ଶିମ୍ଲା,୨୦।୧୦: ହିମାଚଳ ପ୍ରଦେଶ ବିଧାନସଭା ନିର୍ବାଚନ ପାଇଁ ଆମ ଆଦମୀ ପାର୍ଟି (ଏଏପି) ଗୁରୁବାର ଆଉ ୧୦ଜଣ ପ୍ରାର୍ଥୀଙ୍କ ତାଲିକା ପ୍ରକାଶ କରିଛି। ଏହାକୁ ମିଶାଇ ଏଏପି ସମସ୍ତ ୬୮ ବିଧାନସଭା ଆସନ ପାଇଁ ପ୍ରାର୍ଥୀ ଘୋଷଣା କରିସାରିଛି। ବୁଧବାର ବିଳମ୍ବିତ ରାତିରେ ଏଏପି ୫୪ଟି ଆସନ ପାଇଁ ପ୍ରାର୍ଥୀ ଘୋଷଣା କରିଥିଲା। ତେବେ ଗୁରୁବାର ଏଏପିର ପ୍ରଦେଶ ଅଧ୍ୟକ୍ଷ ସୁରଜିତ ସିଂ ଠାକୁର ଏବଂ ଦଳର ପ୍ରଭାରୀ ହରଜତ ସିଂ ବେନ୍ସ ଏହି ତାଲିକା ପ୍ରକାଶ କରିଛନ୍ତି। ଦଳ ୪ଜଣ ମହିଳା ପ୍ରାର୍ଥୀଙ୍କୁ ଟିକେଟ ଦେଇଛି। ଏତଦ୍ ବ୍ୟତୀତ ସାଧାରଣ ଲୋକଙ୍କୁ ମଧ୍ୟ ଏଏପି ଟିକେଟ ଦେଇଥିବା ଜଣାପଡ଼ିଛି। କିଏ ଦୋକାନ ଦେଇଛି ତ କିଏ ଛୋଟ ବ୍ୟବସାୟ କରିଛି। ପୂର୍ବରୁ ପ୍ରକାଶିତ ହୋଇଥିବା ପ୍ରଥମ ତାଲିକାରେ ଦଳ ରାଜନୀତିରେ ଭଲ ପ୍ରଦର୍ଶନ କରିଥିବା ବିଧାୟକଙ୍କୁ ପ୍ରାର୍ଥୀ କରିଥିଲା। ଭାଜପା ସରକାରରେ ମନ୍ତ୍ରୀ ତଥା ଏମ୍ପି ଥିବା ଡକ୍ଟର ରାଜନ ସୁଶାନ୍ତ ଚଳିତ ଥର ଫତେହପୁରରୁ ଏଏପି ଟିକେଟରେ ପ୍ରତିଦ୍ୱନ୍ଦ୍ୱିତା କରୁଛନ୍ତି। ଡକ୍ଟର ସୁଶାନ୍ତ ଭାଜପାରୁ ୪ଥର ବିଧାୟକ ରହିସାରିଛନ୍ତି।