ନୂଆଦିଲ୍ଲୀ,୨୫ା୭: ଆଧାର ସହ ଭୋଟର ପରିଚୟପତ୍ରର ସଂଯୋଗ ପାଇଁ ଉଦ୍ଦିଷ୍ଟ ଆଇନକୁ ସୁପ୍ରିମକୋର୍ଟରେ କଂଗ୍ରେସ ପକ୍ଷରୁ ଚ୍ୟାଲେଞ୍ଜ କରାଯାଇଛି। ବିରୋଧୀ ଦଳର ଯୁକ୍ତି ହେଲା, ଆଧାର-ଭୋଟର କାର୍ଡ ସଂଯୋଗୀକରଣ ନେଇ ଅତି ତରବରିଆ ଭାବେ ବିନା କୌଣସି ବିତର୍କରେ ପାର୍ଲାମେଣ୍ଟରେ ଆଇନ ଗୃହୀତ କରାଯାଇଛି। ଏହାଦ୍ୱାରା ବହୁ ସଂଖ୍ୟକ ଭୋଟର ମତଦାନ ଅଧିକାରରୁ ବଞ୍ଚତ୍ତ ହେବେ। ଏହି ଆଇନକୁ ଅସାମ୍ବିଧାନିକ ତଥା ନାଗରିକଙ୍କ ପ୍ରିଭେସି (ବ୍ୟକ୍ତିଗତ ଅନ୍ତରଙ୍ଗ ତଥ୍ୟ) ଓ ସମାନତା ଅଧିକାର ଉଲ୍ଲଂଘନକାରୀ ଭାବେ ଅଭିହିତ କରି ରଦ୍ଦ ପାଇଁ କଂଗ୍ରେସ ନେତା ରଣଦୀପ ସୂର୍ଯ୍ୟଓ୍ବୋଲା ନିଜ ପିଟିଶନରେ ଦାବି କରିଛନ୍ତି। ସର୍ବୋଚ୍ଚ ଅଦାଲତ ସୋମବାର ଏହାର ଶୁଣାଣି କରିବେ।
ପ୍ରଥମେ ଆଧାର ସହ ନିର୍ବାଚନୀ ତଥ୍ୟ ସଂଯୋଗୀକରଣ ପ୍ରକଳ୍ପକୁ ନିର୍ବାଚନ କମିଶନ (ଇସି) ନିର୍ବାଚନୀ ସଂସ୍କାର ପ୍ରକ୍ରିୟାର ଏକ ଅଂଶବିଶେଷ ଭାବେ ଆରମ୍ଭ କରିଥିଲେ। ଭୋଟର ତାଲିକାରେ ଜାଲିଆତି ରୋକି ତ୍ରୁଟିମୁକ୍ତ କରିବା ଏବଂ ଜଣେ ଭୋଟର ବିଭିନ୍ନ ରାଜ୍ୟରେ ଯେଭଳି ମତଦାନ କରିପାରିବେନାହିଁ ତାହାକୁ ରୋକିବା ଏହାର ଉଦ୍ଦେଶ୍ୟ ବୋଲି ସେତେବେଳେ ଇସିଙ୍କ ପକ୍ଷରୁ କୁହାଯାଇଥିଲା। ପାର୍ଲାମେଣ୍ଟର ଶୀତ ଅଧିବେଶନ ବେଳେ ୨୦୨୧ ଡିସେମ୍ବର ୨୦ରେ କେନ୍ଦ୍ର ସରକାର ନିର୍ବାଚନ ଆଇନ (ସଂଶୋଧନ), ୨୦୨୧ ବିଲ୍କୁ ଲୋକ ସଭାରେ ଉପସ୍ଥାପନ କରିଥିଲେ।
ଆଇନମନ୍ତ୍ରୀ କିରେନ୍ ରିଜିଜୁଙ୍କ ପକ୍ଷରୁ ଆଗତ ଉକ୍ତ ବିଧେୟକକୁ ବିଜେଡି ସମେତ କଂଗ୍ରେସ, ଡିଏମ୍କେ, ଏନ୍ସିପି, ଟିଏମ୍ସି, ଓ୍ବାଇଏସ୍ଆର୍ସିପି, ବିଏସ୍ପି, ଶିବସେନା ପ୍ରମୁଖ ବିରୋଧୀ ଦଳଗୁଡ଼ିକ ବିରୋଧ କରିଥିଲେ। ତେବେ ରିଜିଜୁ ଏହାକୁ ନିର୍ବାଚନ ସଂସ୍କାର ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଦର୍ଶାଇ ଭୋଟର ପରିଚୟପତ୍ର ସହ ଆଧାର ବାଧ୍ୟତାମୂଳକ ନୁହେଁ ବୋଲି କହିଥିଲେ। ରାଜ୍ୟ ସଭାରେ ବିଲ୍ ଉପରେ ବିତର୍କ ବେଳେ ଟିଏମ୍ସି ସଦସ୍ୟ ଡେରେକ୍ ଓ’ବ୍ରାଏନ୍ ଅଧ୍ୟକ୍ଷଙ୍କ ଆଡ଼କୁ ରୁଲ୍ ବୁକ୍ ଫିଙ୍ଗି ଗୃହରୁ ନିଲମ୍ବିତ ହୋଇଥିଲେ।
ଉକ୍ତ ବିଲ୍କୁ ଧ୍ୱନିମତରେ ମାତ୍ର ୨୪ ମିନିଟ ମଧ୍ୟରେ ଉଭୟ ଗୃହରେ ଯେପରି ଭାବେ ଗୃହୀତ କରାଯାଇଥିଲା, ତାକୁ ନେଇ ସବୁ ବିରୋଧୀ ଦଳ ପ୍ରଶ୍ନ ଉଠାଇଥିଲେ। ଏନେଇ କଂଗ୍ରେସ ଏମ୍ପି ଶଶୀ ଥରୁର କହିଛନ୍ତି, ନାଗରିକତ୍ୱ ନୁହେଁ, ବରଂ ବାସିନ୍ଦା ପ୍ରମାଣପତ୍ର ଭାବେ ଆଧାର ଅଣାଯାଇଥିଲା। କିନ୍ତୁ ସରକାରଙ୍କ ଏହି ଆଇନ ଯୋଗୁ ଜଣେ ଅଣନାଗରିକ ମଧ୍ୟ ମତଦାନ ଅଧିକାର ପାଇପାରିବେ। ସୁପ୍ରିମକୋର୍ଟରେ ରଣଦୀପ ସୂର୍ଯ୍ୟଓ୍ବୋଲାଙ୍କ ପିଟିଶନର ଶୁଣାଣି ସୋମବାର କରାଯିବ। ଜଷ୍ଟିସ୍ ଡି.ଓ୍ବାଇ. ଚନ୍ଦ୍ରଚୂଡ଼ ଏବଂ ଏ.ଏସ୍. ବୋପାନ୍ନାଙ୍କ ଖଣ୍ଡପୀଠ ଏହାର ବିଚାର କରିବେ।