ନୂଆଦିଲ୍ଲୀ, ୯।୩: ଆମ ଆଦମୀ ପାର୍ଟିର ବିଧାୟକ ସୌରଭ ଭରଦ୍ୱାଜ ଏବଂ ଆତିଶୀ ଗୁରୁବାର ଦିଲ୍ଲୀର ଏଲଜି ହାଉସରେ ଅରବିନ୍ଦ କେଜ୍ରିୱାଲ କ୍ୟାବିନେଟରେ ମନ୍ତ୍ରୀ ଭାବରେ ଶପଥ ଗ୍ରହଣ କରିଛନ୍ତି। ଦିଲ୍ଲୀ ଲ୍ୟୁଟନାଣ୍ଟ ଗଭର୍ନ ଭି.କେ ସକ୍ସେନା ଉଭୟଙ୍କୁ ଶପଥପାଠ କରାଇଥିଲେ। ଆତିଶୀଙ୍କୁ ଶିକ୍ଷା, ପିଡବ୍ଲ୍ୟୁଡି, ବିଦ୍ୟୁତ, ପର୍ଯ୍ୟଟନ ବିଭାଗ ମିଳିଛି। ଅନ୍ୟପକ୍ଷରେ, ସୌରଭ ଭରଦ୍ୱାଜଙ୍କୁ ସ୍ବାସ୍ଥ୍ୟ, ୟୁଡି, ଜଳ, ଶିଳ୍ପ ଦାୟିତ୍ୱ ଦିଆଯାଇଛି। ଏହି ଅବସରରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ସମେତ ଦିଲ୍ଲୀ ସରକାରଙ୍କ ଅନ୍ୟ ମନ୍ତ୍ରୀମାନେ ମଧ୍ୟ ଉପସ୍ଥିତ ଥିଲେ।
ଉଲ୍ଲେଖନୀୟ ଯେ, ଦିଲ୍ଲୀ ଅବକାରୀ ଦୁର୍ନୀତି ମାମଲାରେ ଗିରଫ ହେବା ପରେ ମନୀଷ ସିସୋଡିଆ ଉପମୁଖ୍ୟମନ୍ତ୍ରୀ ଏବଂ ଅନ୍ୟାନ୍ୟ ମନ୍ତ୍ରଣାଳୟ ପଦରୁ ଇସ୍ତଫା ଦେଇଥିଲେ। ତାଙ୍କ ସହ ସତ୍ୟେନ୍ଦ୍ର ଜୈନ ମଧ୍ୟ ସ୍ବାସ୍ଥ୍ୟମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି। ଉଭୟଙ୍କ ଇସ୍ତଫାକୁ ମୁଖ୍ୟମନ୍ତ୍ରୀ କେଜ୍ରିୱାଲ ଗ୍ରହଣ କରିଥିଲେ। ଏହା ପରେ ଇସ୍ତଫାକୁ ରାଷ୍ଟ୍ରପତିଙ୍କ ନିକଟକୁ ପଠାଯାଇଥିଲା। ସେଠାରେ ସିସୋଡିଆ ଏବଂ ଜୈନଙ୍କ ଇସ୍ତଫା ଗ୍ରହଣ କରାଯାଇଥିଲା। ଏଏପି ବିଧାୟକ ସୌରଭ ଭରଦ୍ବାଜ ଏବଂ ଆତିଶୀଙ୍କ ନାମ ଦିଲ୍ଲୀ ସରକାରଙ୍କ ଦ୍ୱାରା ନୂତନ ମନ୍ତ୍ରୀ ପଦ ପାଇଁ ପଠାଯାଇଥିଲା, ଯାହାକୁ ଅନୁମୋଦନ କରାଯାଇଥିଲା।