ଡେରାଡୁନ,୧।୭: ଆମ ଆଦମୀ ପାର୍ଟି(ଏଏପି)ର ବରିଷ୍ଠ ନେତା ତଥା ଅବସରପ୍ରାପ୍ତ କଲୋନେଲ ଅଜୟ କୋଠିୟାଲ ଉତ୍ତରାଖଣ୍ଡର ମୁଖ୍ୟମନ୍ତ୍ରୀ ତୀରଥ ସିଂ ରାଓ୍ବତଙ୍କ ବିରୋଧରେ ନିର୍ବାଚନ ଲଢ଼ିବେ ବୋଲି ଘୋଷଣା କରିଛନ୍ତି। ମୁଖ୍ୟମନ୍ତ୍ରୀ ହେବାର ୬ମାସ ପରେ ବି ତୀରଥ ନିର୍ବାଚନ ଲଢ଼ିବାକୁ ଅସମର୍ଥ। ତେବେ ଚଳିତ ଥର ଉପ-ନିର୍ବାଚନ ଉତ୍ତରାଖଣ୍ଡ ରାଜନୀତିରେ ପରିବର୍ତ୍ତନ ଆଣିବ ବୋଲି କଲୋନେଲ ଅଜୟ କହିଛନ୍ତି। ଗୁରୁବାର ଡେରାଡୁନରେ ଆୟୋଜିତ ହୋଇଥିବା ଏକ ଖବରଦାତା ସମ୍ମିଳନୀରେ ଏନେଇ ଅଜୟ ଘୋଷଣା କରିଛନ୍ତି। ଗଙ୍ଗୋତ୍ରୀ ଆସନରୁ ମୁଖ୍ୟମନ୍ତ୍ରୀ ତୀରଥ ସିଂଙ୍କ ବିରୋଧରେ ଅଜୟ ନିର୍ବାଚନ ଲଢ଼ିବେ। ଗତ ୫ବର୍ଷରେ ଭାଜପା ଉତ୍ତରାଖଣ୍ଡକୁ ଧ୍ୱଂସ କରିଦେଇଛି। ସେ ଭାଗ୍ୟଶାଳୀ ଯେ, ଏଏପି ତାଙ୍କୁ ମୁଖ୍ୟମନ୍ତ୍ରୀ ତୀରଥଙ୍କ ବିରୋଧରେ ଗଙ୍ଗୋତ୍ରୀରେ ଉପ ନିର୍ବାଚନ ଲଢ଼ିବାକୁ ସୁଯୋଗ ଦେଇଛି ବୋଲି କୋଠିୟାଲ କହିଛନ୍ତି। ଶାସନରେ ଥିବା ସରକାରଙ୍କ ଉପରେ ଗଙ୍ଗୋତ୍ରୀବାସୀ ଅସନ୍ତୁଷ୍ଟ ଅଛନ୍ତି। ତେବେ ଚଳିତ ଥର ନିର୍ବାଚନରେ ଜନତାଙ୍କ ବିଜୟ ହେବ ବୋଲି ଅଜୟ କହିଛନ୍ତି।