ଭୁବନେଶ୍ୱର,୨୭।୮(ବ୍ୟୁରୋ): ଭୁବନେଶ୍ୱର ଡାକମଣ୍ଡଳ ପକ୍ଷରୁ ଦୁଇଦିନ ଧରି ଝାରପଡ଼ା ସ୍ବତନ୍ତ୍ର କାରାଗାରରେ ଆଧାର ପଞ୍ଜୀକରଣ ଓ ସଂଶୋଧନ କ୍ୟାମ୍ପ ଅନୁଷ୍ଠିତ ହୋଇଯାଇଛି। ବିଶେଷକରି ଅଧିକାଂଶ କଏଦୀଙ୍କ ଆଧାର ନମ୍ବର ନ ଥିବାରୁ ବା ଆଧାର ତଥ୍ୟ ଭୁଲ୍ ଥିବାରୁ ସେମାନେ କାରାଗାର ପରିସରରେ ସରକାରୀ ସୁବିଧା ପାଇବାରେ ଅସୁବିଧାର ସମ୍ମୁଖୀନ ହେଉଥିଲେ। ବ୍ୟାଙ୍କ କିମ୍ବା ଡାକ ଘରେ ଖାତା ଖୋଲିବା ପାଇଁ ଆଧାର ନମ୍ବରର ଆବଶ୍ୟକତାକୁ ଦୃଷ୍ଟିରେ ରଖି ଭୁବନେଶ୍ୱର ସ୍ବତନ୍ତ୍ର କାରାଗାର ସୁପରିଣ୍ଟେଣ୍ଡେଣ୍ଟ ସତ୍ୟପ୍ରକାଶ ସ୍ବାଇଁ ଭୁବନେଶ୍ୱର ଡାକମଣ୍ଡଳ ସହ ଯୋଗାଯୋଗ କରିଥିଲେ। ଡାକମଣ୍ଡଳର ବରିଷ୍ଠ ଅଧୀକ୍ଷକ ବସନ୍ତ କୁମାର ପଣ୍ଡା ଏହାକୁ ଗୁରୁତର ସହ ନେଇ ସହ ଅଧୀକ୍ଷକ ମୋନାଲିସା ଦାସଙ୍କୁ ଏହି ସ୍ବତନ୍ତ୍ର କାର୍ଯ୍ୟ ନିମନ୍ତେ ଦାୟିତ୍ୱ ଦେଇଥିଲେ। ଡାକମଣ୍ଡଳର ଦୀପକ କୁମାର ରଥ, ଶରତ କୁମାର ପରିଡ଼ା, ଅନନ୍ତ ନାରାୟଣ ସ୍ବାଇଁ, ଋତିକ ଲେଙ୍କାଙ୍କୁ ନେଇ ଏକ ସ୍ବତନ୍ତ୍ର ଟିମ୍ ଗଠନ କରାଯାଇଥିଲା। ଉକ୍ତ ଟିମ କାରାଗାର କର୍ତ୍ତୃପକ୍ଷଙ୍କ ସହ ଯୋଗାଯୋଗ କରି ସମ୍ପୂର୍ଣ୍ଣ ସୁରକ୍ଷା ବଳୟ ଭିତରେ କ୍ୟାମ୍ପ ଆୟୋଜନ କରିଥିଲେ। କାରାଗାର ଜେଲର ସନ୍ତୋଷିନୀ ଦାଶ ଓ ଶିକ୍ଷକ ଭାସ୍କର ବେହେରାଙ୍କ ତତ୍ତ୍ୱାବଧାନରେ ୨୫ଜଣ କଏଦୀଙ୍କ ଆଧାର ପଞ୍ଜୀକରଣ ଓ ସଂଶୋଧନ କରାଯାଇଥିଲା। ଆବଶ୍ୟକ କାଗଜପତ୍ର ଅଭାବରୁ ଆଉ କେତେଜଣ କଏଦୀଙ୍କ ଆଧାର ପଞ୍ଜୀକରଣ କରାଯାଇପାରିନାହିଁ। ଏପରି କୌଣସି ଅନୁଷ୍ଠାନରେ ୫୦ରୁ ଅଧିକ ବ୍ୟକ୍ତିଙ୍କର ଆଧାର ପଞ୍ଜୀକରଣ ଓ ସଂଶୋଧନର ଆବଶ୍ୟକତା ଥିଲେ ଡାକ ଅଧୀକ୍ଷକଙ୍କ କାର୍ଯ୍ୟାଳୟ ସହ ଯୋଗାଯୋଗ କରିବାକୁ ବରିଷ୍ଠ ଅଧୀକ୍ଷକ ପଣ୍ଡା ସୂଚନା ଦେଇଛନ୍ତି। ସୂଚନାଯୋଗ୍ୟ, ଭୁବନେଶ୍ୱରର ବଡ଼ ବଡ଼ ଡାକଘରେ ଜନସାଧାରଣଙ୍କ ପାଇଁ ଆଧାର ପଞ୍ଜୀକରଣ ଓ ସଂଶୋଧନ ବ୍ୟବସ୍ଥା ଉପଲବ୍ଧ କରାଯାଇଛି।