ଦୁବାଇ, ୨୨।୯: ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି) ପକ୍ଷରୁ ପ୍ରତିନିଧିତ୍ବ କରୁଥିବା ବିସ୍ଫୋରକ ଦକ୍ଷିଣ ଆଫ୍ରିକା ବ୍ୟାଟ୍ସମ୍ୟାନ ଏବି ଡି ଭିଲର୍ସ ନିଜ ଫ୍ରାଞ୍ଚାଇଜ୍ ପାଇଁ ୨୦୦ ଛକା ମାରିବାର ସୌଭାଗ୍ୟ ଲାଭ କରିଛନ୍ତି। ସୋମବାର ବାଙ୍ଗାଲୋର ଓ ସନ୍ରାଇଜର୍ସ ହାଇଦ୍ରାବାଦ ମଧ୍ୟରେ ଖେଳାଯାଇଥିବା ମ୍ୟାଚ୍ ଅବସରରେ ଡି ଭିଲର୍ସ ଏହି ମାଇଲ୍ଷ୍ଟୋନ ଅତିକ୍ରମ କରିଛନ୍ତି। ପ୍ରତିପକ୍ଷ ଦ୍ରୁତ ବୋଲର ସନ୍ଦୀପ ଶର୍ମାଙ୍କୁ ଛକା ମାରି ଡି ଭିଲର୍ସ ଆର୍ସିବି ପାଇଁ ଏହି ମାଇଲଷ୍ଟୋନ୍ ଛୁଇଁଥିଲେ। ‘ମିଷ୍ଟର ୩୬୦ ଡିଗ୍ରୀ’ ଭାବେ ପରିଚିତ ଏବି ୨୦୧୧ରୁ ବାଙ୍ଗାଲୋର ପାଇଁ ଖେଳି ଆସୁଛନ୍ତି। ଆଇପିଏଲ୍ ଇତିହାସରେ ସର୍ବକାଳୀନ ସର୍ବାଧିକ ଛକା ମାରିବାର ରେକର୍ଡ କ୍ରିସ୍ ଗେଲ୍ଙ୍କ ନାମରେ ରହିଛି। ଗେଲ୍ ବର୍ତ୍ତମାନ ସୁଦ୍ଧା ଆଇପିଏଲ୍ ୩୨୬ ଛକା ମାରି ସାରିଛନ୍ତି। ଏହି ତାଲିକାରେ ଡି ଭିଲର୍ସ (୨୧୪) ୨ୟ ସ୍ଥାନରେ ରହିଛନ୍ତି।