ମେକ୍ସିକୋ ସିଟି,୨୮।୬ : ମେକ୍ସିକୋରେ ସଶସ୍ତ୍ର ଗୋଷ୍ଠୀ ରାଜ୍ୟ ସୁରକ୍ଷା ମନ୍ତ୍ରଣାଳୟର ୧୪ ଜଣ କର୍ମଚାରୀଙ୍କୁ ଅପହରଣ କରିଛନ୍ତି। ଦକ୍ଷିଣ ମେକ୍ସିକୋର ଚିଆପାସର ସୁରକ୍ଷା ବାହିନୀ ସୁରକ୍ଷା ମନ୍ତ୍ରଣାଳୟର ଅପହୃତ ହୋଇଥିବା କର୍ମଚାରୀଙ୍କୁ ଖୋଜୁଛି।
ମନ୍ତ୍ରଣାଳୟ ଏକ ବିବୃତ୍ତି ଜାରି କରି କହିଛି ଅପହରଣ ହୋଇଥିବା ସମସ୍ତ ପୁରୁଷ କର୍ମଚାରୀଙ୍କୁ ସଶସ୍ତ୍ର ଗୋଷ୍ଠୀର ସଦସ୍ୟମାନେ ରାଜ୍ୟ ରାଜଧାନୀ ଟୁକ୍ସଟଲା ଗୁଟିରେଜରେ ପଶ୍ଚିମରେ ପ୍ରାୟ ୨୨ ମାଇଲ (୩୪.୪ କିଲୋମିଟର) ଦୂରରେ ଥିବା ଏକ ରାଜପଥକୁ ନେଇ ଯାଇଥିଲେ।
ମନ୍ତ୍ରଣାଳୟର ମୁଖପାତ୍ର ନ୍ୟୁଜ ଏଜେନ୍ସି ରଏଟର୍ସକୁ କହିଛନ୍ତି ସମସ୍ତ ୧୪ କର୍ମଚାରୀ ପୋଲିସ ନୁହଁନ୍ତି ବରଂ ପ୍ରଶାସନରେ କାର୍ଯ୍ୟ କରୁଥିଲେ। ମୁଖପାତ୍ର ଏହା ମଧ୍ୟ କହିଛନ୍ତି ଏହା ପୂର୍ବରୁ କେବେ ହୋଇ ନ ଥିଲା ଏବଂ ଅପହରଣ ପଛର କାରଣ ଅନୁସନ୍ଧାନ କରାଯାଉଛି।
ରାଜ୍ୟ ସୁରକ୍ଷା ମନ୍ତ୍ରଣାଳୟର କର୍ମଚାରୀଙ୍କୁ ଉଭୟ ଫେଡେରାଲ ଏବଂ ରାଜ୍ୟ ଏଜେଣ୍ଟଙ୍କ ଦ୍ୱାରା ଖୋଜା ଯାଉଛି। ଜାରି ହୋଇଥିବା ଅପହରଣର ଏକ ଭିଡିଓରେ ହଠାତ ଏକ କାର ରାଜପଥରେ ଅଟକି ଯାଇଥିବାର ଦେଖିବାକୁ ମିଳୁଛି। ସମସ୍ତ କର୍ମଚାରୀଙ୍କୁ ବନ୍ଧୁକ ମୁନରେ ଧରି କାର ଭିତରକୁ ଯିବାକୁ କହିଥିଲେ। ତେବେ ଭିଡିଓର ସତ୍ୟତା ଯାଞ୍ଚ କରିବାକୁ ରଏଟର୍ସ ଏପର୍ଯ୍ୟନ୍ତ କହିନାହିଁ। ରାଜ୍ୟ ଓକିଲ ସଂଘ କହିଛି ଘଟଣାର ଅଭିଯୁକ୍ତଙ୍କ ଫଟୋଗ୍ରାଫ ଏବଂ ଭିଡିଓ ଯାଞ୍ଚ କରାଯାଉଛି।