ନୂଆଦିଲ୍ଲୀ,୨୬।୧୧: ଭାରତୀୟ ସମ୍ବିଧାନ ଅନୁସାରେ ୧୮ ବର୍ଷରୁ ଅଧିକ ବୟସ୍କ ଯୁବତୀ ନିଜ ପସନ୍ଦର ଯୁବକଙ୍କ ସହିତ ରହିବାକୁ ସ୍ବତନ୍ତ୍ର। ସେ ସାବାଳିକା ହୋଇଥିବାରୁ ଏହା ତାଙ୍କର ଗଣତାନ୍ତ୍ରିକ ଅଧିକାର ବୋଲି ଦିଲ୍ଲୀ ହାଇକୋର୍ଟ କହିଛନ୍ତି। ସେ ନିଜ ଇଛାରେ ଘର ଛାଡ଼ିବା ସହିତ ଅନ୍ୟ କାହା ସହିତ ରହିବାକୁ ଅବା ବିବାହ କରିପାରିବେ। ଏଥିରେ ଯୁବତୀଙ୍କ ପରିବାର ସଦସ୍ୟ କିମ୍ବା ଅନ୍ୟ କେହି ବାଧା ସୃଷ୍ଟି କରିବା ଆଇନ ଅନୁସାରେ ଅପରାଧ। ଏନେଇ ବାଧା ସୃଷ୍ଟିକାରୀଙ୍କ ବିରୋଧରେ ମାମଲା ଦାଏର କରାଯାଇ ପାରେ ବୋଲି ବିଚାରପତି ବିପିନ ସାଙ୍ଘି ଏବଂ ରଜନୀଶ୍ ଭଟ୍ଟନାଗରଙ୍କ ଦ୍ୱାରା ଗଠିତ ଖଣ୍ଡପୀଠ ରାୟ ଦେଇଛନ୍ତି। ୨୦ ବର୍ଷ ବୟସ୍କା ଜଣେ ଯୁବତୀ ନିଜ ପସନ୍ଦର ଜଣେ ଯୁବକଙ୍କୁ ବିବାହ କରି ତାଙ୍କ ସହିତ ବାସ କରୁଥିଲେ। ଏନେ ଯୁବତୀଙ୍କ ପରିବାର ପକ୍ଷରୁ ଏକ ଅପହରଣ ମାମଲା ସେପ୍ଟେମ୍ବର ୧୨ରେ ଦାଏର କରାଯାଇଥିଲା। ଏହାର ବିଚାର କରି କୋର୍ଟ ପୋଲିସକୁ ଯୁବତୀଙ୍କ ଅଭିଭାବକଙ୍କୁ ବୁଝାଶୁଝା କରିବାକୁ କହିଛନ୍ତି। ଝିଅ ଏବଂ ଜ୍ୱାଇଁଙ୍କୁ ଭୟଭୀତ ନ କରିବା ଲାଗି ସେମାନଙ୍କୁ ବୁଝାଇବା ଲାଗି କୋର୍ଟ ନିର୍ଦ୍ଦେଶ ଦେଇଛନ୍ତି। ଯୁବତୀଙ୍କୁ ସମ୍ପୃକ୍ତ ଯୁବକଙ୍କ ପାଖକୁ ଫେରି ଯିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି।
