ନୂଆଦିଲ୍ଲୀ,୧୪।୧୨(ପି.ଟି.): ବରିଷ୍ଠ ନେତା ତଥା ରାଜ୍ୟ ସଭା ସଦସ୍ୟ ସନ୍ଦିପ ପାଠକଙ୍କୁ ଆମ୍ ଆଦ୍ମୀ ପାର୍ଟି (ଏଏପି) ଏହାର ରାଷ୍ଟ୍ରୀୟ ସାଧାରଣ ସମ୍ପାଦକ (ସଂଗଠନ) ଭାବେ ନିଯୁକ୍ତି ଦେଇଛି। ପାଠକ ପଞ୍ଜାବ ଏବଂ ଗୁଜରାଟ ପାଇଁ ଏଏପିର ନିର୍ବାଚନ ପ୍ରଭାରୀ ଭାବେ କାର୍ଯ୍ୟ କରିଥିଲେ। ପଞ୍ଜାବରେ ଏହି ଦଳ ବିଜୟୀ ହୋଇ ସରକାର ଗଢ଼ିଥିବାରେ ସଫଳ ହୋଇଥିଲା। ତେବେ ଗୁଜରାଟରେ ସଦ୍ୟ ସମାପ୍ତ ନିର୍ବାଚନରେ ଏଏପିକୁ ମାତ୍ର ୫ଟି ଆସନ ମିଳିଥିଲା। ଗୁଜରାଟରେ ଦଳ ଅଧିକ ଆସନ ପାଇ ନ ଥିଲେ ମଧ୍ୟ ଆମକୁ ଜାତୀୟ ଦଳ ମାନ୍ୟତା ପାଇବାରେ ସହାୟକ ହୋଇପାରିଛି ବୋଲି ଏଏପି ନେତା ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ କହିଥିଲେ। ପାଠକ ଏଏପି ରାଜନୈତିକ ବ୍ୟାପାର କମିଟିର ସ୍ଥାୟୀ ନିମନ୍ତ୍ରିତ ସଦସ୍ୟ ରହିବେ ବୋଲି ଦଳ ପକ୍ଷରୁ କୁହାଯାଇଛି। ୨୦୨୪ ସାଧାରଣ ନିର୍ବାଚନକୁ ଆଖି ଆଗରେ ରଖି ପାଠକଙ୍କୁ ସାଧାରଣ ସମ୍ପାଦକ ନିଯୁକ୍ତ କରାଯାଇଛି।