ମୁମ୍ବାଇ,୮।୮: କରୋନା ଭାଇରସ୍ ସଂକ୍ରମଣ ଦେଶରେ ଦ୍ରୁତ ଗତିରେ ବ୍ୟାପିବାରେ ଲାଗିଛି। ପ୍ରତିଦିନ ଏଠାରେ ହଜାର ହଜାର ସଂଖ୍ୟାରେ ଆକ୍ରାନ୍ତ ଚିହ୍ନଟ ହେଉଛନ୍ତି। ଧନୀ ହୁଅନ୍ତୁ କି ଗରିବ, ଜନତା ହୁଅନ୍ତୁ କି ନେତା କିମ୍ବା ସେଲିବ୍ରିଟି ସମସ୍ତେ ଏବେ କରୋନା କବଳରେ। ଇତିମଧ୍ୟରେ ବଲିଉଡ୍ ମହାନାୟକ ଅମିତାଭ ବଚ୍ଚନଙ୍କ ସମେତ ତାଙ୍କ ପରିବାର ୪ଜଣ ସଦସ୍ୟ ଗତ କିଛି ଦିନ ତଳେ କରୋନାରେ ଆକ୍ରାନ୍ତ ହୋଇଥିଲେ। ବଚ୍ଚନ ପରିବାରର ୩ଜଣ ସଦସ୍ୟ କରୋନାକୁ ହରାଇ ଘରକୁ ଫେରିଥିବା ବେଳେ ଏବେ ଅଭିଷେକ ସୁସ୍ଥ ହୋଇଥିବା ଜଣାପଡ଼ିଛି। ଏନେଇ ଶନିବାର ଅଭିଷେକ ବଚ୍ଚନ ଟୁଇଟ କରି ସୂଚନା ଦେଇଛନ୍ତି। ସେ ଟୁଇଟ କରି ଲେଖିଛନ୍ତି, ଶନିବାର ଦ୍ୱିପ୍ରହରରେ ଆସିଥିବା ରିପୋର୍ଟରେ ତାଙ୍କର କରୋନା ନେଗେଟିଭ୍ ରହିଛି। ଏଥିସହ ସେ ପ୍ରଶଂସକଙ୍କ ପ୍ରାର୍ଥନା ଓ ଡାକ୍ତର ଏବଂ ନର୍ସଙ୍କ ସେବା ପାଇଁ ଧନ୍ୟବାଦ ଜଣାଇଛନ୍ତି। ନିକଟରେ ଅମିତାଭ ସୁସ୍ଥ ହୋଇ ନାନାବତି ହସ୍ପିଟାଲରୁ ଘରକୁ ଫେରିଥିବା ବେଳେ ଏହା ପୂର୍ବରୁ ଐଶର୍ଯ୍ୟା ଓ ଆରାଧ୍ୟା ମଧ୍ୟ ସୁସ୍ଥ ହୋଇ ଫେରିଥିଲେ।