ବମ୍ବେ: କିରଣଙ୍କୁ ଛାଡ଼ପତ୍ର ଦେବା ପରେ ଏବେ ତୃତୀୟ ବିବାହ କରିବାକୁ ଯାଉଛନ୍ତି ଅଭିନେତା ଆମିର ଖାନ୍। ଏପରି କିଛି ଚର୍ଚ୍ଚା ଏବେ ବଲିଉଡ୍ ଗଳିକନ୍ଦିରେ ହେବାକୁ ଲାଗିଛି। ନିଜର ଆଗାମୀ ଫିଲ୍ମ ‘ଲାଲ୍ ସିଂହ ଚଡ୍ଢା’ର ରିଲିଜ ପରେ ବିବାହ କରିବାକୁ ନେଇ ଘୋଷଣା କରିପାରନ୍ତି। ଫିଲ୍ମରୁ କାହା ଧ୍ୟାନ ହଟୁ ସେ ଚାହୁଁ ନାହାନ୍ତି। ବିବାଦ ଉପୁଜିବା ଭୟରେ ସେ ଚୁପ୍ ରହିଛନ୍ତି। ଏପରିକି ଆମିର ଗତ ଫିଲ୍ମର କୌଣସି ନାୟିକାଙ୍କୁ ବିବାହ କରିପାରନ୍ତି ବୋଲି କୁହାଯାଉଛି।
ନିକଟରେ ଆମିର କିରଣଙ୍କ ଠାରୁ ଛାଡ଼ପତ୍ର ନେଉଥିବା କହି ସମସ୍ତଙ୍କୁ ଚମକାଇ ଥିଲେ। ପୂର୍ବରୁ ସେ ପ୍ରଥମ ସ୍ତ୍ରୀ ରିନା ଦତ୍ତାଙ୍କଠାରୁ ଅଲଗା ହୋଇଥିଲେ। ଉଭୟଙ୍କ ଦୁଇଟି ସନ୍ତାନ ଇରା ଏବଂ ଜୁନୈଦ ରହିଛି। ପରେ କିରଣଙ୍କୁ ବିବାହରୁ ଆମିରଙ୍କ ଏକ ପୁଅ ରହିଛି। ଏବେ ସେ ତୃତୀୟ ବିବାହ କରିବାକୁ ଯାଉଥିବା ଖବରକୁ ନେଇ ସୋସିଆଲ ମିଡିଆରେ ପ୍ରତିକ୍ରିୟା ପ୍ରକାଶ ପାଉଛି। ଆଗାମୀ ଦିନରେ ଏହା କେତେ ସତ କେତେ ମିଛ ତାହା ଜଣାପଡ଼ିବ।
