ଖଣ୍ଡପଡ଼ା,୨୩ା୧୨(ସ୍ବ.ପ୍ର.): ରାଜରାଜୁଡା ଅମଳରୁ କୁମ୍ଭାରପଡ଼ା ଗ୍ରାମରେ ଥିବା ଜଗନ୍ନାଥ ପୋଖରୀଟି ଏବେ ପରିତ୍ୟକ୍ତ ଅବସ୍ଥାରେ ରହିଛି। ପୁଷ୍କରିଣୀଟି ମଶା, ମାଛି, ଡାଉଁଶଙ୍କ ଅନ୍ତୁଡ଼ିଶାଳ ପାଲଟିଛି। ମଶାବଂଶ ବୃଦ୍ଧି ଘଟିଲେ ଡେଙ୍ଗୁ ରୋଗ ବ୍ୟାପିବାର ଆଶଙ୍କା ପ୍ରକାଶ ପାଇଛି। ଏକଦା ଉକ୍ତ ପୁଷ୍କରିଣୀର ଜଳକୁ ଗ୍ରାମବାସୀ ବିଭିନ୍ନ କାମରେ ବ୍ୟବହାର କରୁଥିଲେ। ମାତ୍ର ଏବେ ସେହି ପୋଖରୀଟି ଅଞ୍ଚଳବାସୀଙ୍କ ପାଇଁ ଅଲୋଡା ହୋଇ ପଡିଛି। ପୁଷ୍କରିଣୀର ଜଳ ପ୍ରଦୂଷିତ ଅବସ୍ଥାରେ ରହିଛି। ଅନାବନା ଦଳରେ ପୁଷ୍କରିଣୀଟି ପୋତି ହୋଇପଡିଛି। ପୋଖରୀର ଚାରିପାଖରେ ସ୍ଥାନୀୟ ବାସିନ୍ଦା ସ୍ଥାୟୀ ଭାବେ ବାସଗୃହ ନିର୍ମାଣ କରି ରହୁଛନ୍ତି। ସେମାନେ ପୁଷ୍କରିଣୀକୁ ପ୍ଲାଷ୍ଟିକ ବୋତଲ ଠାରୁ ଆରମ୍ଭ କରି ବର୍ଜ୍ୟବସ୍ତୁ ପକାଇ ଦେଉଛନ୍ତି। ଏଥିପାଇଁ ପୁଷ୍କରିଣୀର ଜଳ ଦୂଷିତ ଅବସ୍ଥାରେ ଦୀର୍ଘ ଦିନ ହେବ ରହିବା ପରେ ଏବେ ସେଥିରୁ ଦୁର୍ଗନ୍ଧ ବାହାରୁଛି ବୋଲି ସ୍ଥାନୀୟ ଲୋକେ କହିଛନ୍ତି।
ସୂଚନା ଅନୁଯାୟୀ, ଖଣ୍ଡପଡ଼ା ରାଜ ପରିବାରଙ୍କ ଅଧୀନରେ ଥିବା ସେହି ପୁଷ୍କରିଣୀଟି ମାଛଚାଷ ପାଇଁ ନିଲାମ ସୁତ୍ରରେ ଦିଆଯାଇଛି। ହେଲେ ସେହି ପୋଖରୀ ଏତେ ପ୍ରଦୂଷିତ ହୋଇଛି ଯେ, ତାହା ରୋଗ ବାହାକ ବୋଲି ସ୍ଥାନୀୟ ଲୋକେ କହିଛନ୍ତି। ଅନ୍ୟପକ୍ଷେ କେନ୍ଦ୍ର ସରକାର ସ୍ବଚ୍ଛ ଭାରତ କାର୍ଯ୍ୟକ୍ରମ ଉପରେ ଗୁରୁତ୍ୱାରୋପ କରୁଛନ୍ତି। ପ୍ରତି ପଞ୍ଚାୟତରେ ଏହି ଯୋଜନାରେ ଲକ୍ଷାଧିକ ଟଙ୍କା ବ୍ୟୟ କରାଯାଉଛି। ହେଲେ ଉକ୍ତ ପୁଷ୍କରିଣୀ ପ୍ରତି ପଞ୍ଚାୟତ କର୍ତ୍ତୃପକ୍ଷ, ବ୍ଳକ ପ୍ରଶାସନ ନତୁବା ଜିଲା ପ୍ରଶାସନ କେହି ଦୃଷ୍ଟି ନ ଦେବା ପରିତାପର ବିଷୟ ବୋଲି ଗ୍ରାମବାସୀ କହିଛନ୍ତି। ସ୍ଥାନୀୟ ସରପଞ୍ଚ ଚିନ୍ମୟ କୁମାର ପଣ୍ଡାଙ୍କ କହିବା ଅନୁଯାୟୀ, ଉକ୍ତ ପୋଖରୀଟି ରାଜପରିବାର ଅଧୀନରେ ରହିଥିବାରୁ ଏମ୍ଜିଏନ୍ଆରଇଜିଏସ ଯୋଜନାରେ ପୁନରୁଦ୍ଧାର କରିବା ସମ୍ଭବ ହେଉନାହିଁ। ଅପରପକ୍ଷେ ଏ ସମ୍ପର୍କରେ ଖଣ୍ଡପଡ଼ା ରାଜା ବିଭୁତି ଭୂଷଣ ସିଂହ ମର୍ଦ୍ଦରାଜଙ୍କ ସହ ଯୋଗାଯୋଗ କରାଯାଇଥିଲା। ସେ କୁହନ୍ତି, ପୋଖରୀ ନିଲାମ ନେଇଥିବା ବ୍ୟକ୍ତିଙ୍କ ଦାୟିତ୍ୱ ରହିଛି ପୋଖରୀ ସଫା କରି ମାଛ ଚାଷ କରିବେ। ଯଦି ପଞ୍ଚାୟତ କିମ୍ବା ବ୍ଳକ ପକ୍ଷରୁ ଏମ୍ଜିଏନ୍ଆର୍ଇଜିଏସ୍ ଯୋଜନାରେ ଉକ୍ତ ପୋଖରୀ ପୁନରୁଦ୍ଧାର କରିବାକୁ ଚାହଁୁଛନ୍ତି ତେବେ ପଞ୍ଚାୟତ ପକ୍ଷରୁ ଆମର ଅନୁମତି ନେଇ ଏ ସମ୍ପର୍କରେ ଏକ ଚୁକ୍ତିନାମା କରି କାର୍ଯ୍ୟ କରିବାରେ କୌଣସି ସମସ୍ୟା ସୃଷ୍ଟି ହେବ ନାହିଁ। ସରପଞ୍ଚ ପଣ୍ଡା ଏ ଦିଗରେ ପଦକ୍ଷେପ ଗ୍ରହଣ କରିବେ ବୋଲି ପ୍ରକାଶ କରିଛନ୍ତି।