ଭୁବନେଶ୍ୱର,୨୦ା୬(ବ୍ୟୁରୋ): କରୋନା ମହାମାରୀ ସମୟରେ ଶିକ୍ଷା କ୍ଷେତ୍ର ସମ୍ପୂର୍ଣ୍ଣ ରୂପେ ଭୁଶୁଡ଼ି ଯାଇଥିଲା। ଅନ୍ଲାଇନ୍ ପାଠପଢ଼ା ହେଉଥିଲେ ମଧ୍ୟ ସମସ୍ତେ ଏହାର ସୁଯୋଗ ପାଉ ନ ଥିଲେ କିମ୍ବା ଅନେକେ ଏହାର ସଦୁପଯୋଗ କରିପାରୁ ନ ଥିଲେ। ସେହିପରି ଉଚ୍ଚଶିକ୍ଷା ଓ ଚାକିରି ପାଇଁ ହେଉଥିବା ବିଭିନ୍ନ ପ୍ରତିଯୋଗିତାମୂଳକ ପରୀକ୍ଷା ଦେବାକୁ ଚାହୁଁଥିବା ଛାତ୍ରୀଛାତ୍ରଙ୍କୁ ନାନା ସମସ୍ୟା ବାଟ ଓଗାଳିଥାଏ। ବାହାରେ ଘର ଭଡ଼ା ନେଇ ରହିବା, ଖାଇବା, କୋଚିଂ ନେବା ପାଇଁ ବହୁ ଖର୍ଚ୍ଚାନ୍ତ ହେବାକୁ ପଡୁଥିବାରୁ ବିଶେଷକରି ଆର୍ଥତ୍କ ସ୍ବଚ୍ଛଳ ନ ଥିବା ଛାତ୍ରୀଛାତ୍ର ଏଥିରୁ ବଞ୍ଚତ୍ତ ହୋଇଥାନ୍ତି। ଏସବୁ ସମସ୍ୟାରୁ ମୁକୁଳି କିପରି ଛାତ୍ରୀଛାତ୍ର ନିଜ ସ୍ବପ୍ନ ବା ଲକ୍ଷ୍ୟ ପୂରଣ କରିବେ, ତାହାର ସମାଧାନର ବାଟ ଖୋଲିଛନ୍ତି ହାଇଦ୍ରାବାଦର ଓଡ଼ିଆ ଦମ୍ପତି ଡା. ଅନୁପମା ମହାନ୍ତି ଓ ସ୍ବାମୀ ଅଜୟ କୁମାର ମହାନ୍ତି। ଆରମ୍ଭ କରିଛନ୍ତି ଏଡ୍ଟେକ୍ ଆପ୍ ‘ଆର୍ସି’ (AARSHI)। ଏହି ଶିକ୍ଷା ଆପ୍ର ମୁଖ୍ୟ ଡାକ୍ତର ଅନୁପମା ରହିଥିବାବେଳେ ଅଜୟ ସହପ୍ରତିଷ୍ଠାତା ଭାବେ କାର୍ଯ୍ୟ କରୁଛନ୍ତି। ଘରେ ରହି ବିନା ଖର୍ଚ୍ଚରେ ଏଥିରୁ ଗୁଣାତ୍ମକ ଶିକ୍ଷା ଲାଭ କରିବାର ବ୍ୟବସ୍ଥା ରହିଛି। କେଜିରୁ ପିଜି ପର୍ଯ୍ୟନ୍ତ ଛାତ୍ରୀଛାତ୍ର ଏଥିରେ ଉପକୃତ ହୋଇପାରିବେ। ଜଣେ ପିଲା ସ୍କୁଲ, କଲେଜର ପାଠ୍ୟକ୍ରମ ସହ ଅଧିକ କିଛି ପ୍ରକାଶନ ପୁସ୍ତକ ଏହି ଆପ୍ ମାଧ୍ୟମରେ ପଠନ କରିପାରିବେ। ଆର୍ସି ଆପ୍ ଗୁଗଲ୍ ପ୍ଲେ ଷ୍ଟୋରରେ ଉପଲବ୍ଧ ହେଉଛି। ଏହାକୁ http://Inkd.in/dwW92GHq ଲିଙ୍କ୍ ଜରିଆରେ ଡାଉନ୍ଲୋଡ୍ କରାଯାଇ ପାରୁଛି।
୨୦୨୧ ଅଗଷ୍ଟ ୨ରେ ‘ଆର୍ସି’ର ପଞ୍ଜୀକରଣ ହୋଇଥିବାବେଳେ ବର୍ତ୍ତମାନ ୨୦୦ରୁ ଊଦ୍ଧର୍ବ ସବ୍ସ୍କ୍ରାଇବର ହୋଇସାରିଲେଣି। ପ୍ରଥମରୁ ଦଶମ ଶ୍ରେଣୀର ଛାତ୍ରୀଛାତ୍ରଙ୍କୁ ଆକର୍ଷିତ କରିବା ପାଇଁ ଆପ୍ରେ କଣ୍ଟେଣ୍ଟଗୁଡ଼ିକୁ ଆନିମେଟେଡ୍ କରାଯାଇଛି। ସେହିପରି ଯୁକ୍ତ୨ ସହ ସିବିଏସ୍ଇ ଓ ଅନ୍ୟ ବୋର୍ଡ ପାଇଁ ପାଠ୍ୟକ୍ରମ ମଧ୍ୟ ଉପଲବ୍ଧ ରହିଛି। ସବୁ ଶ୍ରେଣୀର ପିଲା ସମାନ ପାଠ୍ୟକ୍ରମକୁ ସବୁ ଭାଷାରେ ପଢ଼ିବାର ସୁଯୋଗ ପାଇବେ। ବର୍ତ୍ତମାନ ଇଂଲିଶରେ ସବୁ କଣ୍ଟେଣ୍ଟ ରହିଛି। ଏଥିସହିତ ଜର୍ମାନ ଭାଷାର ମଧ୍ୟ ଗୋଟିଏ କଣ୍ଟେଣ୍ଟ ରହିଥିବାବେଳେ ଆଗକୁ ୨୩ ଭାଷାର ପାଠ୍ୟକ୍ରମ ରଖିବାକୁ ଯୋଜନା ରହିଛି। ସେହିଭଳି ହାଇଦ୍ରାବାଦ ଓ ଭୁବନେଶ୍ୱରରେ ଏକ ଷ୍ଟୁଡିଓ ରହିବ। ସେଠାରେ ମହିଳାଙ୍କୁ ନିଯୁକ୍ତିର ସୁଯୋଗ ଦିଆଯିବ। ସେମାନେ କଣ୍ଟେଣ୍ଟ ଲେଖିବା ସହିତ ଲାଇଭ୍ କ୍ଲାସ୍ ମଧ୍ୟ କରିବେ। ତେବେ ଏହା ଏକ ମହିଳା ଉଦ୍ୟୋଗୀ କାର୍ଯ୍ୟକ୍ରମ। ଏଥିରେ ବିଶେଷକରି ମହିଳାମାନଙ୍କୁ କାର୍ଯ୍ୟ କରିବାର ସୁଯୋଗ ଦିଆଯିବ ବୋଲି ଅଜୟ ମହାନ୍ତି କହିଛନ୍ତି। ସେହିଭଳି ପ୍ରତିବର୍ଷ ୧୦ଜଣ ମେଧାବୀ ଛାତ୍ରୀଛାତ୍ରଙ୍କୁ ଆର୍ସିଆନ୍ ମେଧାବୃତ୍ତି ଦେବାର ବ୍ୟବସ୍ଥା କରାଯାଉଛି। ଆପ୍ ସମ୍ପର୍କରେ ଡା. ଅନୁପମା କହିଛନ୍ତି, ଗତ ୧୫ ବର୍ଷ ହେଲା ସ୍ବାମୀ ଅଜୟ କୁମାର ମହାନ୍ତିଙ୍କ ସହ ଶିକ୍ଷା ଓ ସ୍ବାସ୍ଥ୍ୟ କ୍ଷେତ୍ରରେ କାର୍ଯ୍ୟ କରିଛି। ତେଣୁ ମୋର ବିଶ୍ବାସ ଆହୁରି ଦୃଢ଼ୀଭୂତ ହୋଇଛି। ଏବେ ଯେଉଁ ଲକ୍ଷ୍ୟ ନେଇ ଏହି କାର୍ଯ୍ୟକ୍ରମ ଆରମ୍ଭ ହୋଇଛି ତାହା ସଫଳ ହେବ ବୋଲି ଆଶା ରଖିଛୁ।