ସାତମାଇଲ, ୧୪।୯(ଡି.ଏନ୍.ଏ.): ରାତିଅଧରେ ନକଲି ପୋଲିସ ସାଜି ଆସିଲେ। ପ୍ରେମବିବାହ କରି ଶାଶୁଘରେ ଥିବା ନବ ବିବାହିତା ଯୁବତୀଙ୍କୁ ଅପହରଣ କରିନେଲେ। ତେବେ କୌଶଳକ୍ରମେ ଅପହରଣକାରୀଙ୍କ କବଳରୁ ସୁରକ୍ଷିତ ଭାବେ ଖସି ଆସିଛନ୍ତି ଯୁବତୀ। ଏ ନେଇ ସେ ନିଜ ମା’ଙ୍କ ନାମରେ ଥାନାରେ ଫେରାଦ ମଧ୍ୟ ହୋଇଛନ୍ତି। ଏପରି କି ସାବାଳିକା ବୋଲି ପ୍ରମାଣ ଦେଇ ସ୍ବାମୀଙ୍କ ସହ ରହିବାକୁ ଇଚ୍ଛାବ୍ୟକ୍ତ କରିଛନ୍ତି। ଢେଙ୍କାନାଳ ଜିଲା ହିନ୍ଦୋଳ ବ୍ଲକ ବାଲିମୀ ଥାନା ଅନ୍ତର୍ଗତ ମହାଲୁଣ୍ତା ଗ୍ରାମରେ ସୋମବାର ରାତିରେ ଘଟିଛି ଏଭଳି ଏକ ଘଟଣା, ଯାହା ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି।
ପୋଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ରାସୋଳ ଥାନା ଅନ୍ତର୍ଗତ ବୁହାଳିପାଳ ଗ୍ରାମର ସ୍ବର୍ଗତ ଗୁଣ୍ଡିଚା ସାହୁ ଏବଂ ସସ୍ମିତା ସାହୁଙ୍କ ଝିଅ ଭାନୁପ୍ରଭା ସାହୁ (୧୯) ଗତ ଜୁଲାଇରେ ବାଲିମୀ ଥାନା ଅନ୍ତର୍ଗତ ମହାଲୁଣ୍ଡା ଗ୍ରାମର ଶ୍ରୀନିବାସ ସାହୁଙ୍କ ପୁଅ ସିଲୁ ସାହୁ (୨୭)ଙ୍କ ସହିତ ପ୍ରେମବିବାହ କରିଥିଲେ। ଏଥିରେ ମା’ ସସ୍ମିତା ଅସନ୍ତୁଷ୍ଟ ଥିବାବେଳେ ୧୫ ଦିନ ତଳେ ଝିଅଙ୍କ ଶାଶୁଘରକୁ ଯାଇ ବୁଝାଶୁଝା କରିଥିଲେ। ଏପରି କି ଝିଅଙ୍କୁ ସାଙ୍ଗରେ ନେବା ପାଇଁ ଉଦ୍ୟମ କରିଥିଲେ ହେଁ ଏଥିରେ ରାଜି ହୋଇ ନ ଥିଲେ ଭାନୁପ୍ରଭା। ତାଳଚେର ଅଞ୍ଚଳରେ ରହୁଥିବା ସସ୍ମିତାଙ୍କ ଭାଇ ଅର୍ଥାତ୍ ଭାନୁପ୍ରଭାଙ୍କ ମାମୁ ବୁଝାଶୁଝା କରିଥିଲେ ମଧ୍ୟ ସୁଫଳ ମିଳି ନ ଥିଲା। ତେଣୁ ଝିଅଙ୍କୁ ଅପହରଣ କରିବାକୁ ସେମାନେ ଯୋଜନା କରିଥିଲେ। ତଦନୁଯାୟୀ ସୋମବାର ରାତି ପ୍ରାୟ ୧୨ଟାରେ ନକଲି ପୋଲିସ ସାଜି ୪ଜଣ ବ୍ୟକ୍ତି ସିଲୁଙ୍କ ଘରେ ପହଞ୍ଚତ୍ କବାଟ ପିଟିଥିଲେ। ସେମାନେ ନିଜକୁ ଅନୁଗୋଳ ଥାନାର କର୍ମଚାରୀ ବୋଲି ପରିଚୟ ଦେଇଥିଲେ। ଭୟଭୀତ ପରିବାର ଲୋକେ କବାଟ ନ ଖୋଲି ଗୋଟିଏ ପ୍ରକୋଷ୍ଠରେ ଲୁଚିଯାଇଥିଲେ। ତେବେ ପୋଲିସ ପୋଷାକଧାରୀ ବ୍ୟକ୍ତିମାନେ ଝରକା ଭାଙ୍ଗିବାକୁ ଉଦ୍ୟମ କରିବାରୁ ସିଲୁଙ୍କ ଘର ଲୋକେ କବାଟ ଖୋଲିଦେଇଥିଲେ। ଏହା ପରେ ସେମାନେ ଭାନୁପ୍ରଭାଙ୍କୁ ଅପହରଣ କରିନେଇଥିଲେ। ହେଲେ ଗାଡ଼ି ଭିତରେ ଥିବା ମା’ ସସ୍ମିତାଙ୍କୁ ଭାନୁପ୍ରଭା ଚିହ୍ନିପାରିଥିଲେ। ସସ୍ମିତା ଏବଂ ଅନ୍ୟ ଅଭିଯୁକ୍ତମାନେ ତାଙ୍କୁ ଅନୁଗୋଳ ନେଇଯାଇ ତାଙ୍କ ମାମୁଙ୍କ ଘରେ ଛାଡ଼ି ଦେଇଥିଲେ। ତେବେ ଭାନୁପ୍ରଭା କୌଶଳକ୍ରମେ କବାଟ ଖୋଲି ଅନୁଗୋଳ ଥାନାକୁ ଦୌଡ଼ି ପଳାଇଥିଲେ ଏବଂ ସମସ୍ତ ଘଟଣା ସମ୍ପର୍କରେ ପୋଲିସକୁ କହିଥିଲେ। ଏ ସମ୍ପର୍କରେ ବାଲିମୀ ଥାନା ଏବଂ ସିଲୁଙ୍କ ଘର ଲୋକଙ୍କୁ ଅବଗତ କରାଯାଇଥିଲା। ଆବଶ୍ୟକ ପ୍ରମାଣପତ୍ର ଦେବା ପରେ ଭାନୁପ୍ରଭାଙ୍କୁ ସିଲୁଙ୍କ ଜିମା ଦିଆଯାଇଥିଲା। ଏ ନେଇ ଭାନୁପ୍ରଭା ମା’ ସସ୍ମିତାଙ୍କ ନାମରେ ଲିଖିତ ଅଭିଯୋଗ କରିଛନ୍ତି। ନଂ.୧୭୨/୨୨ରେ ଏକ ମାମଲା ରୁଜୁ ହୋଇଥିବା ଥାନାଧିକାରୀ ବ୍ରହ୍ମାନନ୍ଦ ପାତ୍ର ସୂଚନା ଦେଇଛନ୍ତି।
