ପୁରୁଷୋତ୍ତମପୁର,୧୦ା୬(ଡି.ଏନ୍.ଏ.): ଗଞ୍ଜାମ ଜିଲା ପୁରୁଷୋତ୍ତମପୁର ଥାନା ଅନ୍ତର୍ଗତ ଚିଙ୍ଗୁଡ଼ିଘାଇ ଗ୍ରାମରେ ଚୋର ସନ୍ଦେହରେ ଜଣେ ଯୁବକଙ୍କୁ ପିଟିପିଟି ହତ୍ୟା କରିବା ଘଟଣାରେ ମୁଖ୍ୟ ଅଭିଯୁକ୍ତଙ୍କୁ ସୁରଟରୁ ଗିରଫକରି ଶନିବାର କୋର୍ଟ ଚାଲାଣ କରିଛି ପୁରୁଷୋତ୍ତମପୁର ପୋଲିସ। ସେ ହେଲେ ବିଷ୍ଣୁ ଚରଣ ନାୟକ। ଏହି ଘଟଣାରେ ପୋଲିସ କେସ୍ ନଂ ୩୩୩/୨୩ ପ୍ରକାରେ ୭ ଜଣଙ୍କୁ ପୂର୍ବରୁ ଗିରଫ କରିଥିବା ବେଳେ ମୁଖ୍ୟ ଅଭିଯୁକ୍ତ ବିଷ୍ଣୁଚରଣ ନାୟକ ପୋଲିସ ଆଖିରେ ଧୂଳି ଦେଇ ଗୁଜରାଟର ସୁରଟ ଥାନା ଅଞ୍ଚଳର ମସକାନାଠାରେ ଆତ୍ମଗୋପନ କରିଥିଲେ। ଏହାକୁ ନେଇ ଏସ୍ଡିପିଓ ରଜନୀକାନ୍ତ ସାମଲଙ୍କ ତତ୍ତ୍ୱାବଧାନରେ ଏସ୍ଆଇ ଆଦିତ୍ୟ ନାରାୟଣ ପାତ୍ରଙ୍କ ସମେତ ୩ ଜଣିଆ ଏକ ସ୍ବତନ୍ତ୍ର ଟିମ୍ ସୁରଟ ଯାଇ ବିଷ୍ଣୁଙ୍କୁ ଗିରଫ କରି ଶନିବାର ପୁରୁଷୋତ୍ତମପୁର ଥାନାକୁ ଆଣିଥିଲେ। ଗତ ମାସ ୧୮ତାରିଖରେ ଚୋର ସନ୍ଦେହରେ ପୁରୀ ଜିଲା ଗଡିଶଗଦା ଥାନା ଅନ୍ତର୍ଗତ ବାଦୂରାଗଡ଼ ଗ୍ରାମର ବାହୁଡା ସାହୁ (୪୦)ଙ୍କୁ ଅତି ଅମାନୁଷିକ ଭାବେ ନିର୍ଯାତନା ଦେଇ ବିଦ୍ୟୁତ ଖୁଣ୍ଟରେ ବାନ୍ଧି ମାଡ଼ମାରି ବାହୁଡାଙ୍କୁ ହତ୍ୟା କରିଥିଲେ।
ସୂଚନାଯୋଗ୍ୟ, ଗତ ମାସ ୧୭ତାରିଖ ରାତିରେ ଚିଙ୍ଗୁଡିଘାଇ ଗ୍ରାମର କିଶୋର ନାୟକଙ୍କ ଘରବାରିପଟେ ଶବ୍ଦ ହୋଇଥିଲା। ଏହାଶୁଣି ଘରମାଲିକ ଉଠିଯାଇ ଦେଖିବା ବେଳେ ଜଣେ ଅପରିଚିତଙ୍କୁ ଦେଖିବାକୁ ପାଇଥିଲେ। ଚୋର ବୋଲି ଭାବି ପାଟିକରି ବାହାରକୁ ଯିବାବେଳେ ସେ ଘରମାଲିକ ଉପରକୁ ଇଟା ଖଣ୍ଡ ଓ ପାଖରେ ଥିବା ଏକ ଟିଣ ଫୋପାଡ଼ି ଥିଲେ ବାହୁଡା। ଏଥିରେ ଘରମାଲିକ କିଶୋର ନାୟକ ଆହାତ ହୋଇ ଚିତ୍କାର କରିଥିଲେ । ଏହା ଶୁଣି ଗ୍ରାମର କିଛି ଲୋକ ଉଠି ଆସିଥିବା ବେଳେ ସେ ଲୋକଙ୍କୁ ଦେଖି ଘଟଣାସ୍ଥଳରୁ ଦୌଡି ପଳାଇଥିଲେ। ଲୋକେ ଗୋଡାଇ ଗୋଡ଼ାଇ କାବୁ କରି ଆଣି ଗ୍ରାମ ନିକଟସ୍ଥ ଏକ ବିଦ୍ୟୁତ୍ ଖୁଣ୍ଟରେ ବାନ୍ଧି ମାଡମାରି ଥିଲେ। ଏହି ମାଡ଼ରେ ବାହୁଡାଙ୍କ ମୃତ୍ୟୁ ଘଟିଥିଲା।