ଜିଲା ପ୍ରଶାସନଠାରେ ନିବେଦନ କରିଛନ୍ତି। ମାଟ୍ରିକ ପାସ୍ ପରେ ପର୍ଶୁରାମ ଆଇଟିଆଇ ଇଲେକ୍ଟ୍ରିସିଆନ କୋର୍ସ କରିଥିଲେ। ୩ ବର୍ଷ ହେଲା ସେ ଉତ୍ତରାଖଣ୍ଡର ଋଷି ଗଙ୍ଗା ନଦୀର ହାଇଡ୍ରୋ ଇଲେକ୍ଟ୍ରିକ ପାୱାର ପ୍ରୋଜେକ୍ଟ କର୍ପୋରେଶନରେ ଇଲେକ୍ଟ୍ରିସିଆନ ଭାବେ କାମ କରୁଥିଲେ। ପରିବାର ସହିତ ନିୟମିତ ବ୍ୟବଧାନରେ ଫୋନ ଯୋଗେ ସମ୍ପର୍କ ମଧ୍ୟ ରଖୁଥିଲେ। ପର୍ଶୁରାମ ବିବାହିତ ଓ ତାଙ୍କ ସ୍ତ୍ରୀ କୌଣସି କାରଣରୁ ଅନ୍ୟତ୍ର ରହୁଛନ୍ତି। ତାଙ୍କର ଏକ ୫ ବର୍ଷର ଶିଶୁପୁତ୍ର ବାପା ରବୀନ୍ଦ୍ରଙ୍କ ପାଖରେ ରହୁଛି। ରବୀନ୍ଦ୍ର ଜଣେ ନାମ ମାତ୍ର କୃଷକ ହୋଇଥିବା ବେଳେ ସ୍ତ୍ରୀ, ୩ ପୁଅ ଓ ଜଣେ ଝିଅକୁ ନେଇ ତାଙ୍କ ସଂସାର। ଝିଅର ବିବାହ ସରିଥିବା ବେଳେ ୩ ପୁଅଙ୍କ ମଧ୍ୟରେ ପର୍ଶୁରାମ ବଡ଼। ତେବେ ଆସନ୍ତା ୧୫ ତାରିଖରେ ପର୍ଶୁରାମ ଘରକୁ ଫେରିଥାନ୍ତେ ବୋଲି ତାଙ୍କ ସାନଭାଇ ରାଜେନ୍ଦ୍ର କହିଛନ୍ତି।
