ବାରଙ୍ଗ(ଲିଙ୍ଗରାଜ ରାଉତ)/ଟିଟିଲାଗଡ଼,୬।୭(ଶରତ ମିଶ୍ର)ରାଜଧାନୀ ଉପକଣ୍ଠ ଚନ୍ଦକା ଥାନା ଅଧୀନ ସୁନ୍ଦରପୁର ଅଞ୍ଚଳରେ ଥିବା ଏକ ଘରୋଇ ସ୍କୁଲର ଦଶମ ଶ୍ରେଣୀର ୨ଜଣ ଛାତ୍ର ନିଖୋଜ ହୋଇଥିବା ନେଇ ମଙ୍ଗଳବାର ଅଭିଯୋଗ ହୋଇଥିଲା। ଏ ନେଇ ପୋଲିସ ତଦନ୍ତ କରୁଥିବାବେଳେ ବୁଧବାର ଛାତ୍ରଦ୍ୱୟ ଅପହରଣର ଶିକାର ହୋଇଥିବା ନେଇ ନିଜ ଆଡୁ ପରିବାର ଲୋକଙ୍କୁ ଜଣାଇବା ସହ ଟିଟିଲାଗଡ଼ରେ ଥିବା ନେଇ କହିଛନ୍ତି। ପିଲା ୨ଜଣଙ୍କ ପତ୍ତା ଜଣାପଡ଼ିବା ପରେ ପରିବାର ଲୋକେ ପୋଲିସକୁ କହିଥିଲେ। ପରେ ସେମାନଙ୍କୁ ଆଣିବା ପାଇଁ ପୋଲିସ ସହ ପରିବାର ଲୋକେ ଟିଟିଲାଗଡ଼ ଗସ୍ତ କରିଛନ୍ତି।
ପ୍ରକାଶ ଯେ, ସବୁଦିନ ଭଳି କୁଜିମହଲ ଗ୍ରାମର ପୃଥ୍ବୀରାଜ ପ୍ରଧାନ ଓ ଭରତପୁର ଅଞ୍ଚଳର ସୋନୁ କୁମାର ମଙ୍ଗଳବାର ସକାଳେ ସାଙ୍ଗ ହୋଇ ଏକ ଅଟୋରେ ସ୍କୁଲ ପାଖକୁ ଟ୍ୟୁଶନ ପାଇଁ ଯାଇଥିଲେ। ଦୀର୍ଘ ସମୟ ଧରି ପିଲାମାନେ ଘରକୁ ନ ଫେରିବାରୁ ୨ ଛାତ୍ରଙ୍କ ପରିବାର ଲୋକେ ଅଟୋ ଚାଳକ ଓ ଟ୍ୟୁଶନ ସାର୍ଙ୍କୁ ଭେଟି ପଚାରିବାରୁ ଟ୍ୟୁଶନ ଆସିଥିବା ଓ ଅଧାରୁ ଛାତ୍ରଦ୍ୱୟ ଚାଲିଯାଇଥିବା କହିଥିଲେ। ପରେ ସମ୍ପର୍କୀୟଙ୍କ ସହ କଥାହୋଇ ପିଲାଙ୍କୁ ଖୋଜିଥିଲେ ମଧ୍ୟ ପାଇ ନ ଥିଲେ। ଶେଷରେ ବିଳମ୍ବିତ ରାତିରେ ଚନ୍ଦକା ଥାନାରେ ଅଭିଯୋଗ କରିଥିଲୋ। ଅଭିଯୋଗକ୍ରମେ ପୋଲିସ ସକାଳେ ଟ୍ୟୁଶନକୁ ଯାଇଥିବା ସ୍ଥାନ ଓ ରାସ୍ତାରେ ଲାଗିଥିବା ସିସିଟିଭି ଯାଞ୍ଚ କରିଥିଲେ ମଧ୍ୟ କିଛି ସୁରାକ ପାଇ ନ ଥିଲା। ଅନ୍ୟପଟେ ଘଟଣାର ପ୍ରାୟ ୨୦ଘଣ୍ଟା ପରେ ୨ଜଣ ଛାତ୍ର ସେମାନଙ୍କ ପରିବାର ସହ କଥା ହୋଇ ଅପହରଣ କରାଯାଇଥିବା କହିଛନ୍ତି। ପରିବାର ଲୋକଙ୍କ ସୂଚନା ମୁତାବକ, ଟ୍ୟୁଶନକୁ ଦୁହେଁ ଯାଇଥିବାବେଳେ ପାଖରେ ଥିବା ଦୋକାନକୁ ଆସି ବିସ୍କୁଟ ଖାଇଥିଲେ। ଏହି ସମୟରେ ଜଣେ ବ୍ୟକ୍ତି ଆସି ହଠାତ ୨ଜଣଙ୍କ ମୁହଁରେ କିଛି ପକାଇଦେବାରୁ ସେମାନେ ଅଚେତ ହୋଇଯାଇଥିଲେ। ଚେତା ଆସିବାବେଳକୁ ଘରଠାରୁ ବହୁ ଦୂରରେ ଥିବାବେଳେ ଏକ ଟ୍ରକ୍ରେ ସେମାନେ ଥିଲେ। ଟ୍ରକ୍ଟି ଏକ ରେଳଫାଟକ ପାଖରେ ରହିଥିବାରୁ କୌଶଳକ୍ରମେ ସେମାନେ ଓହ୍ଲାଇପଡ଼ିଥିଲେ। ପରେ ରେଳଫାଟକରେ କାର୍ଯ୍ୟରତ ଜଣେ ମହିଳା କର୍ମଚାରୀଙ୍କୁ ଘଟଣା ସମ୍ପର୍କରେ କହିବା ସହ ତାଙ୍କ ଫୋନ୍ରୁ ପରିବାର ଲୋକଙ୍କୁ ଟିଟିଲାଗଡ଼ରେ ଥିବା କହିଥିଲେ। ଏପରିକି ମହିଳା କର୍ମଚାରୀ ଜଣକ ଏ ବିଷୟରେ ଟିଟିଲାଗଡ଼ ପୋଲିସକୁ ଅବଗତ କରାଇବା ପରେ ପୋଲିସ ପହଞ୍ଚତ୍ ୨ ଛାତ୍ରଙ୍କୁ ଉଦ୍ଧାରକରି ନିଜ ହେପାଜତରେ ରଖିଥିବା ଆଇଆଇସି ମନୋଜ ପ୍ରଧାନ କହିଛନ୍ତି।