ନୂଆଦିଲ୍ଲୀ,୧।୮ : ଦିଲ୍ଲୀ ସେବା ବିଲ୍ ନେଇ ଶାସକ ଦଳ ଏବଂ ବିରୋଧୀ ଦଳ ମଧ୍ୟରେ ବିବାଦ ଦେଖାଦେଇଛି। ମଙ୍ଗଳବାର ଲୋକସଭାରେ ଏହାର ଉପସ୍ଥାପନା ସମୟରେ ଅନେକ ହଟ୍ଟଭୋଳ ହୋଇଛି। କେନ୍ଦ୍ର ବହିର୍ବ୍ୟାପାର ରାଷ୍ଟ୍ରମନ୍ତ୍ରୀ ମନ୍ତ୍ରୀ ତଥା ଦିଲ୍ଲୀର ଲୋକସଭା ଏମପି ମୀନାକ୍ଷୀ ଲେଖି ଦିଲ୍ଲୀ ସେବା ବିଲ ଉପରେ କହିଛନ୍ତି ଭାରତ ସରକାରଙ୍କର ଏହି ଆଇନ ତିଆରି କରିବାର ଅଧିକାର ଅଛି। କାରଣ ଭାରତ ଏକ ସଂଘୀୟ ଦେଶ ଏବଂ ଏହାର ପ୍ରାଥମିକତାକୁ କେହି ଚ୍ୟାଲେଞ୍ଜ କରିପାରିବେ ନାହିଁ। ଯେତେବେଳେ ଏହି ମାମଲା ସୁପ୍ରିମକୋର୍ଟରେ ପହଞ୍ଚିଲା ସେତେବେଳେ କୋର୍ଟ କହିଥିଲେ ନିୟମ, ଆଇନ ଏବଂ ବିଲ ଉପରେ ଆମେ ନୀରବ ରହିବା ଆବଶ୍ୟକ। କେନ୍ଦ୍ର ଚାହିଁଲେ ନିୟମ ପ୍ରସ୍ତୁତ କରିପାରିବ। ସେହି ଦୃଷ୍ଟିକୋଣକୁ ଗୁରୁତ୍ୱାରୋପ କରି ଆମେ ଏହି ବିଲ ଆଣିଛୁ।
ସୁପ୍ରିମକୋର୍ଟଙ୍କ ନିଷ୍ପତ୍ତିର ଆଠ ଦିନ ମଧ୍ୟରେ ଏହି ବିଲ ଅଣାଯାଇଛି। ଆମେ କହିବୁ ସୁପ୍ରିମକୋର୍ଟଙ୍କ ରାୟ ଆସିବା ମାତ୍ରେ ଯେଉଁ ଅଧିକାରୀମାନେ ଦୁର୍ନୀତିଗ୍ରସ୍ତ ମନ୍ତ୍ରୀଙ୍କ ବିରୋଧରେ ଅନୁସନ୍ଧାନ କରୁଥିଲେ ଏଏପି ସରକାର ସେମାନଙ୍କୁ ଟ୍ରାନ୍ସଫର କରିବା ଆରମ୍ଭ କଲେ। ସେମାନଙ୍କୁ ଧମକ ଦେଲେ। ମୁଖ୍ୟ ଶାସନ ସଚିବଙ୍କୁ ମାଡ ମାରିଲେ।
ଏଏପି ରୋଗ ସୃଷ୍ଟି କରିଛି, ଏହାର ଚିକିତ୍ସା ଆମ ହାତରେ ଅଛି । ଏହି ପ୍ରକାର ଗୁଣ୍ଡାଗର୍ଦ୍ଦି ଆଉ ଚଳିବ ନାହିଁ। ଦିଲ୍ଲୀ ହେଉଛି ଭାରତର ରାଜଧାନୀ, ଏହା ଉପରେ ସମଗ୍ର ଦେଶର ଅଧିକାର ଅଛି। ଆଗକୁ ଜି-୨୦ ଶିଖର ସମ୍ମିଳନୀ ହେବାର ଅଛି । ତେଣୁ ଆମେ ଏଏପିର ରୋଗର ଚିକିତ୍ସା କରିବା ଜରୁରୀ।
ଦିଲ୍ଲୀକୁ ନେଇ ଲୋକସଭାରେ ଉପସ୍ଥାପିତ ହୋଇଥିବା ବିଲ ଉପରେ ଦିଲ୍ଲୀର ଆଉ ଜଣେ ଭାଜପା ଏମପି ରମେଶ ବିଧୁଡ଼ି କହିଛନ୍ତି ବିରୋଧ କରୁଥିବା ଲୋକମାନେ ଆଦୌସମ୍ବିଧାନ ପଢ଼ି ନାହାନ୍ତି। ଏହି ବିଲ କୌଣସି ଦୃଷ୍ଟିରୁ ଅସାମ୍ବିଧାନିକ ନୁହେଁ। ୨୬ ଜାନୁଆରୀରେ ଏକ ଧର୍ମଘଟ କରିବା ଅସାମ୍ବିଧାନିକ ନୁହେଁ କି ? କଂଗ୍ରେସଠାରୁ ସମର୍ଥନ ଲୋଡିବା ପାଇଁ କରାଯାଇଥିବା କାର୍ଯ୍ୟ ସାମ୍ବିଧାନିକ ଥିଲା କି?
ଶାହ ବାନୋ ମାମଲାରେ ସୁପ୍ରିମକୋର୍ଟଙ୍କ ଅନ୍ୟ କିଛି ରାୟ ଥିଲା। ପରେ କଂଗ୍ରେସ ଏହାକୁ ସଂସଦରେ ବଦଳାଇ ଦେଇଥିଲା। ମୁଖ୍ୟମନ୍ତ୍ରୀ ଅରବିନ୍ଦଗ କେଜରିଓ୍ବାଲ ଗରିବ ଲୋକଙ୍କ ପାଇଁ ଘର ନିର୍ମାଣ କରି ନାହାନ୍ତି। କିନ୍ତୁ ନିଜ ପାଇଁ ୪୫ କୋଟି ମୂଲ୍ୟର ବିଳାସପୂର୍ଣ୍ଣ ମହଲ ନିର୍ମାଣ କରିଛନ୍ତି। ସୁପ୍ରିମକୋର୍ଟ ଏହି ବିଲ ଉପରେ ପରାମର୍ଶ ଦେଇଛନ୍ତି, ଯଦି କେନ୍ଦ୍ର ସରକାର ଚାହୁଁଛନ୍ତି ତେବେ ଏହା ଏକ ଆଇନ କରିପାରିବେ। ସୁପ୍ରିମକୋର୍ଟଙ୍କର ଏପରି ନିଷ୍ପତ୍ତି ନାହିଁ ଯାହା ଅନ୍ତର୍ଗତ ରାଜ୍ୟର ଅଧିକାରୀ ମନ୍ତ୍ରୀଙ୍କ ଉପରେ ରହିବେ ନାହିଁ। ସେମାନେ କେବଳ ନିଜ ନିଜ କାମ ଦାୟିତ୍ୱବୋଧ ଅନୁସାରେ କରିବାକୁ ଚାହାଁନ୍ତି ।
କେଜରିଓ୍ବାଲ ଯାହା କହିବେ ତାହା ଠିକ ଏହା କିପରି ହୋଇପାରିବ। ଚାପ ପକାଇ ସେମାନେ ଅଧିକାରୀମାନଙ୍କୁ ଭୁଲ କାମ କରିବାକୁ କହିଥାନ୍ତି। ଯେଉଁମାନେ ଦେଶର ସ୍ବାର୍ଥରେ ଅଛନ୍ତି, ସେମାନେ ଏହି ବିଲ ପାସ କରିବେ। ସେମାନେ କଦାପି ଦୁର୍ନୀତିଗ୍ରସ୍ତଙ୍କୁ ସମର୍ଥନ କରିବେ ନାହିଁ ବୋଲି ରମେଶ କହିଛନ୍ତି।