ଶାରଜା, ୧୩।୧୦: ଚଳିତ ଆଇପିଏଲ୍ର ୨୮ତମ ମ୍ୟାଚ୍ରେ ସୋମବାର ବିରାଟ କୋହଲିଙ୍କ ନେତୃତ୍ୱାଧୀନ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି) ଦଳ ୮୨ ରନର ବୃହତ୍ ବ୍ୟବଧାନରେ କୋଲକାତା ନାଇଟ୍ ରାଇଡର୍ସକୁ ପରାସ୍ତ କରିଛି। ଏହି ମ୍ୟାଚ୍ରେ ପ୍ରଥମେ ବ୍ୟାଟିଂ କରି ଆର୍ସିବି ଏବି ଡି ଭିଲର୍ସ (୭୩ ରନ୍, ୩୩ ବଲ)ଙ୍କ ବିସ୍ଫୋରକ ବ୍ୟାଟିଂ ବଳରେ ନିର୍ଦ୍ଧାରିତ ୨୦ ଓଭରରେ ୨ ଉଇକେଟ୍ ହରାଇ ୧୯୪ ରନ କରିଥିଲା। ଜବାବରେ କୋଲକାତା ୯ ଉଇକେଟ୍ ବିନିମୟରେ ମାତ୍ର ୧୧୨ ରନ କରିବାକୁ ସକ୍ଷମ ହୋଇଥିଲା। ଅପରାଜିତ ଅର୍ଦ୍ଧଶତକୀୟ ଇନିଂସ ଲାଗି ଡି ଭିଲର୍ସଙ୍କୁ ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ପ୍ରଦାନ କରାଯାଇଥିଲା। ଏଥିସହ ଡି ଭିଲର୍ସ ଆଇପିଏଲ୍ ଇତିହାସରେ ସର୍ବାଧିକଥର ମ୍ୟାନ୍ ଅଫ୍ ଦି ମ୍ୟାଚ୍ ପୁରସ୍କାର ଜିତିବାର ରେକର୍ଡ କରିଛନ୍ତି। ଆଇପିଏଲ୍ରେ ସେ ମୋଟ୍ ଉପରେ ୨୨ ଥର ମ୍ୟାଚ୍ର ଶ୍ରେଷ୍ଠ ଖେଳାଳି ବିବେଚିତ ହୋଇଛନ୍ତି। ଏହିକ୍ରମରେ ଡି ଭିଲର୍ସ ବାଙ୍ଗାଲୋରର କ୍ରିସ୍ ଗେଲ୍ (୨୧ଥର)ଙ୍କୁ ପଛରେ ପକାଇ ଦେଇଛନ୍ତି।