ଜୋହାନ୍ସବର୍ଗ, ୧୮।୫ : ଦକ୍ଷିଣ ଆଫ୍ରିକାର ଏବି ଡି’ଭିଲର୍ସ ଅନ୍ତର୍ଜାତୀୟ କ୍ରିକେଟକୁ ଫେରିବେ ନାହିଁ। ଚଳିତ ବର୍ଷ ହେବାକୁ ଥିବା ଟି୨୦ ବିଶ୍ୱକପ୍ ଲାଗି ଅନ୍ତର୍ଜାତୀୟ କ୍ରିକେଟକୁ ଏହି ବିସ୍ଫୋରକ ବ୍ୟାଟ୍ସମ୍ୟାନ ପ୍ରତ୍ୟାବର୍ତ୍ତନ କରିବେ ବୋଲି ପ୍ରଶଂସକମାନେ ଆଶା ରଖିଥିଲେ। ଏପରିକି ଚଳିତ ବର୍ଷ ଆଇପିଏଲବେଳେ ଦକ୍ଷିଣ ଆଫ୍ରିକାର ମୁଖ୍ୟ କୋଚ୍ ମାର୍କ ବାଉଚରଙ୍କ ସହ ଆଲୋଚନା ମଧ୍ୟ ଚାଲିଥିବା ଡି’ ଭିଲର୍ସ ପ୍ରକାଶ କରିଥିଲେ। ହେଲେ ମଙ୍ଗଳବାର କ୍ରିକେଟ ଦକ୍ଷିଣ ଆଫ୍ରିକା (ସିଏସ୍ଏ) ପକ୍ଷରୁ କରାଯାଇଥିବା ଘୋଷଣା ପ୍ରଶଂସକଙ୍କ ମନ ଭାଙ୍ଗିଦେଇଛି।
୩୭ ବର୍ଷୀୟ ଭେଟେରାନ ବ୍ୟାଟ୍ସମ୍ୟାନ ଅନ୍ତର୍ଜାତୀୟ କ୍ରିକେଟକୁ ଫେରିବେ ନାହିଁ ବୋଲି ସ୍ପଷ୍ଟ କରିଛନ୍ତି ସିଏସ୍ଏ ଡିରେକ୍ଟର ଗ୍ରେମ ସ୍ମିଥ। ଇଏସ୍ପିଏନ୍କ୍ରିକଇନଫୋ ଅନୁଯାୟୀ, ସିଏସ୍ଏ ସହ ଡି’ଭିଲର୍ସଙ୍କ ଆଲୋଚନା ଶେଷ ହୋଇଛି। ପୂର୍ବତନ ଅଧିନାୟକ ସନ୍ନ୍ୟାସ ନିଷ୍ପତ୍ତିରୁ ଫେରିବେ ନାହିଁ। ଏ ନେଇ ବିବୃତି ରଖିବା ସହ ବୋର୍ଡ ପକ୍ଷରୁ ଓ୍ବେଷ୍ଟଇଣ୍ଡିଜ ଗସ୍ତ ଲାଗି ଟେଷ୍ଟ ଓ ଟି୨୦ ଦଳ ଘୋଷଣା କରାଯାଇଛି।
୨୦୧୮ ମେ’ରେ ଅନ୍ତର୍ଜାତୀୟ କ୍ରିକେଟରୁ ସନ୍ନ୍ୟାସ ଘୋଷଣା କରିବା ପରେ ମଧ୍ୟ ଡି’ଭିଲର୍ସଙ୍କ ପ୍ରଦର୍ଶନରେ କୌଣସି ଫରକ ପଡ଼ି ନ ଥିଲା। ୨୦୧୯ ଆଇସିସି ବିଶ୍ୱକପ୍ ପୂର୍ବରୁ ତାଙ୍କୁ ସିଏସ୍ଏ ପକ୍ଷରୁ ଫେରିବାକୁ ପ୍ରସ୍ତାବ ଦିଆଯାଇଥିଲା। ହେଲେ ସେ ଏହାକୁ ଅସ୍ବୀକାର କରି ଦେଇଥିଲେ।