ଓ୍ବେଲିଂଟନ,୫।୩ : ଅଷ୍ଟ୍ରେଲିଆ ଅଧିନାୟକ ଆରୋନ ଫିଞ୍ଚ ଦେଶର ପ୍ରଥମ ବ୍ୟାଟ୍ସମ୍ୟାନ ଭାବେ ଅନ୍ତର୍ଜାତୀୟ ଟି୨୦ରେ ୧୦୦ ଛକା ପୂରଣ କରିଛନ୍ତି। ନ୍ୟୁଜିଲାଣ୍ଡ ବିପକ୍ଷ ଚତୁର୍ଥ ଟି୨୦ ମ୍ୟାଚ୍ରେ ଏହି ମାଇଲଷ୍ଟୋନ ହାସଲ କରିଛନ୍ତି ଫିଞ୍ଚ। ଅଷ୍ଟ୍ରେଲିଆ ସୀମିତ ଓଭର ଦଳର ଅଧିନାୟକ ବିଶ୍ୱର ୬ଷ୍ଠ ବ୍ୟାଟ୍ସମ୍ୟାନ ଭାବେ ଏହି ତାଲିକାରେ ସାମିଲ ହୋଇଛନ୍ତି। ସର୍ବାଧିକ ୧୩୫ ଛକା ସହ ଶୀର୍ଷରେ ଅଛନ୍ତି ନ୍ୟୁଜିଲାଣ୍ଡର ମାର୍ଟିନ ଗୁପଟିଲ। ତାଙ୍କ ପଛକୁ ରହିଛନ୍ତି ଭାରତର ରୋହିତ ଶର୍ମା (୧୨୭), ଇଂଲଣ୍ଡର ଇଆନ ମୋର୍ଗାନ (୧୧୩), ନ୍ୟୁଜିଲାଣ୍ଡର କଲିନ ମୁନ୍ରୋ (୧୦୭) ଓ ଓ୍ବେଷ୍ଟଇଣ୍ଡିଜର କ୍ରିସ ଗେଲ (୧୦୫)।
ଅଷ୍ଟ୍ରେଲିଆ ପାଇଁ ଅନ୍ତର୍ଜାତୀୟ ଟି୨୦ରେ ସର୍ବାଧିକ ରନ୍ କରିଥିବା ବ୍ୟାଟ୍ସମ୍ୟାନଙ୍କ ତାଲିକାରେ ଶୀର୍ଷରେ ଅଛନ୍ତି ଫିଞ୍ଚ। ସେ ସାଥୀ ଓପନର ଡେଭିଡ ଓ୍ବାର୍ନରଙ୍କୁ ପଛରେ ପକାଇ ଏହି ସଫଳତା ହାସଲ କରିଛନ୍ତି। ଏପର୍ଯ୍ୟନ୍ତ ୭୦ ମ୍ୟାଚ୍ ଖେଳିଥିବା ଫିଞ୍ଚ ଦୁଇ ଶତକ ଓ ୧୪ ଅର୍ଦ୍ଧଶତକ ସହ ୨,୩୧୦ ରନ୍ କରିଛନ୍ତି। ପୂର୍ବରୁ ଓ୍ବାର୍ନର ଶୀର୍ଷରେ ଥିଲେ। ୮୧ ମ୍ୟାଚ୍ ଖେଳିଥିବା ଓ୍ବାର୍ନରଙ୍କ ନାମରେ ଏକ ଶତକ ଓ ୧୮ ଅର୍ଦ୍ଧଶତକ ସହ ୨,୨୬୫ ରନ୍ ରହିଛି।
