ଗୋପ,୧୫।୫(ଡି.ଏନ୍.ଏ.): ନିର୍ମଳ ଗ୍ରାମ ପଞ୍ଚାୟତ ଭାବରେ ଗୋପ ବ୍ଲକ ଅନ୍ତର୍ଗତ ମହଲପଡ଼ା ପଞ୍ଚାୟତର ଓରେଇ ଗ୍ରାମରେ ୨୦୦୭ରେ ନିର୍ମାଣାଧୀନ ଗୋଷ୍ଠୀ ଶୌଚାଳୟ ଦୀର୍ଘ ୧୦ ବର୍ଷରୁ ଊଦ୍ଧର୍ବ ହେବ ପରିତ୍ୟକ୍ତ ଅବସ୍ଥାରେ ପଡିରହିଛି । ଏଥିପ୍ରତି ଗୋପ ବ୍ଲକ ପକ୍ଷରୁ ଦୃଷ୍ଟି ଦେଉ ନ ଥିବା ନେଇ ସାଧାରଣରେ ଅସନ୍ତୋଷ ଦେଖାଦେଇଛି। ତୁରନ୍ତ ଏହି ଗୋଷ୍ଠୀ ଶୌଚାଳୟକୁ ମରାମତି କରିବାକୁ ଦାବି ହୋଇଛି। କେନ୍ଦ୍ର ସରକାର ୨୦୦୩ରେ ସାଧାରଣ ଲୋକଙ୍କୁ ରାଜ୍ୟର ବିଭିନ୍ନ ବ୍ଲକର ବିଭିନ୍ନ ପଞ୍ଚାୟତରେ ସ୍ବଚ୍ଛତା ଆଣିବା ଓ ବାହାରେ ମଳତ୍ୟାଗ ନ କରିବା ଲାଗି ସ୍ବଚ୍ଛ ଭାରତ ଯୋଜନାରେ ଗୋଷ୍ଠି ଶୌଚାଳୟରେ ଲକ୍ଷାଧିକ ଟଙ୍କା ଖର୍ଚ୍ଚ କରିଥିଲେ। ଏହି ଯୋଜନାରେ ପ୍ରଥମ କରି ଗୋପ ବ୍ଲକ ମହଲପଡ଼ା ପଞ୍ଚାୟତର ଓରେଇ ଗ୍ରାମରେ ଗୋଷ୍ଠୀ ଶୌଚାଳୟ ନିର୍ମାଣ ହୋଇଥିଲା। ଏହି ଯୋଜନାର ସଫଳ ରୂପାୟନ ହୋଇଥିବାରୁ ୨୦୦୮ ଆର୍ଥିକ ବର୍ଷରେ ଏହି ଗୋଷ୍ଠି ଶୌଚାଳୟକୁ ଅଢେଇ ଲକ୍ଷ ଟଙ୍କାର ପୁରସ୍କାର ରାଶି ମିଳିଥିଲା। ବ୍ଲକ ଜଳ ପରିମଳ ବିଭାଗ ଏସବୁ ଯୋଜନାକୁ ଦେଖୁଥିବାବେଳେ ଏବେ ଏହି ଗୋଷ୍ଠୀ ଶୌଚାଳୟ ଜରାଜୀର୍ଣ୍ଣ ହୋଇ ପଡ଼ି ରହିଛି। ୨୦୦୭ରେ ଓରେଇ ଗ୍ରାମରେ ଗୋଷ୍ଠୀ ଶୌଚାଳୟ ନିର୍ମାଣ ପରେ ଗ୍ରାମବାସୀ ଏହାକୁ ବ୍ୟବହାର କରୁଥିଲେ। ମାତ୍ର ୨/୩ ବର୍ଷ ପରେ ଏହି ଗୋଷ୍ଠୀ ଶୌଚାଳୟର ଠିକ୍ ଭାବରେ ରକ୍ଷଣାବେକ୍ଷଣ ନ ହେବାରୁ ଏହା ଏବେ ଦୀର୍ଘ ବର୍ଷ ଧରି ଜରାଜୀର୍ଣ୍ଣ ଭାବରେ ପଡ଼ି ରହିଛି। ଲକ୍ଷାଧିକ ଟଙ୍କାରେ ନିର୍ମାଣଧୀନ ଏହି ଗୋଷ୍ଠି ଶୌଚାଳୟକୁ ତୁରନ୍ତ ମରାମତି କରିବାକୁ ହେଉଥିବାବେଳେ ବ୍ଲକ ପ୍ରଶାସନ କୋଣସି ପଦକ୍ଷେପ ଗ୍ରହଣ କରୁନାହିଁ। ଗୋଷ୍ଠୀ ଶୌଚାଳୟଟି ଏବେ ଜରାଜୀର୍ଣ୍ଣ ଭାବରେ ପଡ଼ି ଥିବାରୁ ସାପ ବେଙ୍ଗଙ୍କ ଆଡ୍ଡାସ୍ଥଳୀ ପାଲଟିଛି। ତୁରନ୍ତ ଏହି ଗୋଷ୍ଠୀ ଶୌଚାଳୟକୁ ମରାମତି କରିବାକୁ ଓରେଇ ଗ୍ରାମବାସୀ ଦାବି କରିଛନ୍ତି।
