ନୂଆଦିଲ୍ଲୀ,୨୬ ।୯: ରାଜସ୍ଥାନ କଂଗ୍ରେସରେ ଉପୁଜିଥିବା ସଙ୍କଟ ପରେ ଆମ ଆଦମୀ ପାର୍ଟି(ଏଏପି)ର ରାଜ୍ୟ ସଭା ସଦସ୍ୟ ରାଘବ ଚଢା ଚୁଟକି ନେଇଛନ୍ତି । କଂଗ୍ରେସ ସଙ୍କଟର ଖବର ଆସିବା ପରେ ଚଢା ଏକ ଟୁଇଟରେ କହିଛନ୍ତି, ‘ କଂଗେସ୍ର ଖତ୍ମ ହୈ… କେଜରିୱାଲ ବିକଳ୍ପ ହୈ’ । ଏଏପି ପକ୍ଷରୁ ରାଘବ ଚଢାଙ୍କୁ ଗୁଜରାଟରେ ଦଳୀୟ ମାମଲାର ସହ ପ୍ରଭାରୀ କରାଯାଇଛି । ଏହାପରଠାରୁ ସେ କଂଗ୍ରେସକୁ ଟାର୍ଗେଟ କରି ଚାଲିଛନ୍ତି । ଶନିବାର ସେ ତାଙ୍କର ଗୁଜରାଟ ଗସ୍ତ ଆରମ୍ଭ କରିଥିଲେ । ଏହି ସମୟରେ ତାଙ୍କ ଟାର୍ଗେଟରେ କଂଗ୍ରେସ ହିଁ ଥିଲା । ସେ କହିଥିଲେ କଂଗ୍ରେସ ଦଳ ଏବେ ବୁଢି ହୋଇଯାଇଛି । ସେ ଭାରତୀୟ ଜନତା ପାର୍ଟି(ଭାଜପା)କୁ ହରାଇ ପାରିବ ନାହିଁ । ସେ ଆହୁରି ମଧ୍ୟ କହିଥିଲେ ଅରବିନ୍ଦ କେଜରିୱାଲ ଏମିତି ଏକମାତ୍ର ନେତା ଯାହାଙ୍କୁ ଭଗବାନ ଏମିତି କରିବାକୁ ଆଶୀର୍ବାଦ ଦେଇଛନ୍ତି ।
ରାଘବ ଆହୁରି ମଧ୍ୟ କହିଥିଲେ ୨୭ ବର୍ଷରେ ଭାଜପାକୁ କଂଗ୍ରେସ ହରାଇ ପାରି ନ ଥିବା ବେଳେ ଏବେ କ’ଣ କରିବ । ଏହା ବହୁ ପୁରୁଣା ଦଳ ହୋଇଗଲାଣି । ସେଥିପାଇଁ ଲୋକେ କଂଗ୍ରେସରୁ ମୁହଁ ଫେରାଇ ନେଉଛନ୍ତି । ଭାଜପାର ୨୭ ବର୍ଷର ଶାସନ ଭିତରେ ଏବେ ଗୁଜରାଟରେ ପରିବର୍ତ୍ତନର ସମୟ ଆସିଛି । ଏବେ ଏଠାରେ ଅରବିନ୍ଦ କେଜରିୱାଲଙ୍କ ମଡେଲ ଚାଲିବ । ଯେଉଁଥିରେ ଗରିବରୁ ଅତି ଗରିବଙ୍କୁ ବିଶ୍ୱ ସ୍ତରର ଶିକ୍ଷା, ସ୍ୱାସ୍ଥ୍ୟ ସୁବିଧା, ଅପରେଶନ, ମାଗଣା ଔଷଧ, ମାଗଣା ବିଜୁଳି-ପାଣି, ମହିଳାଙ୍କୁ ଆର୍ଥିକ ସହାୟତା ଓ ଅନ୍ୟ ସୁବିଧା ମିଳିବ ।