ନୂଆଦିଲ୍ଲୀ,୧୬।୧୦ : ଦିଲ୍ଲୀ ସରକାରଙ୍କ ଏକ୍ସାଇଜ ପଲିସି କୁ ନେଇ ସୋମବାର ପଚରାଉଚରା ପାଇଁ କେନ୍ଦ୍ରୀୟ ଅନୁସନ୍ଧାନ ବ୍ୟୁରୋ (ସିବିଆଇ) ଉପମୁଖ୍ୟମନ୍ତ୍ରୀ ମନୀଷ ସିସୋଡିଆଙ୍କୁ ଡକାଇଛି। ତେବେ ଏନେଇ ଆମ ଆଦମୀ ପାର୍ଟି(ଏଏପି) ଦାବି କରିଛି ଯେ ସିବିଆଇ ସୋମବାର ମନୀଷ ସିସୋଡିଆଙ୍କୁ ଗିରଫ କରିବ।
ଏକ୍ସାଇଜ ନୀତି ପ୍ରଣୟନ ତଥା କାର୍ଯ୍ୟକାରୀ କରିବାରେ ଦୁର୍ନୀତି ଅଭିଯୋଗରେ ମନୀଷ ସିସୋଡିଆଙ୍କୁ ପଚରାଉଚରା ପାଇଁ ଡକାଯାଇଛି। ଦିଲ୍ଲୀ ସରକାର ବର୍ତ୍ତମାନ ଏହି ନୀତି ପ୍ରତ୍ୟାହାର କରି ନେଇଛନ୍ତି।
ଆମ ଆଦମୀ ପାର୍ଟି ମୁଖପାତ୍ର ସୌରଭ ଭରଦ୍ୱାଜ ରବିବାର କହିଛନ୍ତି ମନୀଷ ସିସୋଡିଆଙ୍କୁ ଆସନ୍ତାକାଲି ସିବିଆଇ ଡକାଇ ତାଙ୍କୁ ଗିରଫ କରିବ। କୁହାଯାଉଛି ଦଶ ହଜାର କୋଟିର ଏକ ଦୁର୍ନୀତି ଘଟିଛି। ବର୍ତ୍ତମାନ ପର୍ଯ୍ୟନ୍ତ ସିବିଆଇ ଏବଂ ଇଡି ୫୦୦ ସ୍ଥାନରେ ଚଢ଼ାଉ କରିଛନ୍ତି। ସିବିଆଇ ମନୀଷ ସିସୋଡିଆଙ୍କ ଘରେ ୧୪ ଘଣ୍ଟା ରହିଥିଲା। ମାତ୍ର କୌଣସି ସ୍ଥାନରୁ କିଛି ମିଳିଲା ନାହିଁ। ଏହା ଗୁଜରାଟ ନିବ;ାଚନ ସହ ଜଡିତ। ରାଜ୍ୟରେ ଭାଜପା ଏବଂ ଏଏପି ମଧ୍ୟରେ ସିଧାସଳଖ ପ୍ରତିଦ୍ୱନ୍ଦ୍ୱିତା ହେଉଛି। ତେଣୁ ଏଏପିକୁ ଭୟ କରି ଭାଜପା ଏଭଳି କରୁଥିବା ସୌରଭ ଅଭିଯୋଗ କରିଛନ୍ତି।
ମନୀଷ ସିସୋଡିଆଙ୍କୁ ଗିରଫ କରାଗଲେ ଏହା ଏଏପିକୁ ଅଧିକ ଶକ୍ତିଶାଳୀ କରିବ। ପୂର୍ବରୁ ମଧ୍ୟ ଆମର ନେତାମାନଙ୍କୁ ଡକାଯାଇଥିଲା ଏବଂ ସମାନ ନୋଟିସ ଦେଇ ଗିରଫ କରାଯାଇଥିଲା। ତେଣୁ ଆମେ ଅନୁମାନ କରୁଛୁ ସିସୋଡିଆଙ୍କୁ ମଧ୍ୟ ଗିରଫ କରାଯିବ।
ଭରଦ୍ବାଜ କହିଛନ୍ତି, ଧ୍ଯଦି ଆମେ ଭୟଭୀତ ହୋଇଥାନ୍ତୂ, ତେବେ ଆମେ ଲୁଚି ରହିଥାନ୍ତୁ । ଯେତେ ଅଧିକ ଗିରଫ ହେବ, ଗୁଜରାଟରେ ଆମର ଗ୍ରାଫ ସେତିକି ବୃଦ୍ଧି ପାଇବ। ଭାଜପାର ଅତ୍ୟାଚାର ବୃଦ୍ଧି ଯୋଗୁ ଆମର ଗ୍ରାଫ ବୃଦ୍ଧି ପାଇବ। ସ୍ବାଧୀନତା ସଂଗ୍ରାମ ପାଇଁ ଯେପରି ବଳିଦାନ ଦିଆଯାଇଥିଲା, ଆଜି ମଧ୍ୟ ସମାନ ପ୍ରକାରର ବଳିଦାନ ଆବଶ୍ୟକ ଏବଂ ଆମେ ଏହି ବଳିଦାନ ଲାଗି ପଛଘୁଞ୍ଚା ଦେବୁ ନାହିଁ।