ନୂଆଦିଲ୍ଲୀ,୧୨।୧: ଦକ୍ଷିଣ ଆଫ୍ରିକା ବିପକ୍ଷରେ କେପ୍ଟାଉନ୍ର ନ୍ୟୁଲାଣ୍ଡସ୍ ଷ୍ଟାଡିୟମରେ ଖେଳାଯାଉଥିବା ନିର୍ଣ୍ଣାୟକ ଟେଷ୍ଟରେ ଭାରତ ଦୁଇଟି ପରିବର୍ତ୍ତନ ସହ ଓହ୍ଲାଇଥିଲା। ଅଧିନାୟକ ବିରାଟ କୋହଲି ଆହତ ସମସ୍ୟାରୁ ସୁସ୍ଥ ହୋଇ ଫେରିଥିବା ବେଳେ ମହମ୍ମଦ ସିରାଜଙ୍କ ଅନୁପସ୍ଥିତିକୁ ନେଇ ଉମେଶ ଯାଦବଙ୍କୁ ସୁଯୋଗ ମିଳିଥିଲା। ତେବେ ପେସର ଇଶାନ୍ତ ଶର୍ମା ଥାଇ ଉମେଶଙ୍କୁ ଅଗ୍ରାଧିକାର ଦିଆଯିବା ନିଷ୍ପତ୍ତି ଅନେକଙ୍କୁ ଆଶ୍ଚର୍ଯ୍ୟ କରିଛି। ଏନେଇ ଦଳର ପରିଚାଳନା ନିଷ୍ପତ୍ତି ଉପରେ ପ୍ରତିକ୍ରିୟା ପ୍ରକାଶ କରି ପୂର୍ବତନ ଭାରତୀୟ ବ୍ୟାଟ୍ସମ୍ୟାନ୍ ତଥା ଲୋକପ୍ରିୟ ସମୀକ୍ଷକ ଆକାଶ ଚୋପ୍ରା କହିଛନ୍ତି, ଗତ କିଛି ବର୍ଷ ମଧ୍ୟରେ ଉମେଶ ଭଲ ପ୍ରଦର୍ଶନ କରିଛନ୍ତି। ହେଲେ ଇଶାନ୍ତ ତୁମର ଶ୍ରେଷ୍ଠ ୫ ବୋଲର ମଧ୍ୟରେ ନାହାନ୍ତି। ସେ ୧୦୦ରୁ ଅଧିକ ଟେଷ୍ଟ ମ୍ୟାଚ୍ ଖେଳିସାରିଛନ୍ତି। ହେଲେ ଭାରତ ଏକାଦଶରେ ସ୍ଥାନ ପାଇପାରୁନାହାନ୍ତି। ନିଜ କ୍ୟାରିୟରରେ ଏଭଳି ସମୟରେ ସେ ଅଛନ୍ତି ଯାହା ଭଲ ସଙ୍କେତ ନୁହେଁ।
