ଭୁବନେଶ୍ୱର,୨୩।୧୨(ବ୍ୟୁରୋ): ଆୟବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଭିଜିଲାନ୍ସ ଦ୍ୱାରା ଗିରଫ ହୋଇ ଜେଲ ଯାଇଥିବା ଆଇଏଫଏସ୍ ଅଫିସର ଅଭୟକାନ୍ତ ପାଠକଙ୍କୁ ମଙ୍ଗଳବାର ୨ଦିନିଆ ରିମାଣ୍ଡରେ ଆଣିଛି କମିଶନରେଟ ପୋଲିସ। ଟ୍ରାଭେଲ ସଂସ୍ଥା ସ୍କାଏ କିଙ୍ଗ୍କୁ ଠକେଇ ମାମଲାରେ ଅଭୟକାନ୍ତଙ୍କ ସମ୍ପୃକ୍ତି ଅଛି କି ନାହିଁ ସେନେଇ ପୋଲିସ ପ୍ରମାଣ ଯୋଗାଡ଼ କରିବାକୁ ଲକ୍ଷ୍ୟ ରଖିଛି। ପୂର୍ବରୁ ତାଙ୍କ ପୁଅ ଆକାଶଙ୍କୁ ଟାଟା କମ୍ପାନୀରେ ନିଯୁକ୍ତ ଜାଲିଆତି ସହ ସ୍କାଏ କିଙ୍ଗ୍କୁ ଠକେଇ ଅଭିଯୋଗରେ କମିଶନରେଟ ପୋଲିସ ୪ ଦିନିଆ ରିମାଣ୍ଡରେ ଆଣି ପଚରାଉଚରା କରିଥିଲା। ତାଙ୍କଠାରୁ ମିଳିଥିବା ତଥ୍ୟ ଆଧାରରେ ବାପା ଅଭୟକାନ୍ତଙ୍କୁ କମିଶନରେଟ ମୁଖ୍ୟାଳୟରେ ସ୍କାଏ କିଙ୍ଗ୍ ଠକେଇ ସମ୍ପର୍କିତ ପଚରାଉଚରା କରାଯାଉଛି। ଅଭୟକାନ୍ତଙ୍କ ବ୍ୟାଙ୍କ ଆକାଉଣ୍ଟରୁ ସ୍କାଏ କିଙ୍ଗ ସଂସ୍ଥାକୁ ପେମେଣ୍ଟ ହୋଇଥିବା ଲକ୍ଷାଧିକ ଟଙ୍କାର ହିସାବ ମାଗିଛି ପୋଲିସ। ଏଥିସହ ବକେୟା ଥିବା ୬୫ ଲକ୍ଷ ଟଙ୍କା ନ ଦେଇ ସେ ଉକ୍ତ ସଂସ୍ଥାର କର୍ମଚାରୀଙ୍କୁ ଧମକଚମକ ଦେଇଥିବା ନେଇ ହୋଇଥିବା ଅଭିଯୋଗ ସଂକ୍ରାନ୍ତରେ ପୋଲିସ ପଚରାଉଚରା କରିଥିବା ଜଣାପଡିଛି।
ପାଠକ ବାପପୁଅ ପଞ୍ଚତାରକା ହୋଟେଲରେ ରହିବା ସହ ଚାର୍ଟର ଫ୍ଲାଇଟ୍ରେ ବାରମ୍ବାର ରାଜ୍ୟ ବାହାରକୁ ଯିବାଆସିବା କରିଥିଲେ। ଏଥିପାଇଁ ଉକ୍ତ ଟ୍ରାଭେଲ ସଂସ୍ଥାରୁ ସେମାନେ ବୁକିଂ କରିଥିଲେ। ଉଭୟ ଗିରଫ ହେବା ପରେ ସଂସ୍ଥାର ମ୍ୟାନେଜିଂ ପାର୍ଟନର ପ୍ରଭାସ ଚୌଧୁରୀ ସେମାନଙ୍କ ନାଁରେ ଖାରବେଳନଗର ଥାନାରେ ଠକେଇ ଅଭିଯୋଗ କରିଥିଲେ। ପୋଲିସ ୨୯୩/୨୦ରେ ମାମଲା ରୁଜୁ କରିବା ସହ ତଦନ୍ତ ଆରମ୍ଭ କରିଥିଲା।