ପାଟଣା,୧୩ା୬(ବୀରକିଶୋର ଦାଶ): ବେଳେବେଳେ ଆତ୍ମୀୟଙ୍କ ଅନ୍ତିମ ଦର୍ଶନ ବି ପରିବାର ଲୋକେ କରିପାରନ୍ତି ନାହିଁ। ମୃତଦେହ ଆସିବାରେ ଅର୍ଥ ବାଧକ ସାଜେ। ଜଣେ ଓଡ଼ିଆ ଯୁବକ ରୋଜଗାର ଆଶାରେ ବେଙ୍ଗାଲୁରୁ ଯାଇ ମୃତ୍ୟୁ ଘଟିବା ପରେ ଗାଁକୁ ମୃତଦେହ ଆସି ପାରିଲା ନାହିଁ।
ଏଭଳି ଅଭାବନୀୟ ଘଟଣା ଘଟିଛି କେନ୍ଦୁଝର ଜିଲା ପାଟଣା ବ୍ଲକ ବାଉଁଶୁଳି ପଞ୍ଚାୟତ ଦାଶରଥୀପୁରରେ। ଦାଶରଥୀପୁରର ରମାକାନ୍ତ ତନ୍ତୀଙ୍କ ପୁଅ ଟଙ୍କଧର(୩୬)ଙ୍କ ବେଙ୍ଗାଲୁରୁରେ ଗତ ରବିବାର ହସ୍ପିଟାଲ ନେବା ବାଟରେ ମୃତ୍ୟୁ ମୃତ୍ୟୁ ଘଟିଥିଲା। ତେବେ ଅର୍ଥ ଅଭାବ ଯୋଗୁ ଗାଁକୁ ମୃତଦେହ ଆସି ପାରି ନ ଥିବାରୁ ପରିବାର ଲୋକେ ଦୁଃଖରେ ଭାଙ୍ଗି ପଡ଼ିଛନ୍ତି। ଟଙ୍କଧର ରୋଜଗାର ଆଶାରେ ଦୁଇବର୍ଷ ତଳେ ବେଙ୍ଗାଲୁରୁର ତୁମୁକୁରଠାରେ ଏକ ଗ୍ରୀସ ଏଜେନ୍ସି ପକ୍ଷରୁ ସ୍କୋୟାର ଗାର୍ଡ ସିକ୍ୟୁରିଟି ସର୍ଭିସରେ ସିକ୍ୟୁରିଟି ଗାର୍ଡ ଭାବରେ କାର୍ଯ୍ୟ କରୁଥିଲେ। ଗତ ରବିବାର ହଠାତ୍ ସେ ଅସୁସ୍ଥ ଅନୁଭବ କରିବାରୁ ସାଙ୍ଗସାଥୀମାନେ ତାଙ୍କୁ ତୁମକୁର ସରକାରୀ ମେଡିକାଲକୁ ନେବା ବାଟରେ ତାଙ୍କର ମୃତ୍ୟୁ ଘଟିଥିଲା। ଏନେଇ ପରିବାର ଲୋକଙ୍କୁ ସ୍ଥାନୀୟ ପୋଲିସ ଖବର ଦେବା ପରେ ସାନ ଭାଇ ସୁବାସ ବେଙ୍ଗାଲୁରୁ ଯାଇ ସେଠାରେ ପହଞ୍ଚି ମୃତଦେହ ଚିହ୍ନଟ କରିବା ପରେ ପରିବାର ଲୋକଙ୍କ ଉପସ୍ଥିତିରେ ଟାଉନ ଥାନା ପୋଲିସ ମୃତଦେହ ବ୍ୟବଚ୍ଛେଦ କରିଥିଲା। ତେବେ ଅର୍ଥ ଅଭାବରୁ ମୃତଦେହ ଗାଁକୁ ଆଣିବା ପାଇଁ ପରିବାର ଲୋକେ ଅସମର୍ଥ ହେବାରୁ ସେଠାରେ ବୁଧବାର ମୃତଦେହ ସତ୍କାର କରାଯାଇଥିବା ସାନଭାଇ ସୁବାସ କହିଛନ୍ତି। ଟଙ୍କଧର ରୋଜଗାର ଆଶାରେ ବେଙ୍ଗାଲୁରୁ ଯାଇଥିବା ବେଳେ ତାଙ୍କ ମୃତ୍ୟୁ ପରେ ଅର୍ଥାଭାବ ଯୋଗୁ ମରଶରୀର ଗାଁକୁ ଆସି ପାରି ନ ଥିବାରୁ ପରିବାର ଲୋକଙ୍କ ସହ ବିଧବା ସ୍ତ୍ରୀ ଏବଂ ୭ ବର୍ଷର ପୁଅ ଦୁଃଖରେ ଭାଙ୍ଗି ପଡ଼ିଛନ୍ତି।
