ମୁମ୍ବାଇ: ବଲିଉଡ୍ ଅଭିନେତା ଆମିର ଖାଁ ଏବେ ତାଙ୍କ ଫିଲ୍ମ ‘ଲାଲ ସିଂ ଚଢା’କୁ ନେଇ ଖୁବ ଚର୍ଚ୍ଚାରେ । ଏବେ ସେ ଫିଲ୍ମର ଖୁବ୍ ପ୍ରମୋଶନ କରୁଥିବା ଦେଖାଯାଉଛି । ଅଗଷ୍ଟ ୧୧ରେ ଫିଲ୍ମଟି ରିଲିଜ୍ ହେବ । ଫିଲ୍ମଟି ରିଲିଜ୍ ହେବା ପୂର୍ବରୁ କିନ୍ତୁ ବିବାଦରେ ଫସିଯାଇଛି । ସୋସିଆଲ ମିଡିଆରେ ‘ଲାଲ ସିଂ ଚଢା’ବୁ ବୟକଟ କରିବାକୁ ଦାବି କରାଯାଉଛି । କିଛିଦିନ ହେବ ସୋସିଆଲ ମିଡିଆରେ ବୟକଟ ଲାଲ ସିଂ ଚଢା ଟ୍ରେଣ୍ଡ କରୁଛି । ଏବେ ଏହାକୁ ନେଇ ଆମିର ମୁହଁ ଖୋଲିଛନ୍ତି ।
ନୂଆଦିଲ୍ଲୀରେ ଗଣମାଧ୍ୟମ ସହ କଥା ହୋଇ ଆମିର କହିଛନ୍ତି, ମୁଁ କାହାକୁ ଆଘାତ ଦେବାକୁ ଚାହୁଁନାହିଁ । ହେଲେ ମୁଁ ଯଦି କାହାକୁ ଆଘାତ ଦେଇଛି ତେବେ ମୁଁ ସେଥିପାଇଁ ଦୁଃଖିତ । ଯେଉଁମାନେ ଫିଲ୍ମ ଦେଖିବାକୁ ଚାହୁଁ ନାହାନ୍ତି ମୁଁ ସେମାନଙ୍କ କଥାକୁ ସମ୍ମାନ ଦେଉଛି ।
ଆମିର ଆହୁରି ମଧ୍ୟ କହିଛନ୍ତି, ଅଧିକରୁ ଅଧିକ ଦର୍ଶକ ଫିଲ୍ମ ଦେଖନ୍ତୁ । ଆମେ ବହୁତ କଷ୍ଟ କରି ଫିଲ୍ମ ତିଆରି କରୁଛୁ । ଫିଲ୍ମରେ କେବଳ ମୁଁ ନାହିଁ, ଫିଲ୍ମର ନିର୍ମାଣ ପାଇଁ ଶହ ଶହ ଲୋକ ପରିଶ୍ରମ କରିଥାଆନ୍ତି । ଆଶା କରୁଛି ଦର୍ଶକେ ଏହାକୁ ପସନ୍ଦ କରିବେ ।
ସୂଚନାଯୋଗ୍ୟ, ଲାଲ ସିଂ ଚଢା ହଲିଉଡ ଫିଲ୍ମର ରିମେକ । ଏହି ଫିଲ୍ମ ମାଧ୍ୟମରେ ବେଶ କିଛି ବର୍ଷପରେ ଆମିର ବଡ ପରଦାକୁ ଫେରୁଛନ୍ତି । ଲାଲ ସିଂ ଚଢାରେ ଆମିରଙ୍କ ସହ କରିନା କପୁର, ମୋନା ସିଂ ଓ ନାଗା ଚୈତନ୍ୟ ନଜର ଆସିବେ । ଅଦୈତ ଚନ୍ଦନ ଏହାର ନିର୍ଦ୍ଦେଶନା ଦେଇଛନ୍ତି ।