ନୂଆଦିଲ୍ଲୀ,୧୧ା୧୧:କେନ୍ଦ୍ର ସରକାର ଆଧାର ନିୟମାବଳୀରେ ସଂଶୋଧନ କରି ପ୍ରତି ୧୦ ବର୍ଷରେ ଥରେ ନାଗରିକମାନେ ସେମାନଙ୍କ ଆଧାର ତଥ୍ୟ ଅପ୍ଡେଟ୍ (ସଂଶୋଧନ) କରିବାକୁ ବାଧ୍ୟତାମୂଳକ କରିଛନ୍ତି। ଆଧାର ପଞ୍ଜୀକରଣ ତାରିଖଠାରୁ ୧୦ ବର୍ଷ ସମ୍ପୂର୍ଣ୍ଣ ହେବା ପରେ କାର୍ଡଧାରୀ ଆଧାରର ସମର୍ଥକ ଦସ୍ତାବିଜ୍ଗୁଡ଼ିକୁ ଅପ୍ଡେଟ୍ କରିବେ। ଏଥିପାଇଁ ଚିହ୍ନଟ ପ୍ରମାଣ (ପିଓଆଇ) ଏବଂ ଠିକଣା ପ୍ରମାଣ (ପିଓଏ) ଦସ୍ତାବିଜ୍ ଦାଖଲ କରିବାକୁ ହେବ। ଗତମାସରେ ଭାରତର ବିଶିଷ୍ଟ ପରିଚୟ କର୍ତ୍ତୃପକ୍ଷ (ୟୁଆଇଡିଏଆଇ) ନାଗରିକମାନଙ୍କୁ ଏଥିପାଇଁ ଅନୁରୋଧ କରିଥିଲେ। ତେବେ ସେତେବେଳେ ଆଧାର ଅପ୍ଡେଟ୍ ବାଧ୍ୟତାମୂଳକ ବୋଲି କୁହାଯାଇ ନ ଥିଲା। ଏବେ ତାହା ବାଧ୍ୟତାମୂଳକ ବୋଲି ସରକାର କହିଛନ୍ତି। ଆଧାର(ପଞ୍ଜୀକରଣ ଓ ଅପ୍ଡେଟ୍)(୧୦ମ ସଂଶୋଧନ) ନିୟମାବଳୀ, ୨୦୨୨ ନଭେମ୍ବର ୯ରୁ ଲାଗୁ ହୋଇଛି। ଉଭୟ ଅନ୍ଲାଇନ ଏବଂ ଅଫ୍ଲାଇନରେ ଆଧାର ଅପ୍ଡେଟ୍ କରାଯାଇପାରିବ।
ଅନ୍ଲାଇନରେ ଠିକଣା ସଂଶୋଧନ କରିବାକୁ ହେଲେ ଆଧାର ସେଲ୍ଫ-ସର୍ଭିସ ଅପ୍ଡେଟ୍ ପୋର୍ଟାଲକୁ ଯାଇ ‘ପ୍ରୋସିଡ୍ ଟୁ ଅପ୍ଡେଟ୍ ଆଡ୍ରେସ୍’ ଅପ୍ଶନରେ କ୍ଲିକ୍ କରିବାକୁ ହେବ। ଆଧାର ନମ୍ବର, ପଞ୍ଜୀକୃତ ମୋବାଇଲ ନମ୍ବର ଏବଂ ଓଟିପି ଦେଇ ଲଗ୍ ଇନ୍ କରିବାକୁ ହେବ। ବୈଧ ଠିକଣା ପ୍ରମାଣ ପାଇଁ ‘ପ୍ରୋସିଡ୍ ଟୁ ଅପ୍ଡେଟ୍ ଆଡ୍ରେସ୍’ରେ କ୍ଲିକ୍ କରି ୧୨ ଡିଜିଟ୍ ଆଧାର ନମ୍ବର ଏଣ୍ଟର କରିବେ ଓ ‘ସେଣ୍ଡ୍ ଓଟିପି’ରେ କ୍ଲିକ୍ କରିବେ। ଆଧାର ଆକାଉଣ୍ଟରେ ଓଟିିପି ଏଣ୍ଟର କରି ଲଗ୍ଇନ୍ କରିବେ। ଏହା ପରେ ଅପ୍ଡେଟ୍ ଆଡ୍ରେସ୍ ଭାୟା ଆଡ୍ରେସ୍ ପ୍ରୁଫ୍ ଅପ୍ସନକୁ ଯାଇ ନୂଆ ଠିକଣା ଏଣ୍ଟର କରିବେ। ଠିକଣା ପ୍ରମାଣ ଭାବେ ଦାଖଲ ହେବାକୁ ଥିବା କାଗଜାତର ପ୍ରକାର ସିଲେକ୍ଟ କରିବେ ଏବଂ ଏହାର ସ୍କାନ୍ ହୋଇଥିବା କପି ଅପ୍ଲୋଡ୍ କରିବେ। ଆଧାର ଅପ୍ଡେଟ୍ ଅନୁରୋଧ ଗ୍ରହଣ କରାଯିବ ଏବଂ ୧୪ ଡିଜିଟ୍ ଅପ୍ଡେଟ୍ ଅନୁରୋଧ ନମ୍ବର (ୟୁଆର୍ଏନ୍) ସୃଷ୍ଟି ହେବ।