ନୂଆଦିଲ୍ଲୀ,୨୩।୩: ଦିଲ୍ଲୀ ମ୍ୟୁନିସିପାଲିଟି ନିର୍ବାଚନ ପୂର୍ବରୁ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଭାଜପାକୁ ଖୋଲା ଚ୍ୟାଲେଞ୍ଜ ଦେଇଛନ୍ତି। ଭାଜପା ନେତୃତ୍ୱାଧୀନ କେନ୍ଦ୍ର ସରକାର ଦିଲ୍ଲୀ ମ୍ୟୁନିସିପାଲିଟି ନିର୍ବାଚନକୁ ସ୍ଥଗିତ ରଖିଥିବାରୁ ଅସନ୍ତୋଷ ପ୍ରକାଶ କେଜ୍ରିୱାଲ କହିଛନ୍ତି, ଭାଜପାର ଯଦି ସାହସ ଅଛି, ତେବେ ଏମସିଡି ନିର୍ବାଚନକୁ ଠିକ ସମୟରେ କରି ଜିତନ୍ତୁ, ଏଏପି ରାଜନୀତି ଛାଡିଦେବ। ଭାଜପା ନିଜକୁ ଦୁନିଆର ସବୁଠୁ ବଡ ଦଳ ବୋଲି କହିଥାଏ। କିନ୍ତୁ ଭାଜପା ଦିଲ୍ଲୀର ଏକ ଛୋଟ ଦଳ ଏବଂ ଛୋଟ ନିର୍ବାଚନକୁ ଡରି ଯାଇଛି। ଦିଲ୍ଲୀ ମ୍ୟୁନିସିପାଲିଟି କର୍ପୋରେସନ ନିର୍ବାଚନକୁ ସ୍ଥଗିତ ରଖିବା ବ୍ରିଟିଶମାନଙ୍କୁ ଦେଶରୁ ବାହାର କରି ଦେଶରେ ଗଣତନ୍ତ୍ର ପ୍ରତିଷ୍ଠା ପାଇଁ ବଳିଦାନ ଦେଇଥିବା ଶହୀଦଙ୍କ ପ୍ରତି ଅପମାନ। ପରାଜୟର ଭୟ ହେତୁ ଆଜି ସେମାନେ ନିର୍ବାଚନକୁ ସ୍ଥଗିତ ରଖିଛନ୍ତି, ଆସନ୍ତାକାଲି ସେମାନେ ରାଜ୍ୟ ତଥା ଦେଶର ନିର୍ବାଚନକୁ ସ୍ଥଗିତ ରଖିବେ ବୋଲି କେଜ୍ରିଓ୍ବାଲ ଆଶଙ୍କା ପ୍ରକାଶ କରିଛନ୍ତି।
ସୂଚନାଯୋଗ୍ୟ, କେନ୍ଦ୍ର କ୍ୟାବିନେଟ ଦିଲ୍ଲୀର ୩ ନଗର ନିଗମର ମିଶ୍ରଣ କରିଛନ୍ତି। ଏଣିକି ଦିଲ୍ଲୀରେ କେବଳ ଗୋଟିଏ ନଗର ନିଗମ ରହିବ। ଏ ସଂକ୍ରାନ୍ତ ବିଲ ସଂସଦରେ ଉପସ୍ଥାପନ ହେବ ବୋଲି କେନ୍ଦ୍ର ସରକାର ନିଷ୍ପତ୍ତି ନେଇଛନ୍ତି। ଏହି କାରଣରୁ ଦିଲ୍ଲୀ ମ୍ୟୁନିସିପାଲିଟି ନିର୍ବାଚନ ସ୍ଥଗିତ ରହିଛି। କେନ୍ଦ୍ର ସରକାରଙ୍କ ଏପରି ନିଷ୍ପତ୍ତିକୁ କେଜ୍ରିୱାଲ ନାପସନ୍ଦ କରିଛନ୍ତି।