ନୂଆଦିଲ୍ଲୀ,୨୯।୧୦ : ଦିଲ୍ଲୀରେ ଏଏପି ବିଧାୟକଙ୍କ ବାଡ଼ ଡିଆଁ ପାଇଁ ଭାଜପା ପକ୍ଷରୁ ଅପରେଶନ ଲୋଟସ ଆରମ୍ଭ ହୋଇଛି। ଏନେଇ ଦିଲ୍ଲୀ ଉପମୁଖ୍ୟମନ୍ତ୍ରୀ ସିସୋଡିଆ ଶନିବାର ଖବରଦାତାଙ୍କୁ ସୂଚନା ପ୍ରଦାନ କରିଛନ୍ତି। ଖୁବ ଶୀଘ୍ର ହିମାଚଳ ପ୍ରଦେଶ ଏବଂ ଗୁଜରାଟରେ ବିଧାନସଭା ଅନୁଷ୍ଠିତ ହେବାକୁ ଯାଉଛି। ନିର୍ବାଚନ ପୂର୍ବରୁ ଏଏପିରେ କଳବଳେ କୌଶଳେ ଭାଜପା ଫାଟ ସୃଷ୍ଟି କରିବାକୁ ଉଦ୍ୟମ କରୁଛି।
ଅତୀତରେ ଏକ ଅଡିଓ ଟେପ୍ ସାମ୍ନାକୁ ଆସିଥିଲା ଯେଉଁଥିରେ ବିଧାୟକ କିଣିବା ପାଇଁ ଭାଜପା ପକ୍ଷରୁ ଷଡଯନ୍ତ୍ର କରାଯାଇଥିଲା। ଟଙ୍କା ଦେବା ଏବଂ ପଦବୀ ଦେବା ବିଷୟରେ ଆଲୋଚନା ହୋଇଥିଲା। ଏବେ ପୁଣି ନୂଆ ଅଡିଓ ସାମ୍ନାକୁ ଆସିଛି। ଏହି ନୂତନ ଅଡିଓରେ ଭାଜପାର ମଧ୍ୟସ୍ଥି ଟିଆରଏସ ବିଧାୟକ କିଣିବା ବିଷୟରେ କହୁଛନ୍ତି। ଏଥିରେ ସେମାନେ ଦିଲ୍ଲୀର ୪୩ ଜଣ ବିଧାୟକ କିଣିବାକୁ ଚେଷ୍ଟା କରୁଥିବା ସମ୍ପର୍କରେ ସଙ୍କେତ ଦେଇଛନ୍ତି। ଏସବୁ ବିଧାୟକଙ୍କୁ କିଣିବା ପାଇଁ ଭାଜପା ୧୦୭୫ କୋଟି ଟଙ୍କା ଖର୍ଚ୍ଚ କରିବାକୁ ପ୍ରସ୍ତୁତ।
ମୋର ପ୍ରତ୍ୟକ୍ଷ ପ୍ରଶ୍ନ ହେଉଛି, ସେମାନେ ଏତେ ଟଙ୍କା କେଉଁଠୁ ପାଇଲେ? ହଜାର ହଜାର କୋଟି ଟଙ୍କା ଜରିଆରେ ବିଧାୟକ କିଣିବା ପାଇଁ ପ୍ରୟାସ କରାଯାଉଛି, ଏହାର ଅନୁସନ୍ଧାନ କରାଯିବା ଉଚିତ।
ଅତୀତରେ ଆମେ ଏହି କଥା କହିଥିଲୁ ଯେ ଭାଜପା ଏଏପି ବିଧାୟକଙ୍କୁ କିଣିବାକୁ ଚେଷ୍ଟା କରୁଛି। ମୋତେ ମଧ୍ୟ ଅଫର୍ ଦିଆଯାଇଥିଲା। ଏହି ଟଙ୍କା କେଉଁଠୁ ଆସୁଛି? ଅଡିଓରେ ବାରମ୍ବାର ନାମ ନେଉଥିବା ଏହି ବ୍ୟକ୍ତି, ସନ୍ତୋଷ ଜୀ ଏବଂ ଶାହା ଜୀ, କିଏ? ଯଦି ଏହା ଅମିତ ଶାହା, ତେବେ ଦେଶର ସ୍ବରାଷ୍ଟ୍ରମନ୍ତ୍ରୀ ଏପରି ବିଧାୟକ କିଣିବା ଏକ ବଡ଼ ବିପଦ ଜନକ। ଏହାର ଇଡି ସିବିଆଇ ଯାଞ୍ଚ ହେବା ଜରୁରୀ। ଏହି ମାମଲାରେ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କ ନାମ ନେଇ ସେ କହିଛନ୍ତି ଯେ ଯଦି ସେ ଏହି ସବୁ ଘଟଣାରେ ସମ୍ପୃକ୍ତ ତେବେ ତାଙ୍କୁ ତୁରନ୍ତ ଗିରଫ କରାଯିବା ଆବଶ୍ୟକ ବୋଲି ସିସୋଡିଆ କହିଛନ୍ତି।