ନୂଆଦିଲ୍ଲୀ,୯।୮: ଦେଶରେ ଟମାଟର ମୂଲ୍ୟ ଆକାଶଛୁଆଁ ରହିଛି। ଏହାକୁ ବିରୋଧ କରି ଆମ ଆଦମୀ ପାର୍ଟିର ଏମ୍ପି ସୁଶୀଲ ଗୁପ୍ତା ବୁଧବାର ଟମାଟର ମାଳ ପିନ୍ଧି ରାଜ୍ୟ ସଭାରେ ପହଞ୍ଚିଥିଲେ।
ସୁଶୀଲ ନେତା କହିଛନ୍ତି, ଦେଶରେ ଦରଦାମ ବୃଦ୍ଧି ପାଇଛି। ମୁଦ୍ରାସ୍ଫୀତି ପ୍ରତି ସରକାରଙ୍କର ଧ୍ୟାନ ନାହିଁ ବୋଲି ସେ ଅଭିଯୋଗ କରିଛନ୍ତି। ଡିଜେଲ ପେଟ୍ରୋଲ ୧୦୦ ଟଙ୍କା ଅତିକ୍ରମ କରିଛି। ସରକାର ମୂଲ୍ୟ ବୃଦ୍ଧି ବିଷୟରେ ଆଲୋଚନା କରୁନାହାଁନ୍ତି କିମ୍ବା ମଣିପୁର ବିଷୟରେ ଆଲୋଚନା କରୁନାହାଁନ୍ତି। ସେଥିପାଇଁ ମୁଁ ଆଜି ଏହି ଟମାଟର ମାଳ ପିନ୍ଧି ଗୃହକୁ ଯାଉଛି।
ସୁଶୀଲ ଗୁପ୍ତା ଆହୁରି ମଧ୍ୟ କହିଛନ୍ତି, ମୁଦ୍ରାସ୍ଫୀତି ବୃଦ୍ଧି ହେତୁ ମୁଁ କେନ୍ଦ୍ର ମନ୍ତ୍ରୀ ପୀୟୁଷ ଗୋୟଲଙ୍କଠାରୁ ସମୟ ମାଗିଛି। ମୁଁ ତାଙ୍କୁ ଭେଟି ଟମାଟର ଏବଂ ଅଦାର ଏକ ଡାଲା ଉପହାର ଦେବି।
ରାଜ୍ୟ ସଭା ଅଧ୍ୟକ୍ଷ ଟମାଟର ମାଳ ପିନ୍ଧି ରାଜ୍ୟ ସଭାକୁ ଆସିଥିବା ସୁଶୀଲ ଗୁପ୍ତାଙ୍କ ଉପରେ ଆପତ୍ତି ଉଠାଇଥିଲେ। ସେ କହିଛନ୍ତି ଯେ, ଗୃହରେ ଆଚରଣ କରିବାର ସୀମା ଅଛି ଏବଂ ଏଠାରେ ଏକ ସ୍ଥିର ପ୍ରୋଟୋକଲ ଅଛି। ଗୃହର ଅନେକ ସମ୍ମାନିତ ସଦସ୍ୟ ଏହି ସୀମା ଅତିକ୍ରମ କରିଥିବାରୁ ମୁଁ ଦୁଃଖିତ।